HOSEA 7:1 - Alkitab Singog In Mongondow Masa In Tanaa

¹ Ki Tuhan in noguman, “Pomuḷoi in Akuoi moibog monompia kon umat-Ku Israel bo mopoyobui in kaadaan monia, inta ontongon-Ku in tongábí aid moraat bo dosa monia. Mosia in mosiakaḷan, tumuot in mosia kon baḷoi in intau bo monakow, bo mosia in mogagow kon daḷan mita.

HOSEA 7:1 Iomraidhean Croise

YESAYA 28:1

Moboditodon in kotá inta kino ibo-ibog in intau mita moḷoḷoḷangu in Israel! Kogaganea in mopopatdon naonda bo bungang inta noḷaḷow kon tudu in uḷu monia. Moboditodon in kotá inta noḷantud monik kon yuak in ḷopá inta noḷumbá, inta kinosanang in intau mita inta nongoḷoḷangudon totok.

YESAYA 59:12

Totuu mobayong in aid moraat nami kon ini-Mu; dosa mita nami mopotaḷá kon inami. Kami in totu-totuudon nonotaau kon aid nami moraat; bo nonotaau kon dosa mita nami.

YESAYA 59:13

Kami in nonguboḷdon bo nomarontak kon i Tuhan, bo doí dumudui kon i Allah nami. Kami in nondorotdon kon intau ibanea bo nobaḷui in raian; raian nami in noiḷaḻedon, bo tosingogon mita nami in uboḷ.

YESAYA 59:14

Hukum inta moadil in pinosídon, bo inta moadil in pinoyayúdon. Aid motuḻid in diádon pinandungmai kon tampat mita poyoyodungkuḷan, bo gina motuḻid in diádon pinandungmai.

YEREMIA 51:9

Intau ango-angoi inta nogutun kon tua in nosigumanan, ‘Kita in noḷongasidon notuḷung kon Babel, táe nolatdon! Maníka taḷaandon naton in butá tanaa bo mobui kon butá naton tontaní. Ki Tuhan in nohukumdon kon Babel totok in mobogat, bo norimumudon komintan.’ ”

YEHEZKIEL 16:46

Ki guya-guyangmu in ki Samaria kon utuan takin bayongan in ḻipúnea. Bo ki ai-aimu in Sodom kon toḷatan takin bayongan in ḻipúnea.

YEHEZKIEL 23:4

Guya-guyang ki Ohola in tangoinea, sia in nobaḻí lambang in Samaria. Ki ai-ainea in ki Oholiba in tangoinea; sia in nobaḻí lambang kon Yerusalem. Akuoi in notonibuḷoi i nayadua tua bo nokouḻí kon adí kon inayadua.

YEHEZKIEL 24:13

Ei Yerusalem, oaidmu mita inta mokotor noponajisdon kon awakmu. Sinungkuḷan-Kudon dinaritan in iko, táe diá in mangaḻenea, sin iko in umuranbí nonajis. Iko in diábí modarit bui modapot in poḷuaion-Ku in torú-Ku kon inimu.

HOSEA 10:5

Intau inta nogutun kon kotá in Samaria in moondok; mosia bo imang mita inta mogundoi kon sapi buḷawan kon Betel tua in moajarbí in gina bo mongombaḷ popisí in bayongan inta kogaga in berhala monia tatua in noinggamádon.

HOSEA 11:8

Ki Tuhan in noguman, “Ei Israel, diábí doman inta pomayá-Ku mako in iko andeka taḷaan-Ku mako natua. Degá iko in yopúon-Ku naonda bo Adma? Andeka pomiaan-Ku naonda bo Zeboim? Gina-Ku in diábí modapot in mogaid kon natua, sin tabi-Ku in moḷoben totok kon inimu!

HOSEA 12:1

Ki Tuhan in noguman, “Bangusa in Israel iḻimibu kon i-Nakó pinongin uboḷ bo tompobaḻik; bangusa in Yohuda umuran moḷawang kon i-Nakó, ki Allah Inta Mokudus bo inta mosatia.

HOSEA 12:2

Bayongan yagi-yagi inta pinomia in intau in Israel nongkon doḷo-doḷom nodapot in doḷom diá in mangaḻenea bo sipatnea in moyopúbí naonda bo tompot nongkon pomukaan. Aid motombogá bo moḻingá kodugang-kodugang kon sigad monia. Mosia in nomia kon dodandian noyotakin i Asyur bo nodia kon ḷana minayá in Mesir nobaḻí tomponuot yoyobayatan.”

