KINOBAḺIAN 22:7 - Alkitab Singog In Mongondow Masa In Tanaa

⁷ ki Ishak in noḻibó, “Papa!” Ki Abraham notubag, “Nongonu uḻeku?” Ki Ishak in noḻibó, “Kita ain nodia kon tuḷú bo kayu, táe ondabí in ki adí in domba inta pakéon kuruban tubáan tua?”

KINOBAḺIAN 22:7 Iomraidhean Croise

KINOBAḺIAN 22:8

Ki Abraham in notubag, “Ki Allahbí in moposadia in tua.” Bo taya dua in nogingguputdon kon bobayáan.

KINOBAḺIAN 8:20

Ki Nuh noposindog in mezbah tobatú kon i Tuhan. Sia in nogamá kon tumongo batu nongkon sigad in ḷagapan bo mahaḷuk mita ibanea inta halal, bodongka pinosumbanea saḷaku kuruban inta sinubá kon tudu in mezbah tatua.

IḶUAIAN 12:3

Potaaudon in parenta tanaa kon bayongan bangusa Israel: Kon tanggal mopuḷú buḷan tanaa, intau mita ḷoḷaki in musti moratá kon ki adí in domba tobatú sin kaanon moyotakin in intau kon bonu in baḷoi.

IḶUAIAN 29:38

“Pomuḷoi in singgai iko musti umuran mopokuruban kon tudu in mezbah tatua domba doyowa inta umur totaong.

MATIUS 26:39

Bo inumuna topiḻik in Sia bodongka sinumungkud nosambayang, kai-Nia, “O Amá-Ku, aka motaau, yo Inggamáaidon in roriga tanion nongkon i Nakó, tongá dikabí dumudui kon ibog-Ku táe aidaidon ná inta kinoibog i Amá.”

MATIUS 26:42

Bo kon induaneadon in Sia minayá nosambayang, kai-Nia, “Amá-Ku, aka roriga tanaa musti kobayáan-Ku, sin diá motaau poyayúon kon i-Nakó, yo aidaidon ná inta koibog-Mu.”

YOHANES 1:29

Nopoikoḷomai kon singgai, indoianmai Yohanes ki Yesus namangoi kon inia. Bo ki Yohanes in noguman, “Indoiai, tuata in ki Adí in Domba i Allah inta momopat kon dosa in dunia.

YOHANES 1:36

Naonda inontongnea in ki Yesus noitaḻib, Sia in noguman: “Indoiai! Tuata in Adí Domba i Allah.”

YOHANES 18:11

Dá ki Yesus in noguman kon i Petrus, “Tungkogdon bui kon gumánea in pitowmu nion! Degá iraimumai kon diábí inumon-Ku in palo in roriga inta inogoi i Amá kon i-Nakó?”

SURAT I PAULUS KON JAMAAT RUM 8:15

Sin Roho, inta inogoi i Allah kon i monimu, diábí mopobaḻí kon i monimu ata, sahingga moiko in mobiagdon kon bonu in porasaan moondok. Táe Roho i Allah in mopobaḻíbí kon i monimu ki adí mita i Allah. Bo takin kawasa in Roho tatua kita komintan in monangoi kon i Allah, “Amá, o Amáku!”

WAHYU 13:8

Mahaḷuk tatua sumbáanbí in bayongan intau inta nobiag kon dunia naa. Intau mita inta diápa kinopaisan in tangoi monia kon bonu in buk kobiagan inta kapunyaan i Adí in Domba inta ain iratá, pinangkoipamai kon dunia naa diápa pinomia.