IBRANI 9:19 - Alkitab Singog In Mongondow Masa In Tanaa

¹⁹ Munapabí in ki Musa nopotaau in bayongan hukum i Allah kon intau mita in Israel. Onda intua sia nogamá kon dugú in ki adí in sapi bo dugú in bembé koḷakian bo binaukannea in tubig. Noiduduimai kon tua pinisikanneadon in Buk inta pinomaisan kon hukum mita inta nongkon i Allah bo bayongan intau in Israel. Sia in nomisik kon tua takin hisop bo bubuḷ in domba inta nopuya totok in batangannea.

IBRANI 9:19 Iomraidhean Croise

MAZMUR 51:7

Totuubí, akuoi in moraat pinangkoi kon dodaipa in pinononggadí, bo kinotugatandon in dosa pinangkoi kon bobuḷadían.

IḶUAIAN 12:22

Pogamádon kon hisop tobogot, poḷodok kon bonu in tano-tanó inta binonuan in dugú in domba tatua, bodongka popoḻepo kon oigi in ḷoḻingkop doyowa bo kon ḻimonik in ḷoḻingkop in baḷoimu. Modapot in doḷo-doḷom dika tobatúmai kon sigad monimu i monaḷámai kon baḷoi.

YESAYA 52:15

Táe tanaa nobayong in bangusa in binaḻínea nongoherang, datu mita nongobió popisí in noitongau. Mosia in mokoontong bo momangaḻe, inta dungkuḷmai diá kinotaauan monia.”

YEHEZKIEL 36:25

Mopaḷut mako kon tua moiko in pisikan-Ku in tubig inta mosilang, sinbá modaritdon nongkon bayongan in berhalamu bo nongkon bayongan yagi-yagi inta ain nokokotor kon i monimu.

IMAMAT 1:10

Aka inta pinosumba tatua bo domba tobatú ande bembé, dá biag tatua musti koḷakian bo inta totok in mopia.

IMAMAT 3:6

Aka inta pinosumba nobaḻí kuruban dodamean tua bo domba tobatú ande bembé, dá motaaubí in koḷakian ande kobaayan, táe inta totok in mopia.

PINOGIAPAN 19:18

Kon soaḷ inta muna, inta aka oyúon in intau inta minatoi kon bonu in ḷoḷaigan, dá intau inta diá nonajis musti mogamá kon totanga mointok in hisop, bo poḷodoknea intua kon bonu in tubig tatua, bodongka pisikannea in ḷoḷaigan tatua bo bayongan yagi-yagi inta kon bonunea, ná doman tua in intau mita inta kon tua. Kon soaḷ inta nogindua, inta aka intau tobatú koḻiaian in mayat, pinoḷobongan andeka tuḷan in intau minatoi, yo intau inta diá nonajis musti momisik doman natua kon intau inta nonajis tatua.

PINOGIAPAN 19:6

Moiduduimai kon tua ki imang musti mogamá kon kayu aras topiḻik, hisop totanga mointok bo tontogot nopura tobatú, bodongka pogambatnea kon tuḷú inta momayongmai kon sapi nopura tatua.

MATIUS 27:28

Iḷongkut monia in ḷambung-Nea bo pinakéan monia in jubah nokasumba.

MARKUS 15:17

Bo ki Yesus iḷambungan monia in jubah nopars bo pinogaidan kon mahkota dodugian bo pinopobandow kon uḷu i Yesus.

MARKUS 15:20

Onda in pinoyambá mako monia natua in ki Yesus, iḷongkutdon bui monia in jubah nopars tatua bo pinoḷutudon bui in ḷambung-Nea tontaní. Onda intua dinia pinoḷuai sin popopakúdon kon kayu pinoyotaḻempang.

YOHANES 19:2

Tontara mita in nomia kon mahkota nongkon tanga mita inta dodugian, bo pinobandow monia kon uḷu i Yesus. Onda intua iḷambungan monia in jubah nopars,

YOHANES 19:5

Bo ki Yesus in iḷumuai takin nogijubah nopars. Ki Pilatus in noguman kon i monia, “Indoiaika in Intau tatua.”

IBRANI 1:1

Dungkuḷmai in noyagi-yagimaidon daya i Allah in mosingog kon mogoguyang naton, singog-Nea tatua in pinoyaput pinongin nabi mita.

IBRANI 10:22

Tuamai, koḻigai dimiugdon in kita kon i Allah takin gina motuḻid bo totu-totuudon mopirisaya sin gina naton in dinaritandon nongkon raian mita inta mongoraat, bo awak naton in dinaritan domandon in tubig inta modarit totok.

IBRANI 10:4

Sin diábí doman dugú in sapi bo dugú in bembé mokopopat kon dosa.

IBRANI 12:24

Moiko in namangoi sinumayow kon i Yesus, tonsigad in dodandian inta mobagu tua; moiko in sinumayow kon dugú pinomisik inta nojamin kon soaḷ mita inta mopia-pia nongkon onu inta jinamin in dugú i Habel.

IBRANI 9:12

Ki Kristus in sinumuot kon Yuang Totok in Motusi kon ḷoḷaigan tatua tongábí komintan, diá bidon mopobui-buimai. Dodai intua Sia in diábí nodia kon dugú in bembé koḷakian andeka dugú adí in sapi sin posumba, táe dugú-Neabí tontaní in dinia-Nea. Bo dugú-Neabí tatua in nopobebas kon i naton dapot in kopaḷutannea.

IBRANI 9:13

Dugú in bembé bo dugú in sapi koḷakian takin ḷobud in kuruban ki adí in sapi, pinaké nondarit kon intau mita inta nokotor podudui atorang in agama sinbá mobaḻí modarit in mosia.

IBRANI 9:18

Tuamai dodandian inta muna in musti dugúon sinbá mo sah.