ESTER 6:11 - Alkitab Singog In Mongondow Masa In Tanaa

¹¹ Bo ki Haman in nogamá kon ḷambung bo kabaḷo tatua bo nopopaké kon i Mordekhai. Naonda in ki Mordekhai sinumakoi kon kabaḷo tatua, dinia i Haman in sia pinoḻibu kon rawang in kotá, sindaḷan momaḷú, “Indoiai, nanaa in aid i datu mobogoi in ponghargaan kon intau inta ihoromatnea!”

ESTER 6:11 Iomraidhean Croise

EZRA 6:13

Parenta i Datu Darius tatua in inaidan kinotaridi totok i Tatnai, gubernur in Eprat Toyopan, bo i Syetar-Boznai bo totakin mita monia.

ESTER 6:10

Bo ki datu in noguman kon i Haman, “Koḷamemet, gamádon in ḷambung bo kabaḷo tatua bo ogoidon in bayongan in kahoromatan tatua kon i Mordekhai, intau in Yahudi tatua. Aidaidon ná inta pinogumanmu koina, bo dikabí gaatan in tobatúmai. Sia intua ḻimitú mako kon tayowon in bonawang in komaḻig.”

ESTER 6:12

Nopaḷut mako kon tua ki Mordekhai nobui kon bonawang in komaḻig. Táe ki Haman in iḻimikat nobui. Doí in sia indoian in intau sin nooyá totok in sia, dá inoḻingoianneadon in pogotnea.

ESTER 8:15

Nopaḷut mako kon tua ki Mordekhai in nonaḷámaidon kon komaḻig takin nogiḷambung in ḷambung intau moḷoben inta nobidu bo nobudó, jubah nokamumu nongkon lenan moaḷus bo mahkota buḷawan inta mogaga totok. Intau kon kotá in Susan monggoḷakap mita sin noḷunganga in gina monia.

ESTER 9:3

Nodapot in bayongan intau moḷoben in propinsi, gubernur mita, bupati bo pojabat mita in dodatuan motongod kon intau in Yahudi sin komintan moondok kon i Mordekhai.

AMSAL 27:18

Ki ine in monompia kon pinomuḷa, yo mokaanbí kon bungainea. Bobantung in kotabibí doman aka motabi kon i tuangnea.

YESAYA 60:14

Adí mita in intau mita inta nondorot kon inimu in mamangoibí tumungkud, inta nokoimontandon noningkuḻe kon inimu in mohoromatbí, iko in tangoionbí ‘Kotá in Tuhan’, ‘Sion, Kotá i Allah Mokudus in Israel’.

LUKAS 1:52

Datu mita in dunia naa poponagon-Nea mita nongkon tampat pomomarentaan monia, táe intau mita inta moompá in dodia in poḷantudon-Nea.

WAHYU 3:9

Toropdon in naa: Intau mita inta ain nobaḻí umat in Ibilis tua, in intaubí mita mongouboḷ inta mongaku intau mita in Yahudi bokaka deemanbí. Mosia tua in aidan-Kubí sahingga in mosia mamangoi tumungkud kon tayowonmu. Bo kotaauandon monia kon kotabi-Kubí in moiko.