AMOS 1:12 - Alkitab Singog In Mongondow Masa In Tanaa

¹² Tuamai in potabá-Kubí mangoi in tuḷú kon kotá in Téman, bo momokak kon bayongan in benteng mita in Bozra.”

AMOS 1:12 Iomraidhean Croise

YESAYA 34:5

Ki Tuhan ain nosadia kon pitow-Nea kon soroga, bo tanaa pitow tatua in moiantug kon bangusa in Edom inta ain pinopoḷabúan in hukuman bo yopúondon.

YESAYA 34:6

Pitow i Tuhan in mototuyúdon in dugú bo mopuḻingdon in ḷongó monia, naonda bo dugú bo ḷongó in mahaḷuk kuruban. Sin ki Tuhan in moposadiadon in kuruban kon Bozra, bo mogaid kon poyopúan moḷoben kon butá in Edom.

YESAYA 63:1

“Ki ine in sia inta namangoi nongkon Bozra kon Edom? Ḷambungnea in nopura, pakeangnea in mopouḻi-uḻinag; sia in ḷumampang takin motorindog mako.” “Akuoibí in ki Tuhan inta mokoposaḷamat bo mamangoi modia kon habar kountungan.”

YEREMIA 49:13

Akuoi in mongibot podoyon kon tangoi-Ku tontaní kon kotá in Bozra in mobaḻíbí tampat inta mokokoningkim inta taḷaan in intau. Kosinganbí in intau bo tangoi monia in pakéon monia pongutuk. Bayongan in ḻipú kon diugnea in mobaḻídon dongka rumbunnea modapot in mononoi. Akuoi, ki Tuhan, ain nosingog.”

YEREMIA 49:20

Tuamai, indongogaidon onu inta ain sinomayá-Ku kon intau in Edom, bo onu in aidan-Ku kon intau inta nogutun kon kotá in Téman. Ki adípa mita monia in diaanbí doman mayá, bo bayongan in intau in angoianbí in ondok.

YEREMIA 49:22

Naonda bo ḷagapan boniá nondagit takin nosongká kon koḻikipnea, natuata in koangoi in musung bo mondagit kon Bozra. Kon singgai tatua tontara in Edom angoian in ondok naonda bo bobay inta mononggadí.”

YEREMIA 49:7

Naa in pinoguman i Tuhan Inta Totok in mokawasa soaḷ Edom, “Eta degá intau in Edom diá motaau morai mokopobijaksana? Eta mononongginanea diádon degá nononggina kon i monia? Noinggamádon degá in kobobijaksana monia!

YEHEZKIEL 25:13

Tuamai in potaau-Kudon kon Akuoi in mohukumbí kon Edom bo moḻimod kon bayongan in intau bo mahaḷuk kon tua. Sinangkub in butá tatua, nongkon kotá in Téman modapot kon kotá in Dedan, baḻíon-Ku moingongow totok; rayatnea in matoi kon poparangan.

OBAJA 1:1

Naa in toḷanow i Obaja; sia nopoyaput in koyow i Tuhan Inta Totok in moḷantud soaḷ bangusa in Edom: Ki Tuhan ain nopotabá in totabá-Nea namangoi in bangusa mita, bo kita in nokodongogdon kon koyow mita inta dinianea noiduduimai naa, “Posadiadon moparang! Igai mayá in kita monubu kon Edom.”

HABAKUK 3:3

Iko in ki Allah Inta Totok in motusi namangoi nongkon Téman, Iko in namangoi nongkon buḷud in Paran. Ḷangit kinokoḷoban in koagung-Mu; butá nopuḻing in dodayow kon ini-Mu.