LUKAS 20:21 - Allah Wene Fano Wene Hupla Inane

²¹ Lakfisa wagaukwama, Yesus oba wagaukwasik he, heinok wokhikhi logolik, mel yagatukwa: ”Noe! Hat he, wene yagaisikhi logolik afuni ekhe helokhoma fisigik, ekhe hambotma fisigik, egendek lek. We, hane higithogoat ikhi logolik, Allah endawimo nen he, afuni yi'nogo hilingiti logouwak, iluk endawimo anggikherek mene eberogoat yaganisikhi lagen andi, nit ninelu o.

LUKAS 20:21 Iomraidhean Croise

2 TAWARIKH 19:7

Nit nineisena Tuhan Allah andi nen he, aben henarogo hilingitik, fena fikhit enek ebikhit agik, inenggi a'makwe heligik, hilingitarek mene andi re, mondok abit anggikherek enggere, hiren Tuhan oba hinailorogo logolik hinendawinggen wenggelogo nek hilingitu nogo,” iluk yagaisasikhe.

AYUB 34:19

At Allah nen enek it ap raja inom, inenggi werek mene inom, inenggi lek mene inom, elalinafikhemo re, Aren he it ap raja halok enek inebikhit agik, nen it afuni inangge lek mene halok herakfisikhi logolik he it inenggi werek mene halok enek elokhomarogo hilinginafik, hilingiterek lek.

MAZMUR 12:2

Ap hat hoba tiphogo hilingitarek mene mondogat lek agaikhama re, ap fano hilingitarek mene ekhe werek lek enggere, Tuhan nineisena Haren lebetninabin o.

MAZMUR 55:21

Attak an nagailak ekhe ninom fano welago mene nen he, at agaila'lak ekhe inoba labok igik, nen aren wene waterek mene a'nogo taganhogo hilingitik, hilingiti laga.

MATIUS 22:16

Abok palhi lagaukwasik he, ap it inagoromi inane wanhi lagaukwa mene inom, it ap Herodes werekwe mene inom, Yesus oba wene heinok wanuageluk lakfisa wagaukwama it andi wagaukwasik he, mel yagatukwa: ”Yesus noe. Hat hobabut he, wene eberogoat enek ikhi logolik, Allah endawimo nen, Afuni yi'nogo hilingiti logouwak, iluk anggikherek mene eberogoat yaganisikhi lagen andi nit ninelu o. Afuni inebe hailo legat logolik inelokhonggen oba nek isaluk he, ekhe helokhoma fisigik, ekhe hambotma fisigik, hilingisu lek hak hiikhi lago o.

MARKUS 12:14

Lakfisa wagaukwama wagaukwasik he, mel yagatukwa: ”Noe. Hat hobabut he, wene eberogo mene nek ikhi logolik, afuni inelokheba nek isaluk, ekhe helokhoma fisigik, ekhe hambotma fisigik egendek lek. We inebe hailo legat logolik he, ”Allah endawimo nen afuni yi'nogo hilingiti logouwak, iluk anggikherek mene nek eberogoat mene yagaisikhi lagen andi re nit ninelu o. Halok he, nit Yahudi mene hilingitorek higithogo, uang pemerintah faget, kain Kaisar wogosugun eloga? Elo'lega,” iluk heinok wanhukwama,

LUKAS 20:20

Kamo isukwasik hobuk, aren ane igin oba ebe enggin oba fouwogeluk, at gubernur afuni ferinarek logolik wene inoba figik, kotik, ikherek mene eisewerek mene nen wene oba fouwageluk, ap ekhe inobabut fano hangge Yesus ineil wani loageluk lakfisa wagaukwa.

LUKAS 20:22

Halok he, nit Yahudi mene hilingitorek higithogo, uang pemerintah faget, kain enupogot Kaisar wogosugun eloga? Elo'lega,” iluk yagatukwama,

YOHANES 3:2

At ap andi o hubanggo inenggi ekhe sambul Yesus oba wagaikhesik he, mel yagatikhe: ”Guru noe. Ap ekhe Allah emberek hundik lek halok he, haren elalin mene hilingirik nikhi lagen andi hak, hilingisu mondok elo'lego. Andi nen he, haren wene yaganisoageluk Allah nen lakhobagai wagama wagen, iluk ninelu ago,” iluk yagatikhe.

2 KORINTUS 2:17

It afuni ekhe inebe hokhorogoaren he, yi mene ti mene onggo ha awarik lagaikharek hak, Allah ane a'nogoat waluk lagaikharek. Meneat he, nit enek he, a'nogo lek. We, Allah nen, at ane waluk loageluk ninayonggo fesikhe andi nen, at eilhanemat ninendawinggen misigat Kristus ninom hundigat logolik, yagaisilik laga lago o.

GALATIA 1:10

An nane igi andi re, afuni nen, ”Hat fano egen,” iluk yaganesuageluk ikhi lagi a? Athe, Allah nen, ”Hat fano egen,” iluk, yaganesuageluk ikhi lagi a. Afuni inendawimo fanorogo ikhi lagi halok he, an nebe Kristus amingmingengge igin legaro. Mene re, an Allah endawimo fanorogo ikhi lagi o.

GALATIA 2:6

It ekhe inendawimo nen he, ”Inenuwerek he, it andem,” agarek mene andi nen wene an yagaisilik nigirek mene a'nogo hobuk hunogoat yagaisilik nikhi logouwagen iluk yaganeti'legat. Allah nen afuni inagap endakwe nek eilenggen isilik he, ”Yi weak. Yi fano,” iluk ikherek lek andi nen, an it andi faget attagat inenuwerek welagaikha mene he a? Lek mene he a, iluk, menenei ebeti lagagi lek andi.