DANIEL 12:1 - Alkitab Singog In Mongondow Masa In Tanaa

¹ Malaekat inta nogiḷambung in pakeang linen tatua in noguman bui, “Kon dodai intua moitukatbí in malaekat moḷoben ki Mikhael moḷoḷukad kon bangusamu. Onda intua moiangoi in sempo in roriga inta diá in poḻiuan pinangkoi kon oyúondon in bangusa mita. Táe bayongan in intau nongkon bangusamu inta tangoinea pinais kon buk i Allah, in posaḷamatonbí.

DANIEL 12:1 Iomraidhean Croise

MAZMUR 56:8

Oyúon degá in kasaḷamatan kon aid moraat monia? Yopúdon in mosia kon bonu in torú-Mu, o Allah!

MAZMUR 69:28

Biódon mako in taḷá monia modugangdon mobayong; dikabí pobanaron in mosia.

YESAYA 4:3

Bayongan in intau inta kinotaḷáan kon Yerusalem, intau mita inta piniḻí i Allah sin posaḷamaton, tangoidon motusi.

YESAYA 9:7

Ki Tuhan ain nopoḷabú in hukuman kon dodatuan in Israel.

YEREMIA 30:10

Umat-Ku Israel, dikadon moondok! Mogogundoi-Ku Yakub, dika mourot! Moiko bo buímu in posaḷamaton-Kubí nongkon butá moyayú, tampat pinodakopan kon i monimu. Moiko in mobuibí bo mogutun kon butámu takin moaman. Moiko in mobiagbí motomoman; diá bidon in koondok monimu.

YEREMIA 30:7

Singgai motoyang ain noiangoi, singgai inta diá in poḷawangan. Kon i umat-Ku, tua in singgai inta mokoondok; táe mosia in posaḷamaton-Kubí.”

YEHEZKIEL 13:9

Akuoi in mohukumbí kon i monimu, ei nabi mita inta nopotaau kon toḷanow mita uboḷ bo norai kon oontongon mita! Moiko in diá bidon motaau in dumudui mobogoi in kotantúan kon bonu in ponisigan in umat-Ku. Tangoimu mita in ginaresandon kon bonu in tangoi mita in inanakan Israel, bo moiko in diá bidon mobui mangoi kon butámu. Dá kotaauandon monimu kon Akuoibí in ki Tuhan Inta Totok in moḷantud.

YEHEZKIEL 34:24

Akuoi, ki Tuhan, in mobaḻíbí ki Allah monia, bo datu inta ná mogogundoi-Ku ki Daud tua in mobaḻí mongongawasa monia. Akuoi ki Tuhan ain nosingog.

YEHEZKIEL 5:9

Popisí in bayongan in aidmu inta kinodoí-Ku, intaumu mita in hukumon-Ku mobogat ná inta diápa kon dodai in onda in inaidan-Ku bo diá bidon aidan-Ku bui.

DANIEL 10:13

Malaekat moḷoḷukad kon dodatuan in Persia noḷawang kon inakó doyowa nopuḷú bo mita nosinggai in koonggotnea. Bo ki Mikhael, tobatú itoi in malaekat mita, namangoi bo notuḷung kon inakó. Sinaḷáanku in sia kon tua, kon Persia.

DANIEL 11:45

Noidapotbí in sia moposindog in ḷoḷaigan in dodatuannea kon sigad in dagat bo buḷud tampat in Baḷoi Tuhan. Táe onda intua matoi in sia bo diábí tobatúmai in intau in motuḷung kon inia.”

DANIEL 7:10

bo tuḷú ḷumekep nongkon pomomarentaan tatua. Ribuan in intau nogundoi kon i-Nia bo jutaan in intau sinimindog kon tayowon-nea. Onda intua pinangkoidon in sidang pongadilan, bo buk mita in binukádon.

DANIEL 9:12

Iko in nogaid noitombutung ná inta ain pinodandi-Mu kon inami bo kon mongongawasa nami. Yerusalem ain ihukum-Mu noiḻiu kon kotá ondaka in kon dunia naa.

YOËL 2:2

Singgai tatua in nosindip bo nolamurú, nopuḻing in topuot inta mobunod. Tontara in pangkoḷá moroangoi naonda bo goḷom inta noiborak kon ḻimonik in buḷud. Inta ná tatua in diápabí kon dodai in onda in nobaḻí bo diá bidon mobaḻí bui modapot in mononoi.

MALEAKHI 3:16

Bo intau mita inta moondok kon i Tuhan in mosigumanan, Ki Tuhan in nokodongog bo nonaridi kon onu inta siningog monia. Intau mita inta nohoromat kon i-Nia bo inta notoguondok kon i-Nia, pinais in tangoinea kon bonu in buk pomomaisan inta kon tayowon-Nea.

MATIUS 24:21

Sin kon wakutu intua koangoian in roriga totok, roriga tatua in diápa kon dodai in onda in nobaḻí nongkon pinangkoipamai in dunia naa pinomia nodapot masa in tanaa, bo roriga tatua in diá bidon bui mobaḻí.

