Jerimaya 23:2 - Ika

² Lee nwan ihiẹn Osolobuẹ hụn wụ Chuku Izrẹlụ ku banyeni ndị rị e du ndị nke m: “Makẹni ụnụ a chụzịzagụọ ndị nke m, chụpụ wẹ — hụn nkẹ ụnụ e gi lepụ wẹ ẹnya, m k'e ye ụnụ afụnfụn eje-ihiẹn ụnụ mẹ. Mmẹ wụ Osolobuẹ e kugụọ a!

Jerimaya 23:2 Iomraidhean Croise

Ọpụpụ 32:34

Jẹnmẹ nwan; duru wẹ shi ebẹhụ m ku; lee ẹ, mmọn-ozi m k'e burun'i ụzọ. K'osilẹrị, ogẹn ru m'e gi ye afụnfụn, m k'e yekwọ wẹ afụnfụn njọ wẹ.”

Jerimaya 10:21

Ndị-ndu ẹnyi enwọn uche — w'a ra jụ Osolobuẹ uche ẹ; ya haịn ihiẹn gilẹni a rịnị wẹ nwan mma, ndị wẹ rị e du a gbayịyagụọ.

Jerimaya 11:22

Ya Osolobuẹ ihiẹn ile rị okpuru ẹ nọ nwan sị, “M jẹnkọ d'e ye wẹ afụnfụn. Ọpịa-agha k'e gbu ikorọbịa wẹ la iwi; ẹgụn e gbu ụmụ wẹ ikẹnnyẹ lẹ ikpoho.

Jerimaya 13:17

Kanị, omẹni ụnụ egọnni ntịn, ya wụ nị m k'e zueri a kwan ẹkwan-ẹkwan, makẹ mpache ụnụ; ẹnya m k'a chansọnmẹ, ẹnya-mirin m e huru — makẹni wẹ jẹnkọ d'a kpụnrụn igunrun atụnrụn Osolobuẹ.

Jerimaya 13:20

Jerusalẹm, lee ẹnya, n'ị hụn ndị-iṅẹnrẹn gha ẹbamịn-ugu lala. Elebe kẹ igunrun atụnrụn wẹ buche i ẹka rị? Atụnrụn ndị nwẹn i gi a nyan isi nwan?

Jerimaya 13:21

K'i k'e ku ogẹn Osolobuẹ k'e bu i che okpuru ndị ị rị a han ọwụ? Ọ tụrụkọ ị nọkẹ ebe imẹ rị e mẹ okpoho?

Jerimaya 17:10

“Mmẹ wụ Osolobuẹ e lele obi, e lele iroro — hụn m'e gi a kụ ịhịan ụgwọ omumẹ ẹ, ụgwọ ihiẹn ọ mẹ.”

Jerimaya 21:12

Ụnụ ndị ikpụlọ Defidi, lekwọ nị ihiẹn Osolobuẹ ku: E gikwọ nị ezioku a kị ụhụọhịn-ụhụọhịn; a zụọpụhakwọ nị ndị wẹ rị a bịangbu ẹka ndị rị a bịangbuni wẹ — amamgbe m'e gi ufiri eje-ihiẹn ụnụ mẹ gi ọnụma m mẹ ụnụ ihiẹn lekẹ ebe ọkụn nọ a dụn, ọkụn wẹ jẹnkọlẹni d'e tinyụn.

Jerimaya 23:34

“Kẹ ndị-amụma kẹ ndị nchụn-ẹjan kẹ ndị-mmaka, hụn ọwụlẹ sị, ‘Osolobuẹ e buyegụọ m ibu amụma’, m sikọ d'e ye hụnyẹ lẹ ikpụlọ a ile afụnfụn.

Jerimaya 44:22

Makẹni Osolobuẹ asazịnị ẹka din eje-ihiẹn lẹ arụ ile ụnụ rị e mẹ haịn alị ụnụ gi nwan wụrụ ihiẹn wẹ gi a bụ ọnụ lẹ ebe gba okpokoro la iwi, alị ịhịan bizilẹni, k'o dọn rị tannị.

