DANIEL 2:41 - Alkitab Singog In Mongondow Masa In Tanaa

⁴¹ Sioḷ bo gongguyamú in sioḷ in patong inta tongopongkó nongkon butá ḷamentong bo tongopongkó in uatoi tatua, mopoontong kon singgai moiduduimai dodatuan tatua in mosila-silai. Dodatuan tatua oyúon doman in ropotnea sin butá ḷamentong binaukan in uatoi.

DANIEL 2:41 Iomraidhean Croise

DANIEL 2:40

Moiduduimai kon tua momuká in dodatuan inggopatnea inta ná koropot in uatoi. Bo naonda bo uatoi inta mokobutuk bo morimumud kon onuka, natua doman in dodatuan inta inggopatnea tanaa in momutuk bo morimumud kon dodatuan mita tatua.

DANIEL 2:42

Gongguyamú mita in sioḷ inta tongosilai nongkon uatoi bo tongosilai nongkon butá ḷamentong mangaḻenea kon oyúon in tongosilai in inta moropot bo oyúon doman in moyangkó.

DANIEL 7:24

Tungoi mopuḷú tatua in datu mopuḷú inta nomarenta kon dodatuan tatua. Onda intua datu tobatú ibanea in moiangoi; sia in moyoposibí totok in datu mita inta muna, bo sia in monaḷowbí kon datu taya toḷu.

DANIEL 7:7

Kon dodai in akuoi inimindoi mako kon inia, mahaḷuk inggopatnea nomuká. Sia in totok in moropot bo motoyang bo mokokoningkim. Takin ingiponnea mita inta mongoḷoben bo ná kotogat in uatoi, sia in nomutuk bo nokaan kon kokaanonnea, bo noritak kon ki agatnea mita. Noyoposi in mahaḷuk mita inta noiuna sia in kotungoi mopuḷú.

WAHYU 12:3

Bo inontong domandon in tanda mokoherang ibanea kon ḷangit. Oyúon tobatú naga nopura inta totok moḷoben, pitu in uḷunea bo mopuḷú in tungoinea. Pomuḷoi in uḷu pinakéan in mahkota.

WAHYU 13:1

Onda intua akuoi in nokoontong kon tobatú mahaḷuk inta iḷumuai nongkon bonu in dagat, mopuḷú in tungoinea bo pitu in uḷunea. Pomuḷoi in tungoi oyúon in mahkota, bo pomuḷoi in uḷu pinaisan tangoi mita inta pohojat kon i Allah.

WAHYU 17:12

Tungoi mopuḷú inta inontongmu tua in datu mopuḷú inta diápa nomangkoi nomarenta. Táe mosia ogoianbí in kawasa momarenta saḷaku datu moyotakin in mahaḷuk tatua kon bonu in tojam koonggotnea.