Numbers 34:3 - Keley-i Bible (Antipolo Ifugao)

³ Ya pappeg tud appit ni south ey meippalpud Sin e eleg mebebleyi di pappeg ni Edom. Ya pappeg tud appit ni kasimmilin aggew ey meippalpud Netey ni Baybay.

Numbers 34:3 Iomraidhean Croise

Genesis 14:3

Humman idan liman patul ey impan-aaddum dadda sindalu dad etan di Nedeklandi Siddim e neihnup di Netey ni Baybay.

Exodus 23:31

Ihhammad kulli pappeg ni bebley ni lawwan yu e meippalpud Madlang ni Baybay ingganah di gilig ni baybay di Pilistia et mampalaw la etan di eleg mebebleyi ingganah di Wangwang e Euphrates. Baddangan dakeyun lawwan yudman ma-lat apputen yudda tuudman et degyunen yudda.

Ezekiel 47:13

Heninnuy hu kan Apu Dios e Eta-gey ni peteg ni meunnud ni pangkekeggadan idan etan ni hampulut dewwan helag Israel ni pengennadwaan dan puyek dan i-e-peng da. Kantuy “Emin kayu ey mahapul ni man-iingngeh hu puyek yun beltanen yu. Ebuh ida etan helag Joseph ni dewwa hu beltanen da. Humman dedan hu inhel kuddan aammed yu e tewwiden yun helag dadda huyyan puyek.

Ezekiel 47:8

Et kantuy “Huyyan danum ey impalaw di appit ni kasimmilin aggew di Wangwang e Jordan ingganah di Netey ni Baybay et hullulan tu hu danum ni neahinan et mambalin ni kayyaggud.

Numbers 13:21

Limmaw ida humman ni lalakki et ilepu dan man-ang-ang-ang di eleg mebebleyid Sin di Kanaan ingganah di Rehab e neihnup di Hamat.

Joshua 1:4

Ya pappeg ni iddawat kun pambebleyan yu, ey meippalpud desert di appit ni south ingganah di duntug di Lebanon di north, yad Wangwang e Euphrates di appit ni kasimmilin aggew et yad nampambebleyan idan Hittite, et mampalaw lad Baybay e Mediterranean di appit ni kelinnugin aggew.

Joshua 3:16

ey nebengbeng hu danum di nengin-ahpat di petek ni Adam e bebley ni neihnup di Sarethan. Et matduk etan danum et endi law hu danum ni mampellaw di Baybay e Neahinan et man-agwat idan emin di wangwang et lumaw idad demang ni Jericho.