DANIEL 6:4 - Alkitab Singog In Mongondow Masa In Tanaa

⁴ Bo noniata magí oaidan i Daniel in mopia-pia nongkon pogogaid in gubernur mita bo pongawas mita ibanea. Tuamai in ibogon i datu sia duíon mobaḻí pongawasa kon sinangkub in dodatuan.

DANIEL 6:4 Iomraidhean Croise

KINOBAḺIAN 41:38

Bo ki datu in noguman kon i monia, “Diá bidon kita mokouḻí kon intau ibanea inta ná ki Yusup naa, sin sia kinawasa in Roho i Allah.”

KINOBAḺIAN 43:18

Naonda in mosia dinia sinumuot kon baḷoi Yusup, mosia inagían in ondok bo norai, “Kita in dinia namangoi kon naa, popisí in doit inta nouḻí naton kon bonu in karong naton kon tungkuḷ in kita namangoi koḻipod. Mosia in daḻídon modomok kon inaton, bodongka gamáan monia in keledai naton bo kita baḻíon ki ata monia.”

AMSAL 29:27

Intau mopia in diábí mopia in ginanea kon intau moraat; intau moraat in doíbí kon intau mopia.

MOHOHUTUBA 4:4

Kinotaauanku doman kon intau in totokbí in moḷongasi mogaid, tongá popisí in mointoi in mokoontong kon bungai in siniḷopían in topodiugnea. Tua komintan diá in mangaḻenea naonda bo moḷongasi modomok kon tompot.

YEREMIA 18:18

Intau in moguman, “Igai moyopopog in kita moḷawang kon i Yeremia. Deemanbí tongá sia in motaau mosingog kon i Allah. Umuranbí oyúon in imang inta motaau mobogoi in topotundú, oyúon in intau mobijaksana in motaau mobogoi in tonggina; bo oyúon in nabi in motaau mopotaau kon i naton in koyow mita nongkon i Allah. Igai pongaduon naton in sia kon pongadilan bo diádon mokidongog kon tosingogonnea mita.”

YEREMIA 18:23

Táe iko, Tuhan, nonotaau kon bayongan inta sinomayá monia sin moḻimod kon inakó. Tuamai, dika mongampung kon i monia; dika momopat kon taḷá monia. Bongkugdon in mosia modapot in moḷabú. Aidaidon kon i monia podudui in torú-Mu.”

YEREMIA 20:10

Kodongogan in intau moyogombong kon bayongan in tampat, “Ondok in mongawasa! Igai pongaduon in sia kon i inta nongawasa!” Nodapotbí in bayongan in topotakinku modagin mogoḷat mako kon koḷabúanku. Guman monia, “Degá pongin dondouḷug, kotaḷowan in sia, sinbá motaaudon in kita motuḻí kon yaat in gina kon inia.”

YEREMIA 29:7

Pogaidon sinbá motompia in kotá mita inta pinoḷumbúan-Ku kon i monimu. Posambayangdon kon i-Nakó sin kopontingan in kotá mita tatua, sin aka kotá mita tatua mobiag mooyúon, yo moiko in mobiagbí doman mooyúon.

DANIEL 3:8

Tongonumai in intau in Babel nomaké kon kasampatan tatua sin mopobodito kon intau in Yahudi.

DANIEL 5:12

Sia diá in poḻiuan kopopandoi bo kobobijaksana bo motaau domandon totok in moginsilang kon mangaḻe in togoindop, mobuká kon onu inta noibuni bo moguman kon onu mita inta mororiga raion. Tangoinea in ki Daniel, táe dinonoi i datu ki Beltsazar in sia. Oiní in sia. Sia in mopotaaubí kon i Tuangku onu in mangaḻe in pais tatua.”

DANIEL 6:22

Bo kinodongogandon in tubag i Daniel, “Mobiagdon in ki Tuangku modapot in mononoi!

MATIUS 26:4

Mosia in noyosingog kon naonda in pododomok kon i Yesus bo poḷat moḻimod kon i-Nia.

MATIUS 27:18

Ki Pilatus in noḻibó natua sin kinotaauanneadon kon dinia mangoi monia in ki Yesus bo pinosarakan popisíbí in mosia mointoi kon i-Nia.

