HOSEA 9:7 - Alkitab Singog In Mongondow Masa In Tanaa

⁷ Noiangoidon in wakutunea pohukuman, wakutu motarima kon tontuḻínea kon bayongan in oaid. Israel in mokonanambí kon tua! Moiko in moguman, “Nabi inta kinawasa in roho tanaa in dondunguḷ! Nobundai in sia!” Moiko in noguman natua sin moiko in doí totok kon inakó bo dosamu in totuu moḷoben.

HOSEA 9:7 Iomraidhean Croise

DATU MITA 2 9:11

Ki Yehu in buidon minayá kon yobayatnea mita, bo noḻibó in mosia, “Onu in habar? Onu in inangoi in intau nobundai tatua kon inimu?” “Uḻe, kinotaauandon monimu,” tubag i Yehu.

YESAYA 10:3

Onu in pomiaan monimu kon singgai ki Allah mohukum kon i monimu? Onu in aidanmu kon dodai in Sia mopoangoi in anib nongkon ḻipú inta moyayú? Ki ine in pokituḷungan monimu? Kon onda in pobunian monimu kon kaoyúonanmu tatua?

YESAYA 26:11

Tuhan, Iko in nogoḷatdon mohukum kon musung-Mu mita, táe diábí kinotaauan monia. Pomayádon mako mosia in mooyá in mokoontong kon tabi-Mu kon umat-Mu. Pomayádon mako modait in mosia moyopú pongin hukuman inta ain pinopooḷat-Mu mako kon i monia.

YESAYA 34:8

Tuata in wakutu i Tuhan moduḷu kon Sion bo motuḻí kon musung-Nea mita.

YESAYA 44:25

Akuoibí naa inta noḷamboi kon toḻindap in mononoḻindap, bo inta nopoyambá kon mogogoiní mita. Tosingogon mita in intau mobijak binayowan-Ku, kabijaksanaan monia binaḻí-Ku kabodokan.

YEREMIA 10:15

Berhala mita tatua diá koboḻi, patusbí in singkuḻeon bo poompáanmai. Aka moiangoi in wakutunea mosia in moyopúbí.

YEREMIA 11:23

Akuoi in nonantúdon kon wakutunea mopoangoi in bodito kon intau mita in Anatot, bo aka moiangoidon in hukuman kon i monia tua yo diábí tobatúmai in kotaḻiban.”

YEREMIA 16:18

Dosa bo aid monia moraat in tuḻían-Kubí pongin hukuman kodua noguntuḷ, sin mosia in noponajisdon kon butá-Ku takin berhala mita. Berhala mita tatua in diábí konyawa naonda bo mayat.”

YEREMIA 23:13

Dosa in nabi mita in Samaria ain inontong-Ku. Mosia in nosingog podoyon kon tangoi i Baal, bo mopoḷaḻe kon Israel, umat-Ku.

YEREMIA 25:14

Aid mita in intau in Babel in tuḻían-Kubí; mosia in tonggataanbí in datu mita moḷoben bo in bangusa mobayong.’ ”

YEREMIA 29:26

“Ki Tuhan ain noduí kon inimu nobaḻí imang nomaḷui kon i Yoyada, bo tanaa ikodon in pojabat inta moḷantu-ḷantud kon Baḷoi i Tuhan. Oaidanmu in momarenta sinbá bayongan intau nobundai inta tumangoi nabi, sinokig in rante uatoi kon sigogownea.

YEREMIA 46:21

Nodapot in tontara mita inta sinoko tondanannea in diádon mokopongonu nádon ki adí in sapi inta noiḻiudon in ḷongó. Mosia in diádon mokotongod. Komintan momurow bo moḷagui sinbá mosaḷamat. Singgai pohukuman kon i monia in noyaputdon; wakutuneadon mosia koantugan in bodito.

YEREMIA 6:14

Kekeb mita in umat-Ku inanggap monia in kekebbí mointok. ‘Ah, diábí nongonu,’ guman monia, ‘komintanbí mopia bo moodom.’ Bokaka totokbí in diá.

YEREMIA 8:11

Kekeb mita in umat-Ku inanggap monia tongábí kekeb mointok. ‘Ah, diábí nongonu,’ guman monia, ‘komintanbí mopia bo moaman.’ Bokaka totokbí in diá.

OMBAḶ 2:14

Inta pinotaau in nabi mita kon inimu, tongábí tompobaḻik bo uboḷ komintan. Mosia in diábí kon dodai in onda in nobuká kon dosamu, manangka intua iko in diábí notobat. Noyotoḻikud kon tua yo mosia in tongábí mopotaau kon inimu in tosingogon mita uboḷ inta mokosanang.

