IBRANI 9:11 - Alkitab Singog In Mongondow Masa In Tanaa

¹¹ Táe ki Kristus ain namangoi saḷaku Imang Moḷoben nongkon soaḷ mita mopia inta aindon oyúon. Sia in sinumuotdon bo ain nopobayá in oaidan-Nea saḷaku Imang Moḷoben kon bonu in ḷoḷaigan moḷoben bo inta totok in nosompurna. Ḷoḷaigan tatua in deemanbí pinomia in intau; mangaḻenea in deemanbí nongkon dunia inta tongá doman pinomia naa.

IBRANI 9:11 Iomraidhean Croise

KINOBAḺIAN 49:10

Ki Yohuda in mokadai kon tungkud in dodatuan, Buínea in momarenta dapot in mononoi. Bangusa mita in modia mangoi kon pajak, bo tumungkud takin moondok kon tayowonnea.

MAZMUR 40:7

Sosumba bo kuruban oḷudon kinodoí-Mubí, kuruban payongon bo kuruban potobut kon dosa diábí in inigum-Mu. Táe inogoian-Mudon in bongoḷan in akuoi inta pokidongog kon singog-Mu.

YESAYA 59:20

Ki Tuhan in noguman kon umat-Nea, “Akuoi in mamangoibí in Yerusalem sin moposaḷamat kon i monimu komintan inta nogogaidon in nogaid kon dosamu mita.

YEREMIA 33:8

Akuoi in mondaritbí kon i monia nongkon dosa mita inta ain inaidan monia kon i-Nakó; dosa mita bo aid moraat monia in ampungan-Kubí.

MALEAKHI 3:1

Tubag i Tuhan Inta Totok in mokawasa, “Akuoi in mopotabábí in totabá-Ku mita sin moposadia in daḷan bayáan-Ku. Dá baḷúdon in Akuoi, ki Tuhan inta sinayak monimu, in mamangoidon in Baḷoi-Ku. Totabá-Ku inta sinano-tanob monimu tatua in mamangoi bo mopotaau in dodandian-Ku.”

MATIUS 11:3

dá nopotabádon in sia kon murínea mita noḻibó kon i-Nia nanaa: “Degá Ikodon naa in intau inta mamangoi podudui in dandi i Allah, andeka mogoḷatpa degá bui in kami kon intau ibanea?”

MATIUS 2:6

Bo iko Betlehem, butá i Yohuda, iko in deemanbí totok in mointok kon sigad monia inta nomarenta kon Yohuda. Sin nongkon inimubí naa moisindog in tobatú intau inta mobaḻí itoi, Sia inta moḷukad kon bayongan umat-Ku kon Israel.”

MARKUS 14:58

“Dinongog nami intau tanaa noguman, ‘Umpagon-Ku in Baḷoi Tuhan inta inaidan in intau, bo naonda in toḷu nosinggai bui posindogon-Ku in ibanea inta deeman intau in nogaid.’ ”

YOHANES 1:14

Pirman ain nobaḻí intau, Sia in nogutun kon sigad naton, bo kita ain nokoontong kon kamuliaan-Nea. Kamuliaan inta sinarima-Nea saḷaku Adí tuḷong i Amá. Pinongin i-Nia tua kita mokoontong kon i Allah bo tabi-Nea kon i naton.

YOHANES 4:25

Bobay tatua in noguman kon i Yesus, “Kinotaauankubí kon Datu Mopoposaḷamat (inta sinangoi ki Kristus) in mamangoibí. Aka Sia mamangoi, potaau-Neabí in bayongan in yagi-yagi kon i naton.”

OUMAN IN RASUL MITA 7:48

Tongá ki Allah Inta Totok in moḷantud tatua, diábí nogutun kon baḷoi inta inaidan in ḻima intau tatua; sin kon bonu in buk in nabi in pinais nanaa,

KORINTUS 2 4:18

Kami in diábí monarukiramai kon onu inta koontongan. Sin inta koontongan tua in diábí mononoi, táe aka inta diá koontongan yo tuabí in mononoi.

KORINTUS 2 5:1

Sin kinotaauanbí nami kon aka baḷoi – makusudnea awak naton – inta pinogutunan naton kon dunia naa bo rumbunon, yo posadiaanbí i Allah in kita kon baḷoi inta kon soroga. Tampat inta pinomia i Allah tontaní bo inta diá mogogu-goguyaat.

KOLOSE 2:11

Lantaran notobatú takin i Kristus, dá moiko ain sinunat, táe deemanbí sunat inta inaidan in intau, táe sunatbí inta inaidan i Kristus, inta nopobebas kon i monimu nongkon kawasa in tabiat inta binaradosa.

IBRANI 10:1

Hukum in agama Yahudi tongábí nobogoi in gambaran inta diá nosilang kon soaḷ mita mopia inta kon singgai moiduduimai, deemanbí gambaran inta totokanea nongkon soaḷ mita tatua. Sin hukum mita tatua in diábí mokosompurna kon intau inta mamangoi mosumba kon i Allah takin kodia-dia in barang inta posumba. Umpakabí pomuḷoi in taong umuran moposumba in kuruban mita natua.

IBRANI 12:27

Tosingogon “komintanpa doman” mogumanbí kon bayongan in dunia inta ain pinomia naa in dandúon bo ḷumbúon, sinbá dongkadon inta diá modandú in kotaḷáan.

IBRANI 13:14

Sin kon dunia naa diábí in tampat pogutunan mononoi kon i naton, kita in mayábí motayak kon tampat pogutunan kon singgai moiduduimai.

IBRANI 2:17

Mangaḻenea kon naa kon bayongan in yagi-yagi Sia in musti mobaḻí naonda bo ki utat-Nea mita, sahingga notaau in Sia nobaḻí Imang Moḷoben inta motoindudui kon i Allah bo kototabi. Tua in pomiaan-Nea sinbá ampungandon dosa in intau.

IBRANI 3:1

Utat mita tumpaḷa Keresten inta ain inoiní i Allah! Raika monimu koako-ako in soaḷ ki Yesus naa! Sia ain pinotabá mangoi i Allah sinbá mobaḻí Imang Moḷoben kon agama inta dinuduian naton.

IBRANI 4:15

Imang Moḷoben naton tua in deemanbí imang inta diá umuran kotaki-takin mokorasa kon yoyiga mita naton. Sia ain sinoba kon bayongan yagi-yagi ná doman kita naa; táe diá in Sia nogaid kon dosa!

IBRANI 7:1

Ki Melkisedek naa in datu nongkon Salem bo imang i Allah inta totok in moḷantud. Wakutu in ki Abraham nobuidon nongkon pinoparangan bo nonaḷowdon kon datu mita, dá ki Melkisedek naa in namangoidon nonontomu bo nomarakat kon inia.

YOHANES 1 5:20

Kinotaauan bidon naton kon ki Adí i Allah ain namangoi bo ain nobogoi in pongortian kon i naton, sinbá kotaauan naton in ki Allah inta mobanar. Kita in nobiag notobatú takin i Allah inta mobanar bo umuran nobiag notobatú takin i Adí-Nea ki Yesus Kristus. Naadon in ki Allah inta mobanar, bo naadon in kobiagan inta mopia bo mononoi.

YOHANES 2 1:7

Tanaa mako in nobayongdon kon dunia naa in intau inta motundú kon diá totuu. Mosia tua in intau inta diá mopirisaya kon ki Yesus Kristus namangoidon in dunia naa saḷaku intau. Intau natua i mongouboḷ, bo saturu i Kristus.