ESTER 3:12 - Alkitab Singog In Mongondow Masa In Tanaa

^12-13 Dá kon singgai in impuḷú botoḷúnea buḷan imitánea, ki Haman in nogoiní kon momomais mita i datu. Mosia in pinotabánea nomais kon surat podudui in bayongan inta pinarentanea, bo surat tatua in pinaisdon kon bonu in bayongan in singog inta pinaké kon dodatuan tatua. Surat tatua in pinais pinodoyon kon tangoi i Datu Ahasyweros bo cinapan in sisingnea, bo ḷagi pinoki dia kon pongawasa, kon gubernur bo intau moḷoben kon bayongan in propinsi. Tombonunea in parenta inta noguman kon tanggal in impuḷú botoḷúnea kon buḷan Adar, bayongan in bangusa Yahudi, pinomayá inta noguyang andeka inta noguod, pinomayá bobay andeka mongoadí, in mustibí ḻimodon diábí in taḻiban bo kapunyaan monia in gamáan.

ESTER 3:12 Iomraidhean Croise

DATU MITA IMITÁNEA 21:8

Dá ki Izebel in nomais kon surat pinodoyon kon tangoi i Ahab bo cinapan in cap i datu. Surat tatua in pinoki atodnea kon itoi mita bo intau mita inta duduianmai kon ḻipú in Yizreel.

EZRA 8:36

Bo surat inta inogoi i datu kon i monia, pinotaau kon gubernur mita bo kon pojabat in propinsi Eprat Toyopan. Dá pojabat mita tatua in nobogoi in totuḷung kon rayat sinbá mosia in motaaudon umuran moibada kon i Tuhan.

ESTER 1:22

Sia in nokidia in surat parenta kon bayongan in propinsi in dodatuan, kon bonu in tosingogon bo pais kon batúan in propinsi. Parenta tatua in noguman kon bonu in batúan motoḷuadí, buḷoibí ḷoḷaki in musti mobaḻí tongguḷu, bo inta patus momontow kon tosingogon.

ESTER 3:11

Guman i datu kon inia, “Bangusa tatua bo doitnea doman in ogoiku kon inimu. Aidaidon onu inta kainimu in mopia aidan kon i monia.”

ESTER 8:2

Ki datu in noḷongkut kon sisingnea inta ain ginamánea bui kon i Haman bo inogoinea kon i Mordekhai. Bo ki Ester in noduí kon i Mordekhai nobaḻí intau inta kitogi totaau kon kapunyaan i Haman.

ESTER 9:27

nokopopisídon kon mosia in nogaid kon atorang tobatú kon i monia tontaní, kon buí monia bo kon bayongan in intau inta dumugang agat in intau in Yahudi. Podudui in atorang tatua pomuḷoi in taong mosia in mustibí momia kon rame in doyowa nosinggai inta ain sinantú i Mordekhai.

DANIEL 3:10

Ki Tuangku tontaní ain nopoḷuai in parenta kon naonda in pakakat mita in musik posingogon, bayongan in intau musti dumokó bo mosumba kon patong buḷawan tatua,

DANIEL 6:12

Naonda in musung mita i Daniel nokoontong kon inia koyogot in nosambayang kon i Allahnea,

DANIEL 6:15

Nokodongogmai kon tua noajar bo nohawatir in gina i datu, dá notayak in sia kon daya sin moposaḷamat kon i Daniel. Nodapot in ḷoḷabungnea ki datu umuranpa doman moporai-raimai.

DANIEL 6:25

Onda intua ki datu nomarenta kon intau sinbá modomok kon intau mita inta ain nopongadu kon i Daniel. Bo mosia takin ki adí mita bo ki buḷoi mita monia pinogonag kon bonu in angob in singa tatua. Diápa nodapot in mosia kon apad in angob tatua, singa mita tatua ain nodomok kon i monia poḷat nomutuk kon tuḷan mita monia.

DANIEL 6:8

Kami komintan in nonompia kon dodatuan i Tuangku, pinomayá pongawas mita, gubernur mita, oḻit mita in gubernur bo pojabat mita inta ain notobatú kon gina kon bá ki Tuangku mopoḷuaidon in surat parenta inta musti duduian totu-totuu. Ki Tuangku in musti momarenta sinbá kon bonu in toḷu nopuḷú nosinggai diábí tobatúmai in intau in ogoi mopoyaput in oigum kon dewa andeka intau, koḻikudbí in kon i Tuangku tontaní. Ki ine in ḻimimpat kon parenta tatua yo pogonag kon bubú in singa.