James 1:10 - Keley-i Bible (Antipolo Ifugao)

¹⁰ Ey hi-gayun kedangyan, pan-am-amleng kayun nengipebabahan Apu Dios ni hi-gayu, et yan nunya law ey dakeyu katettebala gapuh ni yuka pengullug. Tep anin ni kedangyan et kamettey, e henin habung ni helek e hedin nakpit, man kame-gah.

James 1:10 Iomraidhean Croise

Job 14:2

Henidda etan ni habung e ma-nut nebekyag nem nekemtang ey nakling. Henin allinnew ni kulput e nekemtang ni attukaw la.

Psalms 102:11

Ya biyag ku ey henin allinnew ni kamangkelinnug hu aggew e anggegannuy attukaw la niya henin helek e kamekpit.

Psalms 103:15

Ya biyag ni tuud puyek ey henin helek e nekemtang ni ebuh hu tuka keteggui niya henin habung e anggegannuy attukaw e intayab lan dibdib.

Psalms 37:2

Tep humman idan tuu ey anggagannuy mettey idalli, heniddan helek niya intanem e mekling ida, ni netey ida.

Psalms 39:6

Ey henin allinnew e anin ni kaang-ang-anga et nekekemtang ni attukaw. Et humman hu, endi silbitu hedin ya keddangyanan di puyek ni ebuh hu an peppepdugen, tep eleg meamta hedin hipalli mengellan nunman ni kinedangyan ni kepappegan ni biyag.

Isaiah 40:6

Entanni ey wada immehel e kantuy “Tekuk ka!” Et kangkuy “Hipa ittetkuk ku?” Kan etan ni immehel ey “Itkuk mu e kammuy ‘Emin hu tuu ey henidda helek e kamettey. Ya dayaw da ey heniddan habung e anggegannuy neendi.

Isaiah 40:7

Kamekling hu helek niya kameplag hu habung hedin immandal Apu Dios. Hanniman dama kameippahding idan tutu-u.

Isaiah 57:15

Hi-gak etan eta-gey niya Kayyaggud ni peteg ni Dios ni wadan ingganah. Anin ni naka-itta-gey niya kayyaggud ni peteg hu kad-an ku, et mekihha-addak mewan idan tutu-un mampekumbabah niya mantuttuyyun liwat da, et wadaen ku mewan dinel da niya namnamah da.

Isaiah 66:2

Kaw beken ni hi-gak nanletun emin ni hipan wadad puyek niyad kabunyan? Ya kamengippeamleng ni hi-gak ey yadda daka pebabah annel da, yadda kamantuttuyyun nengipahdingan dan lawah, yadda kaumtakut, niyadda etan kamekangngu-unnud ni hi-gak. Hi-gak e hi Apu Dios hu nanghel idan nunya.

Matthew 5:3

“Man-am-amleng ida etan tuun kamengebbulut e eleg da han-ipahding hu kayyaggud hedin eleg ida baddangin Apu Dios, tep hi-gada hu meilla-kam di kapan-ap-apuin Apu Dios.

Matthew 6:30

Et humman hu, hedin hanniman kapemaptek Apu Dios idan habung ni wadan nunya, nem meeppuyan ni kabbuhhan, kaw beken ni nema-ma pemaptek tun hi-gayun tuu? Ey kele eleg kayu medinnel e ippaptek dakeyun Apu Dios?

1 Corinthians 7:31

Ey beken ida eya kamekapkapyad puyek hu pengikkahhakeyan tayun nemnem tayu, tep inamta tayu e ya puyek et yaddan emin eya wadad ya ey mepappeg.

Philippians 3:8

Makulug ni endi edum ni kekkeddukdul ni peteg nem ya pengamtaan kun Apu Jesus Christo. Huyya gaputun inwalleng kuddan emin ida etan nandinelan ku, et hi Jesus Christo law hu nakka iddinel. Eggak law iddinel hu nakka pengu-unnudin Tugun Moses, tep beken ida humman ni kapengippuunin Apu Dios ni pengebbulutan tun tuu. Yan nunya ey tuwak law kaibbilang nan Apu Dios ni kayyaggud tep ya nengulugan kun Jesus.

1 Timothy 6:17

Timothy, itugun muddan kekeddangyan e eleg da ippahhiya niya eleg da iddinel hu kinedangyan da, tep nelakah ni metellak hu kinedangyan. Nem hi Apu Dios hu mahapul ni iddinel da, tep hi-gatu kamengidwat ni emin ni kayyaggud ni pan-am-amlengan ni tuu.

James 4:14

Kaw inamta yu hedin hipa mekapkapyallin kabbuhhan winu edum alin aggew? Eleg yu amta. Tep ya biyag tayu ey heni be-haw, e wadan nunya, nem mekemkemtang ey attukaw la.

1 Peter 1:24

Em, makulug huyya, tep neitudek dedan e kantuy “Emin tuu ey heni helek e kamekpit ni netey. Ey emin hu kakeiddeyyawin tuu ey henin habung ni helek e hedin nakpit, man endi law, tep kame-gah.

1 John 2:17

Emin ida huyyan wadad puyek niyadda etan lawah ni kaamnawin tuun kaumhulun ni kapannemnemin lawah ey metellak idalli. Nem ya etan mengu-unnud ni pinhed Apu Dios ey wadalli biyag tun endi pappeg tu.