LUKAS 20:20

Mototundú mita kon agama bo imang mita itoi umuran monaridi mako kon i Yesus. Kon tua mosia in nonondan kon tobatú intau inta mayá kon i Yesus bo ki ubo-uboḷmai ná intau mopia. Mosia in nokiḻibó in soaḷ inta inanggap monia motaau kouḻían monia kon taḷá i Yesus, sahingga oyúondon in baḻíon monia dodoyonan podomokan kon i-Nia bo posarakan kon i gubernur.

LUKAS 20:26

Kon tayowon intau moantó tatua, mosia in diábí nokouḻí kon taḷá i Yesus tobatúpamai. Sedang bo tongábí noherang totok in mosia in nokodongog kon tubag-Nea tatua, dá dongkadon kibio-biómai in mosia.

LUKAS 22:2

Imang mita itoi bo mototundú mita kon agama norai mongo naonda in poḷoḻimod monia kon i Yesus, táe umuni-uni sin moondok kon intau moantó.

YOHANES 19:4

Nopaḷut mako ki Pilatus iḷumuai bui bo noguman kon intau moantó kon tua, “Indoiai! Diniakudon in Sia kon inimu, sinbá kotaauan monimu kon diábí in Sia kinouḻíanku kon tobatúmai in taḷá-Nea.”

KORINTUS 2 11:12

Onu in pinomiaku tanaa, tantúkubí doman aidan, sinbá diá in dodoyonan in “rasul mita” tatua in dumodia bo moguman kon mosia in mogaid naonda bo kami.

PILIPI 2:15

Sin aid natua in mopoontongbí kon moiko in ki adí mita i Allah inta diá kotaḷá, inta nobiag kon yua-yuak in intau mita masa naa inta gina diá mongotuḻid bo nobiag diá mongotoḷutui. Sahingga in moiko umuran monimbayag kon yua-yuak monia tua, naonda bo tundi mita kon ḷangit, táe dika taḷaan in pirman i Allah inta nobaḻí dodoyonan in kobiagan, sinbá oyúon in mokosanang kon ginaku aka moiangoidon singgai i Kristus, sin moniatadon kon onu inta iramujiku tua in komintanbí nobaraguna bo oyúon in mangaḻe irorigaankumai tua.

TIMOTIUS 1 5:14

Tuamai ibogonku, intau boba-bobay inta nomudapa buidon mokipobuḷoi, sinbá buidon mokouḻí kon adí kon tonibuḷoinea, bo tongádon in sia monompia kon i adínea inta kon bonu in tonibuḷoinea tatua, sinbá intau mita inta mosaturu kon inaton in diádon moporomu-romúmai kon tangoi naton.

TITUS 2:8

Kopiaan in mosingog, dika mongonguman kon uboḷ, sinbá saturumu mita in mooyá sin diá in soaḷ mita inta diá mopia in motaau monia posingog kon i naton.

PETRUS 1 2:12

Kopiaan in oaidmu kon sigad in intau mita inta diápa nonotaau kon i Tuhan, sahingga in aka singogon monia kon iko in intau moraat, yo koontongandon monia in oaidmu inta mopia, dá modayowdon in mosia kon i Allah kon singgai koangoian-Nea.

PETRUS 1 3:16

Táe koaḷusbí in pototubag takin horomat. Ginamu in musti totu-totuu motuḻid, sinbá aka poponapudan uboḷ in moiko lantaran nobiag notompia saḷaku dumodudui i Kristus, dá intau inta noponapud in uboḷ tatua kon inimu buibí mooyá tontaní.

HAKIM MITA 14:4

Guranga i Simson diábí nonotaau kon ki Tuhanbí in nopobaḻí kon Simson momia kon natua. Sin ki Tuhan in motayakdon kon kasampatan momarang kon intau in Pilistin. Kon tungkuḷ intua intau in Pilistin nongawasadon kon intau in Israel.

SAMUEL 1 12:4

Intau mita tatua notubag, “Diá, diábí kon dodai in onda ki Amá nonguboḷ andeka noposikisa kon inami; diábí nokoimontanmai in ki Amá in nogamá kon kapunyaan i ineka.”

SAMUEL 1 18:14

Umuran in sia mokoḷapat kon bayongan in oaidannea, sin ki Tuhan in notuḷung kon inia.

SAMUEL 1 22:14

Bo ki Ahimelek in notubag, “Táe kinotaauanku in ki Daud tua in porwirabí i Tuang datu inta totok in mosatia! Sia in nobuḷoi domandon kon i adí i Tuang tontaní, tongguḷu pongawal tontaní i Tuang datu, bo totok in i horomat in bayongan intau kon bonu in komaḻig i Tuang datu.