LUKAS 20:13 - Allah Wene Fano Wene Hupla Inane

¹³ A'nogo mondok hilinginafukwama re, at kain eabu eisewerek mene a'nogo endawimo nen he, hobuk he, ninggi'nogo hilingitasik he. An nonggwarek namlogo nendawinggen hundik mene yiat inoba lakfoumo re, inane agaukhogo hai warogo wanugun anggikhi lagi, iluk anggasikhesik lakfei wagaikhe.

LUKAS 20:13 Iomraidhean Croise

YESAYA 5:4

An neabu andi faget ekhe hilingiti'legengge welagi nogo a? Anggur enggen ebe mene isigin iluk nenangotunemen andi re ninggi'nogoluk arik mene ite nogo?

YEREMIA 36:3

An nen enggin mene it Yehuda mene inoba lakfei wesigin mene andoma faget inesanggo holhambik he it inobabut hebelugun logou hago. Andiba re it inaweak hilingiri'lagwi mene inom, ina'mageba hilingiri'lagwi mene inom andoma re An nen sagalogo leget fisagain o,” ikhe.

YEREMIA 36:7

Haren a'nogo igin andiba re iren Tuhan oba samban igik, it ina'mageba hilingiri'lagwi mene omanogoba nen inendawinggen hebelhik, ugun logou hagaro. Tuhan nen he it inoba a'mage lagaikhesik he it unggum inoba fagain iluk inanggomo kagalhe o,” iluk yagati.

YEHEZKIEL 12:3

Andi faget he, afuni wa'lagaikharek mene yi sa, o linggene werek kwelek arem he ap hele warogo huginabi lagaikharek mene nen hilingitarek higit hasungge kwalugu mene misik ekheba kwalogo fakhan o. A'nogo kwalogo fakhambik he o oan hubagi'lek werek kwelek ap hele warogo huginabi lagaikharek mene hakhogo hebe weinam hogoat lan o. It afuni wene sagali'lagwi mene andoma ineilenggen kwelakharek werek kwelek he hat haiba andi hobat oba folelek ekhe folel fuluk, anggwe folelekwe andi nen hasungge kwalegengge andi waluk wulibino. Wulibi lambik he hasunggwe andi homoloba harogo re, o hubanggo nek lano. Laga logolik he heilenggen humunogo lamo re kwe hat lagain kwe andi re hagain lek. A'nogo hilingisigin mene andi re inunggulenu Israel mene inebe mondogaren ineilenggen heambik iren fut fogoin logouwak. Andiba re it inonggwaregen fut fakhikhi logolik it andi re afuni wene sagalhu mene welago iluk anggogoin a'naga o,” iluk yaganete.

HOSEA 11:8

A'nogo isikhesik, Tuhan nen mel yagaisasikhe: ”Hit afuni Israel mene yi. An nen hit hinebe mondok-mondok herak hinobagaluk lagik igin nogo? Mondok elo'lego. An nen afuni Adma mene inebe mondok legetfisasigi andi hak, legethinafik, afuni Zeboim mene hilinginafigi andi hak hilinghinafik, igin nogo? Mondok lego. An nen hit hinebe nendawi hundik mondok hokho meneba hilinghinarek welagi andi nen he a'nogo hilinghinabigin lego!

HOSEA 6:4

Oba nen he Tuhan nen ikhi logolik, ”Hit afuni Israel mene inom, Yehuda mene inom, hinobaget he An nen ninggi'nogo mene hilinghinabigin nogo? Hiren An hinendawitnafi lagep andi re, o hubet werek kwelegat ohena inom, lilengge inom, weak-weagat lek agarek andi hak legari'lago.

MATIUS 17:5

A'nogo yagatunem aremnogoat, ohena kut mene sebelinabi wagaikhesik, Allah ane ohena a'nogo anggele'ma nen mel yagaisasikhe: ”Namlogo nendawi e, noba liok ikhe. At ane nek holek logoino o,” iluk ane pogoroba pelabi wagaikhemo,

MATIUS 3:17

Labok i pi wagaikhemo re, Allah ane pogoroba nen, ”Yi An Namlogo, nendawinggen hundik mene. Noba liok ikhe o,” iluk ane pelakfei wagaikhe.

LUKAS 18:2

”O sili ekhe, ap kain mene wene inoba figik, kotik, ikherek mene ekhe Allah ailo lek logolik afuni agaukhogo endawirinaferek lek mene welagaikhe.

LUKAS 18:4

A'nogo yagasi wagunem he, ap kain a'nogo nen attak ane holhi'lek abiret fikhi lagaikhe meneat he, hobuk endawimo ebeti logolik he, an nobabut he, Allah nailo legat logolik, afuni agaukhogo nendawirinafirek lek meneat he,

LUKAS 20:12

Enggi pireba lakfisa wagaikhe mene a'nogo hilingitukwa andi nen he, hobuk amingmingengge mene ekhe lakfei wagaikheat. Mene re, at hobuk lakfei wagaikhe mene andi wagaikhemo iren a'nogoat yei amep wulagaisogo warogo anggur yabumo nen waganogo wulakfisasukwa.

LUKAS 20:14

Lakfei wagaikhemo wagunem, it ap yabu kagalek welagaukwa mene omanogo ineilenggen yethasukwasik it-it ikhi logolik he, mel isukwa: Eisena obali'mo yabu eisewerek asigin mene a'nogo ebe waga a'li. Halok yabu yi nirat eisewerek asuogen he, ebe wasuogo, iluk,

LUKAS 9:35

A'nogo inailo agaukwama at Allah ane ohena a'nogo anggele'ma nen mel yagaisasikhe: ”An namlogo heragaisogo menfesigi mene ebe araro. Halok, at ane holek logoino o,” iluk yagaisasikhe.

YOHANES 1:34

at ebe neilenggen furogo higiri'mo andi nen he, futfigi o. A'nogo futfigirik, at andi Allah amlogo eberogo aro, iluk, abok hit fakhogo yagahisikhi lagi yi,” iluk yagaisasikhe.

ROMA 8:3

Attak he, Allah nen komotninafikhe wene a'nogo, nit afuni ninobabut lebelek andi nen he, fano hilingninabu elo'lek agaikhe. Elo'lek agaikhemo re, nit afuni ninobabut weak hilingitu were'ma, Allah onggwarek amlogo nit hangge hilingla'luk, nit weak hilingitorek mene andi wene oba fesikhesik sebelfisoageluk lakfei wagaikhemo sebelfisasikhe andi.

GALATIA 4:4

Were'ma re, at Allah nen amlogo ayonggo fesikhesik kweangma lakfei wesigin arat higit asi wagaikhemo re, lakfei wagaikhemo, he kweangma mene nenat tatikhe. A'nogo tatikhemo, wene Allah nen komotnininafikhe wene a'nogo awe a'ma logolik esanggo hologo hilingiti lagaikhe.