MARKUS 13:19

Kon singgai mita inta mokoondok tatua, moiantugbí in roriga inta diápa dodai onda in nobaḻí pinangkoipamai pinomia i Allah in dunia naa nodapot i masa in tanaa, bo diábí domandon mobaḻí bui.

LUKAS 10:20

Tongá umpakabí natua, yo dikabí mopia-pia in gina monimu sin moondok in dimukud moraat kon i monimu. Naabí in patus mokopia kon gina monimu, tangoimu aindon pinais kon soroga.”

SURAT I PAULUS KON JAMAAT RUM 11:15

Sin mosia ain sinolak i Allah, dá hubungan in intau kon dunia naa takin i Allah in motompiadon bui; apadoman aka mosia in tarimaan i Allah! Tantú tua in notongkaibí in naonda bo intau minatoi inta nobiagdon bui!

SURAT I PAULUS KON JAMAAT RUM 11:26

Sahingga in bayongan intau in Yahudi posaḷamatonbí sin kon bonu in Buk Motusi ain pinais nanaa, “Datu Mopoposaḷamat in mamangoi nongkon Sion; Sia in momopatbí kon bayongan aid moraat kon buí i Yakub.

EPESUS 1:21

Ḷoḻitúan pomarentaan i Kristus tua in moḷantu-ḷantudbí nongkon ḷoḻitúan pomomarentaan in bayongan pomarenta, bayongan pongawasa, bayongan itoi bo bayongan tuang bo bayongan intau inta inogoian in ḷoḻitúan moḷantud; mosia inta nobiag masa in tanaa ande mosia inta nobiag moiduduimai.

PILIPI 4:3

Bo poigumonku kon i monimu Sunsugos, yobayatku inta totok in mosatia, tuḷungai in mosia, sin mosia noramujidon totok in nogaid takinku nopotaau in Habar Mopia inta nongkon i Allah; mosia tua naonda bo tai Klemen bo bayongan in intau inta nogaid noyotakinku. Tangoi monia tua in pinaisdon kon bonu in Buk Intau Nobiag.

YUDAS 1:9

Ki Mikhael tontaní, inta itoi in malaekat mita in diábí kon dodai onda in nogaid kon ná inta inaidan monia tatua. Kon wakutu in sia nobobayowan in Ibilis soaḷ ki ine in mokouḻí kon mayat i Musa, sia in diábí nokobaḻí in nohakim kon Ibilis takin tosingogon moningkuḻe. Ki Mikhael in tongábí nosingog nanaa, “Torúan i Tuhan in iko!”

WAHYU 1:5

bo nongkon i Yesus Kristus, sakusi inta mosatia. Sia tua inta muna-munamai totok biniag bui nongkon kinopatoian bo Sia doman in nongawasa kon bayongan datu kon dunia naa. Ki Yesus in motabi kon i naton, tuamai Sia in noibog minatoi sin momilat kon i naton nongkon kawasa in dosa mita naton,

WAHYU 12:7

Onda intua kon soroga nobaḻídon in parang. Ki Mikhael takin malaekatnea mita noparang kon naga tatua. Naga tatua in binantungan doman in malaekatnea mita noparang takin i Mikhael.

WAHYU 13:8

Mahaḷuk tatua sumbáanbí in bayongan intau inta nobiag kon dunia naa. Intau mita inta diápa kinopaisan in tangoi monia kon bonu in buk kobiagan inta kapunyaan i Adí in Domba inta ain iratá, pinangkoipamai kon dunia naa diápa pinomia.

WAHYU 17:14

Mosia in noyopakat kon moparang kon i Adí in Domba tatua. Táe ki Adí in domba tatua takin dumodudui-Nea mita inta mosatia bo inta ain inoiní bo piniḻí-Nea tatua in monaḷow kon datu mita tatua, sin Siata in Tuang in bayongan tuang, bo Datu in bayongan datu.”

WAHYU 20:12

Bo akuoi in nokoontong kon intau mita minatoi, guyanga-mongoadí sinimindog kon tayowon tampat pomomarentaan tatua. Bo tobatú buk ibanea in binukádon, tuata in Buk Intau Nobiag. Onda intua hukuman pinoḷabúdon kon intau mita minatoi, podudui in oaid monia podudui kon inta ain pinais kon bonu in buk mita tatua.

WAHYU 20:15

Intau mita inta tangoi monia diá pinais kon bonu in Buk Intau Nobiag, pogambat kon bonu in dagat tuḷu.

WAHYU 3:5

Mosia inta mountung ḷambungan in ḷambung mobudó natua. Tangoi monia in diábí popaton nongkon Buk Intau Nobiag. Bo akúon-Kubí in mosia kon tayowon i Amá-Ku bo malaekat-Nea mita kon Akuoibí in kitogi kon i monia tua.

WAHYU 7:14

Dá tubagku kon inia: “Diábí kinotaauanku, ki Tuangbí in nonotaau kon tua.” Dá sia in noguman bui kon inakó: “Mosia naa in intau mita inta nosaḷamatdon nongkon roriga inta moḷoben, bo ain binatáan monia kinobudó in jubah monia kon bonu in dugú i Adí in Domba tatua.