DANIEL 9:18 - Alkitab Singog In Mongondow Masa In Tanaa

¹⁸ Indongogaipa kaasí in kami, o Allah, ḷongowaipa in kami bo taridipa kaasí in roriga nami takin kinogoguyaatan in kotá inta sinangoi in tangoi-Mu. Kami in nosambayang kon ini-Mu deemanbí popisí in aid mita nami mopia, táe popisíbí in Iko in totok kototabi.

DANIEL 9:18 Iomraidhean Croise

DATU MITA IMITÁNEA 8:29

Poigumon mako singgai doḷom Iko moḷukad kon baḷoi tanaa inta ain piniḻí-Mu nobaḻí tampat pososumbaan kon ini-Mu. Igumon mako nongkon tampat pogogutunan-Mu kon soroga Iko mokidongog bo mongampung kon inakó takin umat-Mu aka kami mamangoi tumayow kon baḷoi tanaa bo mosambayang kon ini-Mu.

DATU MITA 2 19:16

Tuhan, indoiaipa kaasí in onu inta koyogot in nobaḻí kon inami. Indongogaipa kaasí in singkuḻe i Sanherib kon ini-Mu, o Allah inta nobiag!

MAZMUR 116:1

Akuoi in moibog kon i Tuhan, sin inindongogan-Nea in akuoi bo nonaridimai kon oigumku.

MAZMUR 25:6

Toropdon in kopopia bo tabi-Mu, o Tuhan, inta pinoontong-Mu nongkon dungkuḷ.

IḶUAIAN 3:7

Bo ki Tuhan noguman, “Inontong-Kudon in roriga in umat-Ku kon Mesir, bo dinongog-Ku domandon in mosia mopoigum sin poḷúat nongkon pinononggataan kon i monia. Ain bidon kinotaauan-Ku in roriga monia.

YESAYA 37:17

Tuhan, indoiaipa kaasí in onu inta koyogot mobaḻí kon inami. Indongogaidon in bayongan singkuḻe i Sanherib kon ini-Mu, Allah inta nobiag.

YESAYA 43:7

Sin mosia komintan ain inoiní pinodoyon kon tangoi-Ku. Mosia in binaḻí-Ku sin mohoromat kon i-Nakó.”

YESAYA 64:12

Iko in nokoontong kon tua komintan, o Tuhan, umpaka dá Iko in tongábí kibio-biómai? Eta degá tongádon pomayá-Mu mako in kami mobaba kon roriga mobogat totok?

YESAYA 64:6

Kami komintan in intaubí mita inta nonajis, nodapot in aid nami inta mopiapa in diá nodarit bo nokotor. Kami in moputúdon popisí in aid nami moraat naonda bo daun noingkag pinoḷayug in tompot.

YEREMIA 14:7

Umat-Ku nokuani, ‘Tuhan, umpaka dosa nami mopotaḷá kon i nami tongá tuḷungaipa in kami podudui in dandi-Mu Iko in nopobui-buimaidon in sinaḷáan nami; totuu, kami in binaradosa kon ini-Mu.

YEREMIA 14:9

Nongonu sin Iko in naondabí bo intau inta notoboḻingo; naonda bo pahlawan inta diá mokotuḷung? Táe notantúbí kon Iko in naa kon yua-yuak nami, Tuhan! Kami in umat-Mu, dikabí taḷaan-Mu in kami!’ ”

YEREMIA 15:16

Iko in nosingog kon inakó, bo akuoi in nokidongog kon bayongan in tosingogon-Mu. Akuoi naa in Iko in kitogi, o Tuhan Allah Inta Totok in mokawasa, tuamai in tosingogon-Mu mita in mokosanang bo mokoḷunganga kon inakó.

YEREMIA 25:29

Akuoi in momangkoidon kon porimumudan tatua nongkon kotá-Ku tontaní. Dika modapot in mosia in moguman kon mosia in diábí hukumon. Mosia in notantú bidon kon hukumon sin Akuoi in mopoangoibí in parang kon bayongan in bangusa kon sinangkub in dunia. Akuoi, ki Tuhan Inta Totok in mokawasa, ain nosingog.

YEREMIA 36:7

Dika-dika bo popisí in nokodongogdon bo mosia in mosambayangdon kon i Tuhan, bo mogogaidon in mogaid kon inta mongoraat. Ki Tuhan in sinumorú totok kon i monia bo nonindoyó kon i monia.”

YEREMIA 37:20

Tanaa, Tuang datu inta momulia, indongogaipa kaasí in oigumku tanaa. Dikadon pokidia bui i Tuang datu in akuoi kon ponjara kon baḷoi i Yonatan tua, sin matoi in akuoi kon tua.”

YEHEZKIEL 36:22

Manangka intua, potaaudon in onu inta poguman-Ku, ki Tuhan Inta Totok in moḷantud kon bangusa in Israel, ‘Onu in pomiaan-Ku kon singgai moiduduimai deemanbí popisí in moiko, ei intau mita in Israel, táe popisíbí in tangoi-Ku inta motusi, inta ain kinotor monimu kon ondaka in bayáan monimu.

YEHEZKIEL 36:32

Toropdon ei Israel, kon tua komintan i aidan-Kubí táe deemanbí popisí in moiko. Moiko in mustibí mooyá bo moempeng popisí in dodiamu. Akuoi ki Tuhan Inta Totok in moḷantud ain nosingog.’ ”

DANIEL 9:7

Oo Tuhan, aid-Mu umuranbí moitombutung bo moadil, táe kami in umuranbí mokopoangoi kon oyá kon inami tontaní, tuata in kami inta nogutun kon Yudea bo kon Yerusalem bo bayongan in intau tongobangusa nami inta ain pinorangkap-Mu kon butá mita inta nongoyayú bo inta nongodiug popisí in mosia diá motoindudui kon ini-Mu.

PINOGIAPAN 6:27

Bo ki Tuhan noguman, “Aka mosia monangoi kon tangoi-Ku sin momarakat kon bangusa Israel, yo barakatan-Ku in mosia.”