NEHEMIA 5:7 - Allah Wene Fano Wene Hupla Inane

⁷ an nen ninggi'nogo hilingisiok iluk fanorogo ebethigi. A'nogo hilingitigisik he an nen it ap inogogwi kaindek omanogo inom, afuni melalinafi lagaukwa mene omanogo inom, inoba ikhi logolik he, ”Hiren he it hinagaila'lak mene hinomameba sebelinarek welagep!” iluk yagaisasigi. A'nogo yagaisigirik he an nen wene andi faget ninggi'nogo hilingisiok iluk he afuni inebe abirengge inom wene ninane misik seberogo masuogeluk kabogetugu.

NEHEMIA 5:7 Iomraidhean Croise

MAZMUR 109:11

At angge yi mene ti mene andoma re it palegengge werek mene nen onggo wo'nisani iluk kino ugu mene omanogo nen felelenghogo heligik, nen aren set kwil kwalhogo helikherek mene andoma re afuni nen teligik, uak.

MAZMUR 15:1

Tuhan neisena, Hat hawi su mene wuri'mo andoma sani elok ku hak nogo, Hat honggwarek Handom Horek meneba andoma, sani elok logou hak nogo?

MAZMUR 15:5

Uang it ekhe elama faget wogisaluk, ”Amingmingengge ekhe inom seberogo wo'nisani,” iluk agarek lek mene inom, It ekhe weak hilingiti'lek mene inoba it andi wene inoba fouwagaluk onggo palek nenggarek lek mene inom, Afuni inobabut a'nogo hilingitarek mene andi re, hobuk weak inoba agi'lek wurep oba re, fano mondok logogun o, iluk wuni watikhe.

MAZMUR 27:8

Haren yaganeti logolik he, ”We'luk fogetnafi logoin,” iluk yaganetunem an nen onggo ikhi logolik he, ”Tuhan neisena, an he weak-weagat fogethabi wesigin,

MAZMUR 4:4

Hit he hinelurogo logoino o, Tuhan nen At onggwarek faget, ap Aren endawi hundik anggikherek mene ekhe wenagaisogo fakhasikhe. Nen, an nen At oba nane yagatu halok he, At Tuhan nen esanggo holnaferek.

MAZMUR 94:16

It afuni Allah ane taganhogo hilingitarek mene andoma inoba nen he ap sa nen an nili wo'nabu hak nogo? It ap weak mene nek hiligitarek mene andoma inoba nen he ap sa nen an nebikhit asu hak nogo?

KELUARAN 22:24

Inane holfuluk he, An nanini nen hit weim yabugun oba andoma hinebe pinggi hinoasumo, hit hinagagwi sogwe fisigik, hinagainafuri suarek mene agik, hilinglasugun.

KELUARAN 22:25

Afuni An namlogomi mene inanggele'ma andoma nen hit hina uang, ap inenggi lek mene nen palegengge hinoba logogin halok, hinane agaiyek oba ap yi mene ti mene onggo wili'lago mene nen agarek higit, to'mongge ekhe inom wanin iluk yagaisa fuk.

AMSAL 27:5

Inendawirek logolik weinamhogo yagaisagarek lek andi re endebat elo'lek meneat he, weinam inenggali warogo komorinafarek andi nek he mondok fano.

AMSAL 28:4

Ap sa nen wene melalek sebelogo fugu halok he aren ap weak mene inebikhit a'luk inili woginabi'lago. Nen, sa nen wene melalek higithogo hilingitu halok he aren ap weak mene inom minggirik werek.

YEHEZKIEL 22:12

It fena ekhe re ap wasuageluk onggo palinafunem inoatu mene agik, muli inamep nunggu mene agik, nen afuni it inunggulenu mene inoba sebelogo fisikhi logolik welagik, hilingitu mene werek. It inebe mondogaren An inonggot agaikha. An Tuhan Lego Mondok welagirek mene a'nogo nane mondogat igi.

YEHEZKIEL 45:9

Tuhan Lego Mondok welagerek mene a'nogo nen ikhi logolik, ”Yago, hit ap Israel hinap hinenu werek mene yoma sani, hiren weak mondok hilingiti lagep mene andoma re arat hilingitebo! Hit hinendawimo nen anggaluk afuni holhu mene sebelogo fisikhi lagep mene andi re herakfisani o. Hiren he eberogo wene inom katokhogo hilingitarek awene inom hilingiti logoni o. Hiren we ibi-eberogo misigam iluk ogo An nagainafuri inanggweang oba nen mugusogo wulaginabugun hanogo. Iluk An Tuhan Lego Mondok welagirek mene a'nogo nen wene andi hit hinoba yagahisigi.

IMAMAT 19:15

Hiren, it ekhe unggum inoba figik, kotik, ikhi logolik he, wene higithogo halogo nen ikhi logoino o. Afuni inangge lek inelagaik mene inebikhit agik, inangge hokhorogo logolik, ineilmo wulalhak werek mene hinailo welagik, ikhi logogun mondok lego.

IMAMAT 25:36

Hiren at oba hobuk helogoin en iluk wogoti logolik ekhe inom to'morogo iluk kino u fuk. Oba nen hiren hinendawinggen Allah oba hinailo anggikhi logolik ap andi hit hinanggele'ma eluk logouwageluk herak feino. Nen, nunggu mene at oba onggo huni'luk halok ogore, ekhe inom nit ninenggi werek asugun iluk at oba hunitu mene a'nogo kino u fuk.

MATIUS 18:17

Lamo re, it andi inane esanggo holhi'legat halok he, Allah againafuri inebe andogorogo were'ma yagaisano. Yagaisamo re, it Allah againafuri inebe mondogat omanogo inane esanggo holhi'legat halok he, at andi hinerei hinagaila'lak meneat he, it uang pemerintah faget kino iluk wanharek mene inabit mene hangge enda'ma mene hilinglaga o, iluk anggano,” iluk yagaisasikhe.

2 KORINTUS 5:16

Andi nen he, niren huli yogondak ya huli nen he, afuni nen inobabut palharek hak, it afuni ekhe inobabut a'nogo palhi lago lego. Nen, attak he, Kristus obabut a'nogo palhugu hak, hobuk a'nogo palhi lago legaro.

GALATIA 2:11

Mene re, at Petrus o Antiokhia wagaikhesik weak hilingiti lagaikhemo, an nen he, ”Hat hilingiti lagen andi weago,” iluk, fakhogoat wenagetigi.

1 TIMOTIUS 5:20

It ekhe inailo asuageluk, it eberogoat weak hilingita mene halok, afuni ineilhanemat inenggali warogo fanorogo komorinafi logoino.

TITUS 2:15

Haren wene andiat yagaisugunem, it ekhe inendawimo nen sebelhobagainogo nen he, hane ninghogoat inendawimo kagalogo komorinafi logoino.