LUKAS 1:17 - Allah Wene Fano Wene Hupla Inane

¹⁷ Allah Areagun ap Elia endawimo peterogo logolik omamerogo hilingirik nikhi lagaikhe mene andi, at Yohanes andi oba louk imbik, yenggerugwi ineisena lak inom, lambukhogo fisigik, wene inesanggo holi'lagwi lek mene it ekhe wene holiluk higithogo hilingitarek mene inobabut wanuageluk hilinginafik, inebe nineisena Tuhan fagerat logouwageluk tegelogo fisigik, igeluk, at tak ta'lasimbik a'nogo hilingirik nikhi logogin o,” iluk yagatikhe.

LUKAS 1:17 Iomraidhean Croise

1RAJA-RAJA 17:1

A'nogo hilinglagaikhe andem sambul he, ap ekhe Allah ane yagaisikhi lagaikhe mene enu Elia, aiba Gilead mene, o kota enu Tisbe andi welagaikhe. Logolik, inenggi ekhe sambul he, at Elia andi ap raja Ahab oba lagaikhesik mel yagatikhe: ”Nit afuni Israel mene nineisena Tuhan Allah eluk mondok welagarek mene, an nen At obaget hilingitirek mene a'nogo oak. Hobuk tahun pire hea? henagan hea, logogun andem oba re, lilengge engga bene ekhe welagik, o meiso endebat halok ekhe ninggik, igin mondok lego. We, an nen lilengge hea, moiso hea, wesuak igin halok enek he, wesigin o,” iluk yagatikhe.

1RAJA-RAJA 18:18

A'nogo yagatikhemo, at Elia nen he, ”An nen o elokhonggen weagerati lagi fuk. Noe, harenat weagati lagen o. Hat hebe nen inom, hagainafuri heisok erokwe mene nen inom, hinomen, Tuhan ane sagalogo fuluk, tugwi kembu wutarek andi hak sunggwan Baal faget o ekhema-ekhema wurogo fikhi lagep mene andi fogerati lagep andiba o elokhonggen weagerati lagebo.

1RAJA-RAJA 21:20

A'nogo yagatikhemo, at Elia ebe at Ahab oba lagunem, at Ahab en eilenggen Elia yetha wagaikhesik he, mel yagatikhe: ”Hat an nemberek weak welagorek a'nogo yogondagen noba wagenma ambi aga lago ari a!” iluk yagatikhe. A'nogo yagatikhemo, at Elia nen he, ”Eberogoat egen o. Hat Allah eilhanem honggwaregen hebe weak hilingisogo fakhikhi logogiluk wenagaisogo fakhegendik hilingiti lagen yoma re!

2 RAJA-RAJA 1:16

Lagaukwasik he Elia nen raja ba ikhi logolik he, ”Tuhan en ikhi logolik, ’afuni Israel mene werek oba yoma Allah oba heinok wanu mene ekhe werek legen hakhogo, haren ap o kota Ekron mene inanggembu Baal-Zebub a'nogoba heinok wani loageluk lakfisegen a? Andiba re hat hebe re fano asigin lego, hebe wa'lasigin ikhe o!’ ” iluk yagatikhe.

1 TAWARIKH 29:18

Nineisena Tuhan Allah, it nit ninombawi ninambu Abraham inom, Ishak inom Yakub inomen hapne wanhi lagaukwa mene, Hat hagainafuri yi inendawinggen hat hoba hundik logolik, yogondak hilingik ya hakhogo nek logouwageluk hilingfisikhi logoin o, nen iren mondok-mondok Hat hoba tiphogo hilingiti logouwageluk leberisan.

2 TAWARIKH 29:36

Linggene eil misik oba nek mondogat andi hilingisuageluk Allah nen leberinafikhe mo re it afuni holhu mene omanogo inom, at raja Hizkia inom, inendawimo inagaiyek enek agaukwa andi.

MAZMUR 10:17

Tuhan neisena, Haren he it afuni weaget fisagarek mene omanogo nen samban ugu mene re inane hesanggo holfuluk it inendawinggen hambuget fisikhi lagen.

MAZMUR 111:10

Ap sa nen obabut hebelek mene logogin amolo halok he, aren Tuhan oba along anggaluk legeisogo fikhi logogin fano. Nen, afuni At ane hologo nek hilingitarek mene inoba re fanorogo wenggelharek mene wogisikherek. Inenggi mondok-mondok andoma re Tuhan nek fogerati logogun.

MAZMUR 78:8

Andi re it inambu-inombalagen Tuhan Awene melalek sagalogo fuluk inabiren hilingiti lagaukwa hakhogo hilingiti logoinogo. It andi re inebe inendawimo eberogo anggili'lagwi mene a'nogo omamerek legengge logolik leik-kweigengge hilingiti lagaukwa inap, iren Allah oba tiphogo hilingiti'legengge welagaukwa inap andi nen hilingiti lagaukwa hakhogo hilingiti logoinogo.

YESAYA 29:24

Ap kembu mene re hebelagaikharek mene yanggulikhi logogun, nen it ekhe inane mul-mul hokhorogo agarek mene re yagaisugunem fanorogo helikhi logogun,” ikhe.

AMOS 4:12

A'nogo hilingiti lagep andi nen, hit afuni Israel mene yi. An nen wene hinoba fagain o. Ma re, An nen wene hinoba fei wesigin mene andi helobagaigen he, hit hinebe fik-foukhogo logoni o,” iluk ikhe isikhe.

MATIUS 11:14

hinendawinggenma furogo wanhep halok he, ap Elia ebe wesigin iluk abok isukwa a'nogo re, ebe Yohanes wagaikhe andi aro.

