AYUB 2:8 - Alkitab Singog In Mongondow Masa In Tanaa

⁸ Bo ki Ayub iḻimitú kon diug in yoyatan, bo nogamá kon bonsig in posilag sin pongukud kon awaknea.

AYUB 2:8 Iomraidhean Croise

SAMUEL 2 13:19

Bo nopoinggú in ki Tamar in ḷobud kon uḷunea, nomerak kon jubahnea, bo minayá takin nopogoḻingoi in ḻimanea kon pogotnea bo sindaḷan nongombaḷ totok.

ESTER 4:1

Naonda in kinodongogandon i Mordekhai onu inta nobaḻí, nomerak in sia kon ḷambungnea bo nogibintoḷ nobaḻí tomponuot kon morobonod in gina. Sia in nopoinggú in ḷobud kon uḷunea, bo nodondaḷoi kon kotá poḷat nongombaḷ moropot takin robonoḷ in dodob.

ESTER 4:3

Bo kon bayongan in propinsi, intau mita in Yahudi nongombaḷ bo nogamui naonda in parenta i datu pinotaau. Nopuasa in mosia, nongombaḷ bo nopongadu, bo nobayong in kon sigad monia in nomaké in sosapi bo inumuḻid kon ḷobud.

AYUB 2:9

Ki buḷoinea in noguman kon inia, “Umpaka yo umuranpa doman in iko motoindudui kon i Allah? Kutukdon mako in Sia, bo kopatoidon!”

AYUB 42:6

Tuamai in mooyá in akuoi monorop kon bayongan in tosingogonku bo takin momanasaḷ akuoi in ḻimitú kon butá bo ḷobud.”

MAZMUR 38:5

Akuoi in noḷomot kon bonu in taḷáku, mobogatdon totok in korasaanku popisí in dosaku.

MAZMUR 38:7

Akuoi in noikuyung bo noibungkut, kinoouput in singgai molamurú mako in akuoi bo morobonoḷ in gina.

YESAYA 61:3

sin mobogoi in pia in gina bo ḷunganga in gina kon intau inta morobonoḷ in gina bo nonogumatoi; sin momaḷui kon inta mokoajar kon gina monia mobaḻí dondong dodayow. Mosia in nádon pangkoi in kayu tobatú inta pinomuḷa tontaní i Tuhan. Mosia in mogaidbí kon onu inta mopia bo mobanar, dá ki Tuhan in poḷantudon.

YEREMIA 6:26

Ki Tuhan in noguman kon umat-Nea, “Pakédon in daing karong bo ponangkuḻitodon kon ḷobud. Ponogumatoidon bo pogamuidon takin roriga in gina naonda bo intau inta nongombaḷ sin kinopatoian i adínea tuḷong, sin momomutú in daḻídon monubu kon i monimu.”

YEHEZKIEL 27:30

Inombaḷan monia in ukurmu, nokuani bo nogamui totok. Mosia in nopoinggú in ḷobud kon uḷu. Bo nonangkuḻitod kon bonu in ḷobud tomponuot in togumatoi.

YUNUS 3:6

Kon tungkuḷ in datu in Niniwe nokodongog kon habar tatua, ḷagi in sia noponag nongkon ḷoḻitúan pomomarentaannea. Iḷongkutnea in jubah in dodatuannea bo noḷutud kon kaeng karong, bo iḻimitúdon in sia kon tudu in ḷobud.

MATIUS 11:21

Ki Yesus noguman, Koboditodon iko Korazim! Koboditodon iko Betsaida! Sin aka intau in Tirus bo Sidon in nokoontong kon soaḷ mita inta mokoherang inta ain nobaḻí kon yua-yuak monimu, yo noonggotdon in mosia in nogogai nogaid kon dosa mita monia takin nomaké in ḷambung kinopatoian.