DANIEL 2:11 - Alkitab Singog In Mongondow Masa In Tanaa

¹¹ Ki Tuangku in moibog kon onu inta totok in mororiga aidan. Diábí tobatúmai in mokotubag koḻikudbí in dewa mita, táe mosia in diábí nogutun kon sigad in intau.”

DANIEL 2:11 Iomraidhean Croise

KINOBAḺIAN 41:39

Dá ki datu noguman kon i Yusup, “Ki Allah ain nopotaau in naa komintan kon inimu, dá nosimantagdon kon ikobí in mopando-pandoi bo mobija-bijaksana nongkon i inekadon.

KINOBAḺIAN 41:8

Nobangon monik doḷo-doḷom moajardon totok in ginanea, tuamai sia nomarentadon nokioiní in bayongan mososihir bo intau mita inta mopandoi kon Mesir. Bodongka inoumannea in togoindopnea tatua kon i monia, táe diá tobatúmai in kon sigad monia tua motaau moginsilang kon mangaḻe in togoindopnea tatua.

DATU MITA IMITÁNEA 8:27

Tongá, o Allah, totuu degá kon Iko in mogutun kon butá naa? Umpaka ḷangit inta námai tua in kobanat bo kooḷadnea yo diábí tugatan kon ini-Mu, apapa doman baḷoi inta pinosindogku tanaa!

TAWARIKH 2 6:18

Táe, o Allah totuu moibog degá in Iko in mogutun kon dunia naa kon sigad in intau, umpakabí modait in ḷangit yo diábí tugatan kon ini-Mu, apa doman baḷoi ibada inta pinosindogku tanaa!

MAZMUR 132:14

Guman-Nea, “Kon tanaaya in pogogutunan-Ku modapot in mononoi, Akuoi in moibog momarenta kon tampat tanaa.

MAZMUR 68:18

Takin puḷúan ribu in kereta inta moropot ki Allah in sinimindog kon yuak monia kon bonu in kamuliaan-Nea.

IḶUAIAN 29:45

Akuoi in mogutun kon yua-yuak in intau Israel, bo mobaḻí ki Allah monia.

IḶUAIAN 8:19

dapot in mososihir mita tatua noguman kon i datu, “Naa in aidbí i Allah.” Táe ki datu tatua nokopotogatpa doman bui kon gina, bo ná inta ain muna pinoguman i Tuhan, ki datu tatua doí mopandungmai kon tosingogon i Musa bo i Harun.

YESAYA 47:12

Tantúdon aidai in sinotaaumu bo sihirmu, inta mokororiga kon inimu nongkon mongoadíanpamai. Dika-dika tua in baraguna kon inimu, mopogogondok kon musungmu mita.

YESAYA 57:15

Sin nanaa in guman i Allah, Inta Totok in moḷantud bo mokudus, inta nongawasa modapot in mononoi, “Akuoi in nogutun kon tampat inta moḷantud bo inta motusi, táe kon yua-yuakbí doman in intau mita inta moompá in dodia bo inta nomanasaḷ in nogaid kon dosanea mita, sin mopoguḻí bui kon ibog bo kamang monia.

YESAYA 8:18

Naa in akuoi bo adí mita inta inogoi i Tuhan kon inakó. Ki Tuhan Inta Totok in mokawasa inta nomarenta kon Buḷud in Sion, nopotabá kon inami mobaḻí tomponuot kon umat in Israel.

DANIEL 4:4

Akuoi in nogutun bo nobiag takin notompia kon bonu in komaḻigku bo nobiag nooyúon totok.

DANIEL 5:11

Sin kon bonu in dodatuan i Tuangku oyúon in ḷoḷaki tobatú inta kinawasa in dimukud in dewa mita inta motusi. Kon dodai in pinomarentaan i amá i Tuangku, noniatadon kon intau tatua in totok mopandoi, momangaḻe bo kohikmat, inta naonda bo hikmat in dewa mita. Ki amá i Tuangku ki Datu Nebukadnezar ain noduí kon inia nobaḻí itoi in mogogoiní kon dimukud, mototaau bo in intau mita inta mobayong in sinotaau bo inta nonotaau in bobayá in tundi.

PINOGIAPAN 35:34

Donaai moporomúmai in butá inta pinogutunan monimu, sin Akuoi ki Tuhan, bo Akuoi in nogutun kon yua-yuak in bangusa Israel.”

MATIUS 19:26

Ki Yesus inimindoi kon i monia bo nosingog, “Aka podudui in raian intau yo tua in mororigabí aidan! Táe aka kon i Allah, yo mogampangbí totok intua.”

YOHANES 1:14

Pirman ain nobaḻí intau, Sia in nogutun kon sigad naton, bo kita ain nokoontong kon kamuliaan-Nea. Kamuliaan inta sinarima-Nea saḷaku Adí tuḷong i Amá. Pinongin i-Nia tua kita mokoontong kon i Allah bo tabi-Nea kon i naton.

YOHANES 14:17

Sia tua in Roho i Allah inta mopoontong in inta nobanar soaḷ ki Allah. Dunia naa in diá mokotarima kon i-Nia, sin mosia in diá nokoontong ande diá nonotaau kon i-Nia. Táe moiko in nonotaaubí kon i-Nia, sin Sia in mogutun moyotakin monimu bo motobatúbí takin i monimu.

YOHANES 14:23

Ki Yesus in notubag: “Intau inta motabi kon i-Nakó, dumuduibí kon totundú-Ku. Bo ki Amá-Ku in motabibí kon inia. Ki Amá bo Akuoi in mamangoibí kon inia bo mogutun moyotakinnea.

KORINTUS 2 6:16

Onubí in hubungan Baḷoi Tuhan bo baḷoi in berhala? Kita naa in Baḷoi Tuhan inta nobiag. Sin ki Allah tontaní ain noguman nanaa, “Akuoi in mogutunbí kon yua-yuak monia, bo mobiag moyotakin monia. Bo Akuoi in mobaḻí bidon ki Allah monia, bo mosia in mobaḻídon umat-Ku.

WAHYU 21:3

Bo akuoi in nokodongog kon baḷú moropot nongkon tampat pomomarentaan tatua, noguman: “Indoiai! Tanaa mako tampat pogogutunan i Allah kon yua-yuakdon in intau! Sia in mobiagdon takin i monia, bo mosia in mobaḻídon umat-Nea. Bo ki Allah in mogutundon kon sigad monia bo mobaḻídon ki Allah monia.