MATIUS 3:3

Andi ikhi lagaikhe andi re, at Yesaya Allah ane yagaisikhi lagaikhe mene a'nogo nen yagaisikhi logolik he, ”Ap ekhe o leimo afuni le'ma andoma ane ngai eti logolik he, Eiga! Ninoe Enupogot wesigin kwe, kwe fanorogo tegelhik, kwanirek mene higithogo yatik, ikhi logoni o, iluk wolisili'logo,” iluk Yesaya nen ikhi lagaikhe a'nogo, at Yohanes ebeat wagaikhe andi.

MATIUS 3:4

Wagaikhesik, leimo afuni le'ma andoma logolik, wam unta esi mene igisogo re, asu laberigik, agap mene nonggologo fanorogo hilingisogo re, alinggin ikhigik, ikhi logolik sumburu na hak he, pulue mene ninggik, kin amusu enggama mene ninggik, ikhi lagaikhe.

LUKAS 1:76

Nen, hat namlogo yi nen, ninoe Enupogot wesigin kwe yati logouwageluk, hat attak yonggo laga logolik afuni yi weak ti weak hilingiri'lagwi mene Allah nen wene inoba mene sebelogo legetfisaluk telinabigin wene andi Haren yagaisamo inelu asigin andiba, hat habok ikhi logolik, Esin welagarek mene awene yagaisilik nikho a'nogo ebe yi aro, iluk ikhi logogun.

YOHANES 1:13

Migininafikhemo, at againafuri agaukwa andi re, afuni inagainafuri takha inamolo nen taginafik mep mene andogorogo taginafarek andi hak fuk. We at Allah nenat taginafikhe o.

YOHANES 1:34

at ebe neilenggen furogo higiri'mo andi nen he, futfigi o. A'nogo futfigirik, at andi Allah amlogo eberogo aro, iluk, abok hit fakhogo yagahisikhi lagi yi,” iluk yagaisasikhe.

YOHANES 3:28

Ap andi Mesias afuni telinabuageluk Allah nen ayonggo fuluk lakfei wesigin isikhe a'nogo re, an he lek, meneat he, at hobuk wesigeluk, an attak laknobagai wagama wagi o, iluk yagahisugunem hit arat hinesanggo holhi lagagip anggigi.

KISAH PARA RASUL 10:33

Andi nenat, an nenggi ekhe welagi'legat he, ap ekhe hayonggo hoba lakfisigimo, hat hobabut fano nen kamo igi'lek fano wagen, noe. Nit mondogat yogondak Allah eilhanem welago yoma re, Aren wene yagaisano, iluk yagahete mene, wene andi mondogat ninesanggo holuogeluk welago, noe,” iluk yagatikhe.

ROMA 9:23

It andi faget a'nogo afe morogo logolik, nit faget mel anggili'logo: ”It ekhe nendawi mene fanorinabigeluk attak elalinafigi andi, fano mondok hilinginabigin mene inelu asuago,” iluk anggikherek.

KOLOSE 1:12

nineisena Allah hai watik, ikhi logogun andi. At nineisena nen, at againafuri ekhe hinomat selek oba hinawi werek logouwageluk hilinghinafikhemo welagep andi nen, arat hai wati logogun andi.

2 TIMOTIUS 2:21

Andi hak he, sa nen onggwaregen weak hilingitarek mene andi horogo herakfisaluk, ebe Allah faget fisaluk were'ma, arenat yi mene ti mene fano mene hilingisigeluk, ”Arat fano,” iluk, ayonggo fagain andi.

1 PETRUS 2:9

Mene re, hit enek he, ”At Allah nen fano hilingninabi'logo,” iluk abok yagaisilik loageluk, hinebe o mum oba were'ma, at ebe elalinat selek mondok welagarek oba wesuageluk hinayonggo fesikhesik, hirat againafuri asuageluk wenakhinafik, at ebe eisewerek kaindek logouwageluk menhinobagagik hinunggulenu at onggwarek unggulenu mene salogo hinobagagik.” Nonggwarek nagainafuri,” iluk hinebe wokhinafik, isikhe andi.

1 YOHANES 2:28

Nagainafuri e. Kristus wesigin andi sambul ebe wagunem he, nit ninenggali agi'lek, ninailo legat at elokhoma awe a'ma kuogen, hirat at hinom hundik mondok logoino o.

WAHYU 20:4

A'nogo higiri'mo nen, ombo'ne re, ap kaindek inobuluk hokho were'ma andoma inebe hokhorogoat kain logolik, afuni ekhe inawe a'ma fisaluk ferinarek logolik wene inoba figik, kotik, ikhi logouwageluk eisewerek fisagama isigi. Nen, ekhe higi re, it afuni mene olomene hangge hokho mene a'nogo inom, ilirengge at ebe hangge hilingitarek a'nogo inom, fogerinafi'lek, enu hangge lisu palek a'nogo inendawinggen wenggelogo inelhaba hea? Inenggiba hea, wanhi'lek herakfisaluk, Yesus hilingiti lagaikhe mene yagaisilik nikharek mene faget inom, Allah ane faget inom, inalonggop palogo inoatukwa mene arat inambotkwe inelugetfisaluk menfisikhesik, at Kristus inom afuni ekhe inawe a'ma fisaluk ferinarek, mo lagagik pigik ugu kwelek 1.000 tahun welagaikha isigi.

1 SAMUEL 7:5

A'nogo hilingitunem, at Samuel en he, mel yagaisasikhe: ”Hit hinunggulenu Israel mene mondogat o Mizpa andogosi we'no o. A'nogo andogosi wagunem, an nen hit faget nineisena Tuhan ayonggo fagain o,” iluk yagaisasikhe.