IBRANI 9:12 - Alkitab Singog In Mongondow Masa In Tanaa

¹² Ki Kristus in sinumuot kon Yuang Totok in Motusi kon ḷoḷaigan tatua tongábí komintan, diá bidon mopobui-buimai. Dodai intua Sia in diábí nodia kon dugú in bembé koḷakian andeka dugú adí in sapi sin posumba, táe dugú-Neabí tontaní in dinia-Nea. Bo dugú-Neabí tatua in nopobebas kon i naton dapot in kopaḷutannea.

IBRANI 9:12 Iomraidhean Croise

DANIEL 9:24

Pitu pokali kon pitu nopuḷú notaong in sempo inta ain sinantú i Allah sin mopoḷuat kon bangusamu bo kotámu inta motusi tatua nongkon dosa bo aid moraat. Bayongan in dosa in ampunganbí bo kooadil inta mononoi in posindogonbí, dá oontongon bo toḻindap tatua in moniatadon, bo Baḷoi Tuhan inta motusi tatua in posumba bui kon i Tuhan.

IMAMAT 16:15

Mopaḷut mako kon tua ki Harun musti moratá kon bembé sin pokuruban potobut kon dosa in umat Israel. Dugú in bembé tatua musti diaannea kon Yuang Totok Motusi, bo popopisik kon dotá in muna taḷob in Poti Dodandian bo kon tayowon Poti, ná pinogogaid kon dugú in sapi koḷakian.

IMAMAT 4:3

Aka inta dinosa tatua bo Imang Moḷoben, modapot in bangusa Israel in moitakin doman moitaḷá, dá sia musti mopokuruban in sapi koḷakian batánea tobatú inta mopia kon i Tuhan sinbá dosanea ampungandon.

IMAMAT 8:2

“Oinídon in ki Harun bo ki adínea mita bo diadon in pakeang imang, ḷana upacara, sapi koḷakian tobatú inta batánea sin baḻíon kuruban potobut kon dosa, domba koḷakian doyowa, bo tokompé in roti inta diá iragian.

IMAMAT 9:15

Nopaḷut mako kon tua sia noposumba in bembé mobaḻí kuruban potobut kon dosa in umat. Bembé tatua iratánea bo pinosumbanea ná pinogogaid kon kuruban pinotobut kon dosanea tontaní.

ZAKHARIA 3:9

Inukat-Ku kon tayowon i Yosua in batu tobatú inta notompitu inta kinurigan-Ku in pais mita. Tongá tosinggai monag tua ḷumbúon-Ku in dosa nongkon butá tanaa.

MARKUS 3:29

Táe aka mohojat in sia kon Roho i Allah, yo intau tatua in diábí motaau ampungan! Sin hojatan tatua in dosabí mononoi.” (

LUKAS 1:68

“Dinayo-dayowdon in ki Tuhan, ki Allah Israel! Sia ain notuḷung kon umat-Nea bo nonginggamá doman kon roriga monia.

OUMAN IN RASUL MITA 20:28

Manangka intua yo mokopopiadon in moiko bo umuran moḷukad kon awak monimu bo poḷat doman ḷukadai in bayongan umat i Allah inta ain pinosarakan i Allah kon i monimu sinbá ḷukadan. Sin moiko nion ain sinantú in Roho i Allah mobaḻí moḷoḷukad bo mononompia kon umat i Allah inta ain sinobut-Nea in dugú i Adí-Nea tontaní.

EPESUS 1:7

Ki Kristus in minatoidon sin mopobebas kon i naton bo mongampung kon bayongan dosa.

KOLOSE 1:14

Ki Adí-Nea tatua inta nopobebas kon i naton, mangaḻenea bayongan dosa naton ain inampungan-Nea.

TESALONIKA 1 1:10

Inouman doman monia in kososatia monimu in mogoḷat mako kon koangoian bui i Adí i Allah inta ki Yesus Kristus nongkon soroga. Sia inta ain biniag bui i Allah nongkon sigad in intau mita minatoi. Sia tuata inta moposaḷamat kon i naton nongkon hukuman i Allah kon singgai moiduduimai.

TITUS 2:14

Sia tuata inta ain noposarakan in awak-Nea sin mopoḷuat kon i naton nongkon bayongan inta moraat, bo kita in baḻíon-Nea tobatú umat inta noiḷuatdon nongkon kawasa in dosa bo tongádon mobaḻí umat-Nea inta morajing mogaid kon inta mopia.

IBRANI 1:3

Sia doman naa in moponiata in kamuliaan i Allah inta diá in poḻiuan tua. Bo noniatadon totok kon i-Nia in rupa i Allah tontaní. Singog-Nea inta mokawasa totok tua in pinaké-Nea moḷukad kon dunia naa. Bo naonda in sinobut-Neadon in dosa mita in intau, iḻimitúdon in Sia kon ḷoḻitúan pomomarentaan kon soroga moyotakin i Allah Pongawasa inta totok in moḷantud.

