KINOBAḺIAN 18:31 - Alkitab Singog In Mongondow Masa In Tanaa

³¹ Ki Abraham in noguman, “Ampungaidon in akuoi inta moiḻiudon in barani mongingguput kon tosingogon tanaa, Tuhan. Aka kuma bo dongkadon doyowa nopuḷú in intau?” Ki Tuhan in notubag, “Aka doyowapa nopuḷú in intau mouḻí-Ku, yo kotá tatua in diábí yopúon-Ku.”

KINOBAḺIAN 18:31 Iomraidhean Croise

KINOBAḺIAN 18:27

Ki Abraham in bui noguman, “Ampungaidon akuoi Tuhan, sin akuoi ain noiḷaut nongingguput kon tosingogon-Mu tanaa. Akuoi naa in tongábí intau inta nongkon ḷobud, inta diábí in hak mopoyaput in tosingogon onuka.

KINOBAḺIAN 18:30

Ki Abraham in noguman, “Donaai tumorú, Tuhanku, aka akuoi buipa doman mosingog. Yo naonda aka kuma dongkadon toḷu nopuḷú in intau?” Ki Tuhan in noguman, “Aka toḷupa nopuḷú intau mouḻí-Ku, yo tagúon-Kupabí in niat-Ku.”

KINOBAḺIAN 18:32

Pangabisannea ki Abraham in noguman, “Donaaidon tumorú, Tuhan, dongkadon komintan akuoi in mosingog. Yo naonda aka dongkadon mopuḷú in intau?” Ki Tuhan in noguman, “Aka mopuḷúpa doman in intau diá kotaḷá, yo diábí yopúon-Ku in kotá tatua.”

MATIUS 7:11

Dá aka moiko inta moraat bo motaau mobogoi, kon inta mopia kon i adímu mita. Yo bambíkabí ki Amámu kon soroga! Sia in moiḻiubí kon tua, ogoian-Neabí inta mopia totok in ki ine inta moigum kon i-Nia.”

MATIUS 7:7

“Poigumdon, dá ogoianbí in moiko. Potayakdon, dá mokouḻí bí in moiko. Ponangkokódon, dá pobukatanbí in moiko kon ḷoḻingkop.

LUKAS 11:8

“Yo naonda?” guman i Yesus bui. “Akuoi in moguman kon inimu, umpakabí iko yobayatnea, yo diábí mobangon in sia bo mobogoi kon onu in paraḷumu. Táe aka iko bo diá mooyá in umuran monangkokó bo moigum, dá mobangonbí in sia bo mobogoi kon onu in paraḷumu.

LUKAS 18:1

Onda intua ki Yesus nongonguman kon tobatú poumpamaan sin potundú kon i monia sinbá mosia in umuran mosambayang bo umuran moropot in gina.

EPESUS 6:18

Aidai intua komintan takin mosambayang mopoigum kon totuḷung i Allah. Posambayangdon pomuḷoi mako podudui ibog in Roho i Allah kon i monimu. Umuran pobasadia in moiko bo dika umundok. Tantú sambayangai in bayongan umat i Allah.

IBRANI 4:16

Tuamai, koḻigai in kita dika moondo-ondok in mayá kon tayowon i Allah inta nomarenta takin pia in gina. Motabibí in ki Allah kon i naton bo ogoian-Neabí in barakat, sahingga motarimabí in kita kon totuḷung-Nea aka kon wakutuneadon.