YEHEZKIEL 13:10

Ei nabi mita inta deeman totuu nabi! Moiko in nopoḷaḻedon kon umat-Ku pinongin tosingogon kon bayongan in yagi-yagi moaman bo notoinutdon. Bokaka diábí! Umat-Ku in noposindogdon in dinding tela inta noḷungkag in pinogogaid, onda intua namangoi in moiko bo nopocet in kapur.

YEHEZKIEL 13:3

Ki Tuhan Inta Totok in moḷantud in noguman, “Moboditodon in nabi mita inta bodok tatua! Toḻindapnea in tongábí nouḻínea kon onu in irainea tontaní bo oontongonnea in diábí totuu.

YEHEZKIEL 25:17

Hukumon-Kubí in mosia kobogaton totok bo mopoaid in yaat in gina-Ku modapot in moorop. Aka konanamandon monia in torú-Ku, yo kotaauandon monia kon Akuoibí in ki Tuhan.”

YEHEZKIEL 38:23

Natuata in aid-Ku moponiata kon bayongan in bangusa kon Akuoi in moḷantud bo motusi. Dá kotaauandon monia kon Akuoibí in ki Tuhan.”

YEHEZKIEL 9:10

Akuoi in diá bidon motabi kon i monia. Poaid-Kubí kon i monia in onu inta ain pinopoaid monia kon intau ibanea.”

HOSEA 14:1

Samaria in mustibí hukumon popisí in nomarontak nonayow kon i-Nakó. Rayatnea in matoi kon poparangan; adí mita mointok monia in ḻintogon, bo bobay mita sidia in botakon in siannea.”

HOSEA 5:9

Israel in moyopúbí, sin noiangoidon in wakutunea mohukum kon inia. Indongogai, ei rayat in Israel, tua in notantúbí kon mobaḻí.

HOSEA 8:13

Mosia in moibog moposumba in kuruban kon i-Nakó, bo mokaan kon ponoyá pinokuruban tatua, táe Akuoi ki Tuhan, in diábí moibog kon kuruban mita tatua. Tanaa in toropon-Kudon in dosa monia bo mohukum kon i monia popisí in dosa mita tatua; Akuoi in mokidiabí bui kon i monia pobui kon Mesir!

HOSEA 9:8

Ki Allah in nopotabá kon inakó saḷaku nabi sin mopotoingat kon i monimu umat-Nea, táe kon ondaka in bayáanku, moiko in moḷongasi monompotait kon inakó naonda bo ḷagapan. Kon butá i Allah tontaní, kami nabi mita in sinaturubí in rayat.

AMOS 8:2

Ki Tuhan in noḻibó, “Onu in inontongmu, Amos?” Akuoi in notubag, “Karansi uatoi tobatú inta kon bonu-bonu in bungai in ayop inta ain nongogurang.” Ki Tuhan in noguman, “Wakutunea in nogurangdon kon umat-Ku Israel. Akuoi in diá bidon momaḷui bui kon tomayá-Ku bo notantúbí kon mohukum kon i monia.

MIKHA 2:11

Koibog monimu in nabi inta moibog monguboḷ bo mongakaḷ poḷat monoḷanow kon moiko in mokouḻíbí kon anggur bo oinumon inta mokoḷoḷangu inta mobayong totok.”

MIKHA 7:4

Inta totok in mopia bo inta totok in motuḻid nongkon i monia naonda bo bonganga inta diá in mangaḻenea. Noidapotdon in wakutunea ki Allah in mohukum kon i umat-Nea ná inta ain pinotoingat-Nea kon i monia pinongin in nabi-Nea mita. Tanaa in nomukádon in kinotombaukan kon sigad monia.

ZEPANYA 3:4

Nabi-Nea mita diábí in ibog monotaaumai bo diá motaau pirisayaanmai; imang mita noponajisdon kon onu inta ain sinondí ogoi kon i Tuhan bo nopoyotutui in hukum mita i Allah sin potayakan kon kauntungan monia tontaní.

MARKUS 3:21

Intau mita in noguman, “Nobundaidon in Sia nion!” Bo naonda in kinodongogan in ginaḷum-Nea in singog monia tua, binayádon monia ginamá in ki Yesus.

LUKAS 21:22

Sin singgai mita tatua in ‘Singgai bidon Pohukuman’, sinbá mobaḻídon onu inta ain pinais kon bonu in Buk Motusi.

KORINTUS 2 5:13

Sin aka kami bo ná diádon moratak, yo tua in lantaranbí kopontingan i Allah, táe aka kami bo moratak in koontongan, yo tua in lantaranbí moiko.

WAHYU 16:19

Kotá inta moḷoben tatua nobotak nosilai toḷu nosilai, bo norimumudon doman kotá mita in bayongan negara kon dunia inta diá nonotaau kon i Allah. Bo kinotoropandon i Allah in Babel, kotá inta moḷoben tua. Bo pinoinumdon i Allah in anggur nongkon palo anggur i Allah – tuata anggur torú-Nea inta moḷoben totok.