HOSEA 4:3 - Alkitab Singog In Mongondow Masa In Tanaa

³ Tuamai in butá tanaa in moingkagdon, bo bayongan inta nobiag kon tua in matoidon. Bayongan in mahaḷuk kon ḷangit, kon toba bo kon dagat in moyopúbí.”

HOSEA 4:3 Iomraidhean Croise

YESAYA 33:9

Ḻipú sinaḷáan nobaḻídon noingongow. Kayuon mita in Libanon kinoantugan in takit, bo Ḷopá in Saron inta moḷumbá mobaḻí naonda bo padang gurun. Kon Basan bo kon Buḷud in Karmel daun mita mongototak.

YEREMIA 12:4

Modapot in toonupa in butá tanaa in moingkag, bo moingkag in bonoknea kon batúan in gobá? Ḷagapan bo mahaḷuk ibanea matoi popisí in aid moraat in bangusa nami. Mosia in mosingog kon akuoi in diábí mokoontong kon ukur monia.”

YEREMIA 23:10

Butá naton nopuḻing in intau inta diá mosatia kon i Tuhan. Mosia in nobiag moraat bo noitaḷá in nopomaké in kawasa monia. Popisí in kutukan i Tuhan, bonok kon rawang noingkag bo sinangkub in butá nonogumatoi.

YEREMIA 4:25

Inontongku diábí in intau, ḷagapanpa in nodaitdon iḷumayug.

YEREMIA 9:10

Akuoi, ki Yeremia, noguman, “Akuoi in mongombaḷ bo mononogumatoi sin rawang in bonok kon ḷopá bo kon buḷud mita inta ain noingkag totok bo diádon sinaḻiban in intau. Singog in bobiagon diádon kodongogan, manuk bo mahaḷuk mita ibanea noḷaguidon bo nobuḻi.”

YEREMIA 9:9

Umpaka dá kon bangusa ná tanaa yo diá popoḷabúan-Ku in hukuman inta patus? Tuḻían-Kubí in aid monia, Akuoi, ki Tuhan, ain nosingog!”

YEHEZKIEL 38:20

Bayongan in toyá bo ḷagapan, bayongan in mahaḷuk moḷoben bo mointok, bo bayongan in intau kon dunia naa in mourotbí mako in ondok in tumayow kon i-Nakó. Buḷud mita in motabibí, irib mita in mongoḻitubí bo bayongan in dinding in moobatbí.

YOËL 1:18

Bobiagon mogamui bo mogagawang; diádon in rawang in bonok pongaanannea. Paanan in domba mororiga domandon.

AMOS 1:2

Naa in inta pinoguman i Amos, “Ki Tuhan in noganggor nongkon Tombuḷud in Sion, singog-Nea in modorasing nongkon Yerusalem. Rawang mita in bonok iḷumogat, bonok kon Buḷud in Karmel inimingkagdon komintan.”

AMOS 5:16

Ki Tuhan Inta Totok in Mokawasa in noguman, “Kon daḷan mita in kotá intau in moguang bo mogamui popisí in morobonoḷ in gina. Nodapot in monononggobá mita in tokooiníon sin tumakin mongombaḷ moyotakin in intau mita inta sinokouboḻian moguang kon intau minatoi.

AMOS 8:8

Butá in moḷundanbí, bo bayongan i intau in moondokbí. Sinangkup in butá in modandú bo moḻimbok naonda bo Ongkag in Nil.

NAHUM 1:4

Sia in nongguak kon dagat bo nobaḻí nogiot, bayongan in ongkag iningkagan-Nea komintan. Buḷud in Karmel bo rawang mita kon Basan nobaḻídon noḷogat bo kon Libanon noḷaḷowdon in bayongan bungang.

ZEPANYA 1:3

bayongan in intau bo bobiagon, moitakin doman in ḷagapan bo toyá. Intau moraat in yompaton-Kubí. Bayongan umat intau in yompaton-Kubí, diábí tobatúmai in intau in pomayá-Ku mako in mobiag. Akuoi, ki Tuhan, ain nosingog.

ZAKHARIA 5:4

Ki Tuhan Inta Totok in mokawasa in noguman kon kutukan tatua in popouma kon batúan in baḷoi in mononakow bo baḷoi in intau inta nongibot kon diá totuu. Baḷoi mita tatua in tantú kotugatan in kutukan tatua modapot in mobaḻídon apug mita.”