Jerimaya 5:29

Kị wụ nị eyekọ m wẹ afụnfụn ihiẹnni?” Ya kẹ Osolobuẹ ku; “Kị wụ n'e mẹgwarịkọ m alị nọ ẹnịna?

Jerimaya 5:9

Osolobuẹ sị, Kị k'e mẹ m eyelẹ wẹ afụnfụn a? Kị k'e mẹ m emẹgwarịlẹ alị nọ ẹnịna?

Jerimaya 8:12

Ifẹnrẹn eje-obibi wẹ hụdẹ e mẹ wẹ? Elebedẹ! Ifẹnrẹn arị wẹ ẹnya kaka! Wẹ ghadẹ e mẹ ẹ, e mẹ wẹ isi kan-kan-kan! Wẹ k'a nwụn nwan kẹ ndị ọzọ dọn nwụn; wẹ k'e ru alị ogẹn m'e gi ye wẹ afụnfụn.’ ” Ya kẹ Osolobuẹ ku.

Izikẹlụ 34:5

“ ‘A gbayịya wẹ makẹni onyẹ k'e duni wẹ arịa; eje-anụ ile rị ọfịa hụ e bu wẹ e ri.

Hosia 2:13

M k'e ye ẹ afụnfụn ọrọgbọ ile hụ o gi mụnị Baalụ ichẹn-ichẹn nsẹnsi; o gi rị e yi ihiẹn-ntịn a lẹ ihiẹn-mma a, a gbasọn ndị ya lẹ wẹ rị a sụọ — zọ mmẹ nwẹn. Osolobuẹ e kụgụọ a.

Maịka 7:4

Mma wẹ e mẹ nọ kẹ ogun; onyẹ hụn kụrụ ọtọ imẹ wẹ akanị ụgba ogun-lẹ-ọkịnkan mma. Kanị ogẹn ahụn ndị-nche ụnụ gwatọ ụnụ a bịagụọ, ogẹn m'e gi ye ụnụ afụnfụn; o sikọ d'a gba ụnụ ngharị-ẹnya!

Zẹkaraya 10:3

Olulu ndị-ndu ụnụ rị e bu m ọda-ọda, m k'e mẹshi ndị rị a kịgbu ụnụ ikẹn; makẹni Osolobuẹ ihiẹn ile rị okpuru ẹ e lepụ atụnrụn a wụ alị Juda ẹnya; m k'e gi wẹ họnrin ẹshin-agha m, ẹshin-agha nwọn ndụn wẹ e lee ile ọgbọ-agha.

Zẹkaraya 11:16

Makẹni, m rị nwan e wepụhanị alịnị onyẹ-ndu ọzọ, hụn nwọnlẹni ihiẹn ọ kpọ atụnrụn ndị rị a ẹka: kẹ wẹ rị a nwụn anwụn-o, ẹlẹ o k'a chọ n'ọ marịn; ẹlẹ o k'a chọ ndị kpahukọnị; ọ zụọkọ ndị rụ ẹhụ; o yekọ ndị rị ikẹn ihiẹn-oriri, kama, o bu ndị tutuni e ri, ọ fịọpụdẹ wẹ akpụkụ.

Matiu 25:36

a gba m ọtọ, ụnụ e ye m ẹkwa; emu a kụ m, ụnụ e lepụ m ẹnya; kẹ m rị ụlọ-ngan, ụnụ a bịa d'a hụn m.’

Matiu 25:43

a wụ m otumunyẹ, ụnụ anabanhannị m; a gba m ọtọ, ụnụ eyimẹni m ẹkwa; ogẹn emu gi kụ m lẹ ogẹn m gi rị ụlọ-ngan, ụnụ abịanị d'a hụn m.’

Jemisi 1:27

Ezigbo ofufe zu oke, rụlẹni ẹnya Osolobuẹ Nẹdi ẹnyi wụ hụnnị: ịtụnị ndị nwọnlẹni nẹdi mọbụ nnẹ lẹ ikpoho di wẹ nwụn rị e ri ụya ụya, lẹzi idọnmẹ enwẹn ịhịan makẹ ụwa gha e mẹrụ a.