HOSEA 4:17

Umat in Israel ain nongibog totok kon berhala. Tuamai in pomayádon mako in mosia.

HOSEA 4:2

Mosia in mongibot, táe diábí totuuon monia; mosia in monguboḷ, moḻimod, monakow bo monuaḻing. Aid moraat modugang, bo poḻimodan in moyo-moyodudui.

HOSEA 5:1

Ki Tuhan in noguman, “Indongogaidon, ei imang mita! Taridiaidon, ei intau in Israel! Indongogai, ei intau mita buí in datu! Hukuman in pinoḷabúdon kon i monimu. Sin, mustibí mokopoadil in moiko in monisig, táe noyotuuidon, moiko in nobaḻídon ná poyogaḷap kon Mizpa, naonda bo potait kon Buḷud in Tabor,

HOSEA 6:4

Táe ki Tuhan in noguman, “Ei Israel bo Yohuda! Onu in musti aidan-Ku kon i monimu? Tabimu kon i-Nakó in motoyongbí moinggamá naonda bo topuot andeka oḷú doḷo-doḷom.

HOSEA 7:13

Mobodito in mosia, sin mosia in nonaḷámaidon kon i-Nakó. Mosia in morimumudbí sin nomaḷawangdon kon i-Nakó. Akuoi in moibogbí moposaḷamat kon i monia, táe ibada monia kon i-Nakó in tongábí ubo-uboḷ ibada.

HOSEA 8:5

Akuoi in doíbí kon sapi buḷawan inta sinumba in intau in Samaria. Akuoi in sinumorúbí totok kon i monia. Modapot in toonu in mosia in umuran mopokotormai kon awak pongin mosumba kon berhala?

HOSEA 8:9

Naonda bo keledai ḻindong inta iḷumoḷongon, natuata in intau mita in Israel dinumudui kon ibog mita monia tontaní. Mosia in notayak kon totuḷung nongkon Asyur, bo notaḷui kon yoyobayatan in bangusa mita ibanea.

AMOS 3:10

Ki Tuhan in noguman, “Intau mita tatua nomonu kon komaḻig monia in pakakat mita inta inagow takin aid moḻingá. Nodapot in mosia totokbí in diá mojujur.

AMOS 3:9

Potaaudon in naa kon intau mita inta nogutun kon komaḻig in Mesir bo Asdod, “Poyosipundon kon buḷud mita kon diugmai in Samaria, bo indoiaidon in kotombaukan moḷoben bo pogagowan inta nobaḻí kon tua.”

AMOS 8:14

Intau mita inta nongibot pinodoyon kon berhala in Samaria takin moguman, ‘Podoyon kon dewa in bangusa in Dan’, andeka ‘Podoyon kon i Dewa Bersyeba’ – in moḷabúbí bo diádon mobangon bui.”

MIKHA 6:16

Tua komintan in mobaḻí popisí in moiko dinumudui kon aid moraat i Datu Omri bo i adínea, tuata in ki Datu Ahab. Moiko in dinumudui kon oaid monia. Tuamai in rimumudon-Ku in moiko, bo moiko in poempengon bo singkuḻeon in bayongan in bangusa.”

MATIUS 23:37

“Yerusalem, Yerusalem! Nabi mita iḻimodmu. Totabá mita i Allah inandurmu in batu nodapot in minatoi. Nokakitdon in Akuoi moibog totok mosipun kon i adímu mita naonda bo ki iná in manuk mosipun kon i adínea mita kon koḻikipnea, tongá doí in moiko!

LUKAS 13:34

Yerusalem, Yerusalem! Nabi mita sinokoḻimodmu! Totabá mita i Allah sinokoarab monimu in batu nodapot in minatoi! Aindon kotongonu degá Akuoi in moibog mosipun kon intau mita inta kon kotámu, naonda bo ki iná in manuk mogoob kon i adínea mita, táe moiko in doíbí!

LUKAS 19:42

Bo poḷat nosingog, “Kaasí uḻe, mopiadon totok aka singgai in naa bo kotaauanmudon in onu inta motaau mokopoangoi kon dodamean! Táe tanaa iko in diábí mokoontong.