Daniyeli 7:7 - Mazu Otchena a Mulungu

⁷ Jagaireyile eno, miyo dohowelela diing'anagave muwari mwa jengo jaonne miyo mmuruni mwaga na mahiyu. Muwari moing'ana dohomuonaga mwanainyama wanennayi owopiha na makalelo ohokala a masika, orendjetcha, okana kopolo dohokala da masika anna meno malukulu a momba. Liye otakuna eto ogwadanya eto jimohi jahala, onyingalela na manyalo aye. Mwanainyamole mbwenye ali ohiyana na anavinyama araru amohiwa ale eto ohokana manyanga kumi.

Daniyeli 7:7 Iomraidhean Croise

2 Samuweli 22:43

Mwa enne miyo dohatchila ante aliwa fiyeda kala nnga tumbulru na vati. Eto dohatchakatcha nnga madogo a murampani.

Daniyeli 2:19

Mahiyu a siku nenne Daniyeli ohoonihiwa jengo mmuruni mwaye, liye wandeliwaga yoroha yokoyeya ya mwene ule. Agawandeliwe, ohomutamalelaga Mulugu wa zulu.

Daniyeli 7:13

<<Miyo dohokalelave ing'ana jaona miyo mmuruni mwaga na mahiyu. Mwa enne dohomuonaga mutu mmohi nnga Mwana wa Mutu akumelaga mmiramboni zulu. Evale liye ohodowaga pandi ya evale vafwanyeya mundimuwa oulula bure ule, liye veleliwa vamentoni va mundimuwole.

Daniyeli 7:2

Mulombwana Daniyeli ohowongaga eraga: <<Miyo dohoonaga jengo mmuruni mwaga na mahiyu. Miyo daonnege nipevo nokumela zulu niombaga pandi dannayi dene da ilambo, nibubudaga mahindje matene a bara indimuwa.

Daniyeli 8:10

Evale nnyanga nne nohoulukulaga ante aliwa fiyeda nikuru na zulu. Eto nagafiyile zulu ule, nnyanga nne nohamoriheda vati atu amohiwa kafwanyeya muwari mwa nikuru na zulu nne vamohi na nyenyedi dimohi diwa. Jagamorenle vati, liye ohonyingalelaga.

Daniyeli 8:22

Zela nnyanga nimohi nakotoliwe eto vamalroni vaye kamelagavo manyanga mannayi, ku tapulela ira mwene oroma ule unokotoliwa eto vamalroni vaye vinoza vivenye amwene annayi a munlogoni mwaye, kagane umwene waye, kakale maumwene mannayi. Mbwenye kopolo diwa kannakala nnga kopolo da mwene oroma ule.

Jowandeliwa 12:3

Noira eno, eto zulu yohozawo ionihedo imohiwa. Waoneyile mwanainyama eni owopiha ofila, unaitaniwa daragawu, aganna miru mitanu na minli na manyanga kumi. Kada muru ohokana mwana tchapowa vamuru vaye.

Jowandeliwa 13:1

Daragawule agaimenle vamisevani mutcherelani mwa bara mule, miyo eto dohomuonaga besta akumelaga mwiko, aganna manyanga kumi, na miru mitanu na minli. Eto kada muru ohokana mwana tchapowa vamuru vaye eto kada muru vazulu viwa voholrembiwa nzina nomululuviha Mulugu.

Jowandeliwa 17:12

<<Manyanga kumi anno uonne we, tapulela amwene amohiwa kumi, kali kahanavahiwe kopolo dotonga. Mbwenye aliwa anaza kavahiwe umwene ira katonge vamohi na besta, ora imohi bahi.

Jowandeliwa 17:7

Muwari motikiniheya mule, mungelro wenne adioniha ejile ohodiwandelaga ira: <<Kodi weyo unatikiniheyela nni? Miyo nnafuna duwandelemo jengo jorutcha jinaona we ji. Nnafuna dumasulele zela tapulela wa muhiyanole na besta wenno unna miru mitanu na minli na manyanga kumi, vevo vigaratile muhiyanole.

Jowandeliwa 17:8

Besta umuonile we ule, aliwo wanle. Mbwenye malambwala kanafwanyeya mwilamboni. Tchineneva bestole uli muliha odiha ohokana magomelo. Tchineneva eto unoza akume mmulihani odiha ohokana magomelo emo muli liye ira adowe atolotchiwe. Ora inafuna liye kuma mmulihani odiha ohokana magomelo mule, atu anno kahalrembiwe maziniwa muwari mwa Livuru na Ingumi romela mapanduwelo a ilambo, aliwa kaza kamuona bestole akoka, anoza katikinege kerege: <Bestola wanle ohokalawo. Nomala eno, liye dimela. Eto peno uwelela kalawo akoka.> >>