IḶUAIAN 24:3 - Alkitab Singog In Mongondow Masa In Tanaa

³ Ki Musa minayá bo nopotaau kon bangusa tatua in bayongan parenta bo atorang i Tuhan. Mosia komintan noyododai in notubag, “Kami komintan in moibogbí mogaid kon onu inta ain pinoguman i Tuhan.”

IḶUAIAN 24:3 Iomraidhean Croise

TAWARIKH 2 15:14

Takin singog noropot mosia nongibot kon i Tuhan kon mosia in tantúbí kumadai kon dandi tatua. Onda intua mosia in norogiow bo nogirup kon torompet.

TAWARIKH 2 15:15

Bayongan in rayat Yohuda noḷunganga in gina sin mosia in nomiadon kon ibot tatua takin ḻimbatú in gina. Mosanang in gina monia in noibada kon i Tuhan, bo ki Tuhan in noibog doman notarima kon i monia. Inogoi-Nea kon i monia in kaadaan inta moonow kon butá monia.

MAZMUR 50:5

Guman-Nea, “Sipundon in bayongan in umat-Ku inta ain nomia kon dodandian takin-Ku, bo sinoimpaḷut in kuruban inta iratá.”

IḶUAIAN 19:8

Mosia komintan in notubag noyododai, “Kami in moibogbí mogaid kon bayongan inta pinoguman i Tuhan,” bo tubag monia tatua pinoyaput i Musa kon i Tuhan. Bo ki Tuhan noguman kon i Musa, “Akuoi in mamangoi kon inimu táe moibuni kon bonu in goḷom inta mobunod; intau mita in mokodongogbí kon onu in poguman-Ku kon inimu, bo pinangkoi kon singgai tatua umurandon in mosia mopirisaya kon inimu.

IḶUAIAN 24:2

Tongábí iko tontaní in motaau mamangoi mokopodiug kon i-Nakó. Ibanea in diábí motaau mamangoi mokopodiug, dapot bo rayat diábí in motaau motakod kon buḷud tanaa.”

IḶUAIAN 24:7

Onda intua ginamánea in buk dodandian inta pinomaisan kon parenta mita i Tuhan, bo binacaneadon kon tayowon in bangusa tatua takin singog inta moropot. Mosia noguman, “Kami moibog dumudui kon i Tuhan bo mogaid kon bayongan parenta-Nea.”

YEREMIA 11:4

Dodandian tatua in inaidan-Ku takin mogoguyang monia kon dodai in mosia dinia-Ku iḻumuai nongkon Mesir, ḻipú inta naonda bo naraka kon i monia. Akuoi in nopotabá kon i monia tumoindudui kon i-Nakó bo mogaid kon bayongan inta pinarenta-Ku. Tanaa in pinoguman-Kudon doman kon intau mita in Yohuda bo intau in Yerusalem kon aka mosia bo motoḷutui kon i-Nakó yo mosia in mobaḻí umat-Ku bo Akuoi in ki Allah monia.

HAGAI 2:5

Kon dodai in moiko iḻumuai nongkon Mesir, Akuoi in nodandidon kon umuranbí moḷukad kon i monimu. Bo dapot in tanaapa Akuoi in umuranpabí doman moḷukad mako kon i monimu. Dá, dikadon moondok.

MALEAKHI 2:10

Kita naa in koamábí kon inta notongkai! Kita naa in binaḻí i Tuhan notongkai! Aka natua, yo nongonu sin mosiḻionganbí kon dodandian bo takin aid natua moḻiongdon kon dodandian inta pinomia i Allah takin mogoguyang naton!

ULANGAN 11:1

“Kotabibí in ki Tuhan Allahmu, bo umurandon duduiai in bayongan parenta-Nea.

ULANGAN 4:1

Bo ki Musa noguman kon bangusa tatua, “Duduiaidon komintan in hukum inta tundúonku kon inimu, sinbá mobiag in moiko bo moiutun kon butá inta bain ogoi i Tuhan, Allah in mogoguyangmu, kon inimu.

ULANGAN 4:45

Tua inaidannea naonda in mosia iḻumuai nongkon Mesir bo naonda in kon ḷopá kon dotá in pomukaan kon Ongkag in Yordan, noyogintayow in kotá in Bet-Peor. Butá tatua pernabí nobaḻí butá in Sihon, datu intau in Amori, inta tungkuḷ intua nomarenta kon kotá in Hesybon. Ki Musa bo bangusa Israel nonaḷow kon inia kon dodai in mosia iḻumuai nongkon Mesir.

ULANGAN 4:5

Bayongan in hukum tatua sinundúku kon inimu ná inta pinarenta i Tuhan Allahku. Duduiaidon intua komintan kon butá inta bain tuotan bo ḻitúan monimu tua.

ULANGAN 5:1

Ki Musa in nosipun kon bayongan bangusa Israel, bo noguman kon i monia, “Utat mita, indongogai in hukum mita inta pinotaauku kon inimu singgai in naa. Balajardon in hukum mita tatua, bo duduiai koposatia.

ULANGAN 5:31

Táe iko, Musa, pobuidon mangoi bo pogutundon takin-Ku kon naa; iko in pobogoian-Ku kon bayongan hukum bo parenta-Ku. Tundúdon kon i monia, sinbá duduian monia intua kon butá inta ogoi-Ku kon i monia.’

ULANGAN 6:1

“Ki Tuhan Allahmu in nopotabá kon inakó motundú kon bayongan hukum tanaa kon inimu sinbá aidan monimu kon butá inta diádon moonggot bo bayáan monimu pogutunan.

YOSUA 24:21

Dá intau mita in Israel tatua notubag, “Dia! Kami in diábí mogundoi kon ilah mita ibanea. Kami in mogundoibí tongá kon i Tuhan!”

YOSUA 24:22

Bo ki Yosua noguman, “Moikodon tontaní in nobaḻí sakusinea kon moiko ain nonimpod kon tosingogon kon tongábí mogundoi kon i Tuhan.” “Totuu,” tubag monia, “kamidon tontaní in sakusinea.”

YOSUA 24:24

Bo intau mita tatua noguman kon i Yosua, “Kami in tongábí mogundoi kon i Tuhan, Allah naton. Kami in dumuduibí kon parenta-Nea mita.”