IBRANI 10:19

Yo uḻe utat mita, dugú i Yesus tua in nobogoidon in kabaranian kon i naton in tanaa tumuot kon Yuang Totok Motusi.

IBRANI 10:4

Sin diábí doman dugú in sapi bo dugú in bembé mokopopat kon dosa.

IBRANI 13:12

Manangka intua ki Yesus in minatoi doman kon ḷuai in ngara moḷoben in kotá sin mondarit kon umat-Nea nongkon bayongan in dosa. Dugú-Neabí tontaní in pinodugú-Nea.

IBRANI 5:9

Dá naonda in Sia binaḻídon mopoposaḷamat inta nosompurna, Sia in nobaḻídon pangkoi in kasaḷamatan inta mononoi kon bayongan intau inta umuran dumudui kon parenta-Nea.

IBRANI 7:27

Sia in diábí notongkai in imang mita moḷoben ibanea inta pomuḷoi in singgai musti moposumba in kuruban sin potobut kon bayongan taḷánea tontaní. Mopaḷut mako kon tua sia in moposumba doman in kuruban potobut kon dosa mita in umat. Ki Yesus in tongábí komintan noposumba in kuruban bo awak-Neabí tontaní in pinosumba-Nea saḷaku kuruban.

IBRANI 9:13

Dugú in bembé bo dugú in sapi koḷakian takin ḷobud in kuruban ki adí in sapi, pinaké nondarit kon intau mita inta nokotor podudui atorang in agama sinbá mobaḻí modarit in mosia.

IBRANI 9:14

Dá aka dugú bo ḷobud mokodarit kon onu inta nokotor kon intau mita tatua, yo bambíkabí dugú i Kristus! Pinongin Roho inta diá mato-matoi, ki Kristus ain noposumba in awak-Nea tontaní kon i Allah saḷaku kuruban inta nosompurna. Tuabí in nondarit kon gina naton nongkon upacara mita inta diá in baragunanea, sinbá kita umuran mosumba kon i Allah inta nobiag.

IBRANI 9:15

Tuamai ki Kristus in nobaḻí tonsigad kon tobatú dodandian inta nobagu, sinbá intau inta inoinídon i Allah in motarimadon kon barakat mita mononoi inta ain pinodandi i Allah. Tua komintan in mobaḻíbí sin oyúon in minatoi; Siata in ki Kristus. Kinopatoian-Nea tatua in nopobebasbí kon intau mita nongkon taḷá mita inta pinomia monia wakutu in dodandian inta muna pinaképa.

IBRANI 9:19

Munapabí in ki Musa nopotaau in bayongan hukum i Allah kon intau mita in Israel. Onda intua sia nogamá kon dugú in ki adí in sapi bo dugú in bembé koḷakian bo binaukannea in tubig. Noiduduimai kon tua pinisikanneadon in Buk inta pinomaisan kon hukum mita inta nongkon i Allah bo bayongan intau in Israel. Sia in nomisik kon tua takin hisop bo bubuḷ in domba inta nopuya totok in batangannea.

IBRANI 9:28

Natua doman in ki Kristus, tongábí komintan pinosumba saḷaku kuruban pinotobut kon dosa in intau mobayong. Sia in mamangoipabí bui, táe deeman bidon mamangoi mogimpaḷut kon persoalan dosa, táe dongka bidon moposaḷamat kon intau mita inta mogoḷat mako kon koangoian-Nea bui.

IBRANI 9:7

Bo inta motaau tumuot kon yuang inta totok in moako tua in tongábí imang inta totok moḷoben. Sia in tumuot mogaid kon oaidannea, komintan in totaong. Sia in tumuot kon tampat tatua takin kodia-dia in dugú inta posumba kon i Allah saḷaku sosumba inta potobutnea kon dosanea tontaní bo dosa mita in umat i Allah inta diá sinuod pinomia.

WAHYU 1:5

bo nongkon i Yesus Kristus, sakusi inta mosatia. Sia tua inta muna-munamai totok biniag bui nongkon kinopatoian bo Sia doman in nongawasa kon bayongan datu kon dunia naa. Ki Yesus in motabi kon i naton, tuamai Sia in noibog minatoi sin momilat kon i naton nongkon kawasa in dosa mita naton,

WAHYU 5:9

Mosia nopodondong in tobatú dondong mobagu, nanaa: “Iko in patus mogamá kon buk tatua bo moḷosi kon meterainea mita. Sin Iko ain iḻimod, bo dugú-Mu tatua, in pinoguboḻi-Mu kon intau nongkon bayongan suku, bahasa, negara bo bangusa sin ogoi kon i Allah.