Nimbe Para Tilimu 3:3 - Imbongu

³ Ungu oi pilko ltinu unguma altoko konopu kimbo tiko pilko, pilko liko tenge tiko konopu topele towi! Molo altoko nu makilko ola naa molonio lemo na wapu noli iye te oromo mele kiyengo nimbo nu moloniona ombo. Ombo waimu nu naa pilko molani ombo.

Nimbe Para Tilimu 3:3 Iomraidhean Croise

Matyu 25:13

Aku tepa nimbelie yuni altopa nimbei, “Aku ulu tembalo kani Iyemunga Malo kelepa ombalo walimu kape eno naa pilko, ipu leli oi ombalonje tangoli ombalonje ipu leli ombalonje aku naa liko manjirimele kani Yu ombalo nokoko kondoko molaio,” nimu.

Gotenga Ungu Tukumemu 13:33

Na altopo yando ombo wai akumu eno naa liko manjirimele. Akumunga eno lemo wamongo konopu toimbo topili enge ningo angilko kane kane molaio.

Gotenga Ungu Tukumemu 13:36

Nalo yu kiyengo nimbe walitikale wendo omo lemo aku yuni eno paa uru peko molangei omba naa kanopa ltendepili.

1 Timoti 6:20

Timoti, Goteni nu kongono tirimumu wamongo nokoko kondowi. Mai kombumunga ungu wema, imbomani Gote naa liko manjikolio nimele unguma kinye, kolo toli ungumani Gotenga ungumu beambo timbei teremo unguma kinye, naa pilko, umbulu tiwi. Aku ungumando kolo toko enonga lipe manjili peremomani nimbo tirimolo nimele.

2 Timoti 1:13

Kraist Jisasini nu tapondombalo kinye nuni yu paimbo ningo ipuki tirino mele enge ningo pilko, Jisasi kinye imboma kinye konopu mondokolio nani unguma nu nimbo tipo, mane tipo, niuna pilerinu mele wamongo pilkolio aku teko kau imboma mane tieni.

Hibru 2:1

Manda, Jisas yu imbi lipe olando moromomunga ungu tukume oi pilerimuluna ulu teni lino wendo lipe mepa naa pupili nimbolio aku ungumu konopu kimbo tipo enge nimbo ambolopo molamili.

2 Pita 1:13

Linonga Awili Jisas Kraistini na nimbe tirimumunga na wali alaye kolo nanga kangimu ulke takai melena molopolio, tiye kolombo nimbo pilipolio kinye na i ulke takaina mele we molopolio eno oi ungu pileringima paa wamongo liko manjiko molangei nimbo nani altopo nimbo tiro akumu paa nio konopu lteo.

2 Pita 3:1

Nanga konopu mondoro imboma, i pipia toromu enonga topo mundumboindo wali talo tipo toro. Nani pilipolio i pipia toro mele nimbo tiembo, Jisas oi maina naa opili koro oi Gotenga nimbe munduli ungu nili profet iye tumbi nilimani Awilimu altopa ombalo mele ningo tiringi bukuna moromo unguma kape, altopa kinye Jisasini nanga kongonomu tendepaio nimbe lipe mundurumu iyemani Awilimu linonga Tepa Lili Iye Jisasini ungu manema eno nimbe tirimuma pilkolio yando imboma ningo tiringi unguma kape, enoni aku unguma oi pulu polko pileringi mele kelko pilko konopu kimbo tiko molangei nimbo pipia te oi topo tiru kano. Kinye imu kape talo tipo topo timboindo ungu pulu tendekumu pilipolio i pipiamu toro.

2 Pita 3:10

Nalo Awilimu ombalo walimu paimbo wendo ombalo. Wapu iyemu oromo mele ombalo. Ombalo kinye mulumu tipe ungu nimo mele tuku nimbe pora nimbe, Goteni mele keloma maina ltemo mele terimuma pali tipeni nomba pora timbelo. Altopa maimu kinye maina ltemo melema kinye naa lembalo.

Nimbe Para Tilimu 16:15

“Pileio! Wapu noli iye te ombalo ningo naa pilko walulu tiko moromele kinye mini ltendepa oromo mele na eno molongena aku tepo ombo. Imbo teni yu ombalo kinye imbomani na maminye naa panjipo we molombona naa kanangei nimbe mai naa kolombo nimbe uru naa pepa makilipe kanopa, yunge wali pakolima pakopa molombalo imbomu yu malo,” nimu.

Nimbe Para Tilimu 2:25

Nalo eno mele amboromelema enge ningo ambolko pungo molangeina ombo!

Nimbe Para Tilimu 2:5

Oi pulu polko na konopu mondoko nanga ungumu ambolorunu mele pilko altoko aku teko teani! Molo aku naa tenio lemo nu moloniona ombolio nunge tipe lamemu ltemo kombuna wendo limbo.

Nimbe Para Tilimu 22:7

Jisasini nimbei, “Pileio! Na nondopo ombo nimu. Pele wendo ombalo i bukuna nimbe moromo unguma pilipe lipe tenge tipe tembalo imbomu yu malo,” nimu.

Nimbe Para Tilimu 3:11

Na omboi tero kani nu amborono melema enge ningo ambolowi! Nunge tipo kalopo timboi teromu imbo teni lupe naa lipili ningo aku ulu teko molowi!

Nimbe Para Tilimu 3:19

Imbo konopu mondoroma Molko kondangei nimbo iri topo mane tiro kani nu konopu liko mundukolio teko kenjirino mele kanoko keri pilko tiye kolko konopu topele towi!

Nimbe Para Tilimu 3:2

Nu uru naa peli makilko ola molowi! Nuni tereno uluma pali nani karo wali nanga Goteni kanopa penga pimo uluma aku tepa mele naa karo kani ulu penga walo kolte terenoma kamukumu mainye naa pupili ningo aku uluma enge ningo altoko tewi!