HOSEA 4:13 - Alkitab Singog In Mongondow Masa In Tanaa

¹³ Kon tampat mita pososumbaan kon berhala inta kon tudu mita in tombuḷud bo buḷud, moiko in moposumba in kuruban, bo motubá kon kamania kon siungon in pangkoi mita in kayu moḷoben inta nongobambar kon tua sin tampat tatua in nooḷom. Táe onu in bungainea? Mongodeagamu mita nobaḻí sundaḷ bo mototakamu mita bobay in nokituaḻing!

HOSEA 4:13 Iomraidhean Croise

DATU MITA 2 17:7

Samaria in noḷabú sin intau in Israel binaradosa kon i Tuhan, Allah monia, inta ain noposaḷamat kon i monia nongkon datu in Mesir bo nodia kon i monia iḻumuai nongkon butá tatua. Mosia in nosumba kon ilah mita ibanea

DATU MITA 2 23:7

Gopot mita kon bonu in Baḷoi Tuhan inta pinaké in sundaḷ mita in kuil sin sumundaḷ mosumba kon dewa, in irimumud. (Kon gopot mita tatua bobay mita nogaboḷ kon didit sin pakéon kon posumbaan kon i Dewi Asyera.)

YESAYA 1:29

Mosia in angoianbí in oyá sin mosumba kon pangkoi mita in kayu bo mopotondí in gobá mita sin ogoi kon dewa mita.

YESAYA 57:5

Moiko in mosumba kon dewa mita koḷumbaan takin mopomayá mako in awakmu dumudui kon ibog kon ḻimonag in pangkoi mita in kayu karamatmu. Moiko in moḷobong kon i adímu mita kon oyuk in ongkag bo kon sigad mita in batu.

YESAYA 57:7

Moiko in mayá kon tudu mita in buḷud sin moposumba in kuruban bo mopoorop in ibog in awakmu.

YEREMIA 2:20

Ki Tuhan in noguman, “Ain noonggot iko in doí mogundoi kon i-Nakó; doí dumudui andeka mosumba kon i-Nakó. Kon bayongan tudu in buḷud inta moḷantud, bo kon siungon in bayongan in pangkoi in kayu inta mobambar iko in mosumba kon dewa mita mopoḷumbá.

YEREMIA 3:13

Akudon kon iko in kotaḷá bo ain nomarontak kon i Tuhan, Allahmu. Akudon kon bayongan siungon in pangkoi in kayu inta mobambar iko in nobogoidon in tabimu kon ilah mita in bangusa ibanea, bo diá dinumudui kon parenta-Ku mita. Akuoi, ki Tuhan ain nosingog.”

YEREMIA 3:6

Kon tungkuḷ in pinomarentaan i Datu Yosia, ki Tuhan in noguman nanaa kon inakó, “Inontongmudon degá in onu inta inaidan in Israel, bobay inta diá motoindudui tatua? Sia in nonaḷámai kon i-Nakó bo sinumundaḷ kon bayongan tudu in buḷud inta moḷantud bo kon siungon in bayongan pangkoi in kayu inta mobambar.

YEREMIA 44:8

Nongonu sin moiko in nogaidbí kon inta mokopomuká kon torú-Ku? Moiko in namangoi bo nogutun kon Mesir, butá inta deeman moiko in kitogi, bo moiko in mosumba kon berhala bo moposumba in kuruban kon dewa mita in butá tatua! Degá moibog in moiko morimumud kon awakmu tontaní sinbá singkuḻeon in moiko in bayongan in bangusa kon dunia bo tangoimu in pakéondon mobaḻí kutukan?

YEHEZKIEL 16:16

Tongosilai in pakeangmu pinakému pinoḷambá kon tampat pososumbaanmu kon berhalamu. Iko in nobaḻí sundaḷ bo nobogoi in awakmu kon bayongan in ḷoḷaki.

YEHEZKIEL 16:25

Iko in nopotaḷuidon in koḷoḷunatmu. Awakmu in pinonotogmudon kon bayongan in ḷoḷaki inta moitaḻib, bo diá mogoga-gogai iko in monuaḻing.

YEHEZKIEL 6:13

Mayat mita in posiraritdon kon sigad in berhala mita bo kon diugmai in mezbah mita, moiukat mako kon batúan in tombuḷud inta moḷantud, bo kon tudu in buḷud mita, kon siungon in pangkoi in kayu inta mobambar bo kon batúan in pangkoi in kayu inta moḷoben; impoḷok mako in singog, kon ondakabí in potubáanmai monia kon kuruban ogoi kon berhala monia. Dá kon batúan in intau monotaaudon kon Akuoibí in Tuhan.

HOSEA 10:8

Kuil mita kon tombuḷud mita kon Betel tampat in intau in Israel mosumba kon berhala, in rimumudon. Dugi bo bonok in mobiagbí kon mezbah monia. Bo mosia in momaḷúbí kon buḷud mita, “Bumbunaidon in kami!” bo kon tombuḷud mita, “Dantugaidon in kami!”

HOSEA 11:2

Táe kokakit-kokakit in oiní-Ku kon i adí-Ku tatua koyayú-koyayú domandon in sia kon i-Nakó. Sia in nodia kon kuruban bo notubá kon kamania kon i Baal bo dewa mita ibanea.

HOSEA 2:13

Akuoi in mohukumbí kon inia popisí in singgai mita inta pinakénea motubá kon kamania kon i Baal, bo mopotaingkat pongin ḷambánea sin momatuk kon intau mita inta kinoibognea, bodongka moḻiong kon i-Nakó totu-totuu. Akuoi, ki Tuhan ain nosingog.”

AMOS 7:17

ki Tuhan in noguman kon ki buḷoimu in mobaḻí sundaḷ kon daḷan mita in kotá, bo ki adímu mita in ḻimodon kon parang. Butámu in silaionbí magí mako kon intau ibanea, bo iko tontaní in matoibí kon butá in intau inta diá nonotaau kon i Tuhan. Intau in Israel in notantú bidon kon akuton pobayá in poḷumbúan, moyayú nongkon butánea tontaní.”