Nehemia 13:15 - Iaai Bible 1901 (New Caledonia)

¹⁵ Haba hnyi ûen eling oge me wâ hnyi Juda keihen adre me hlec wan vine hnyi sabath, me hok je bwiny hwit, me ohijenâ je asina; me waina minya, me je wan vine, me je wan meta, me je hok hia wale adre me sukhöûnâ Jerusalema ai hnyi bong sabath: ke oge me thawʼ ödrin hnyi bong ödrin e ûcû jeû hnyin.

Nehemia 13:15 Iomraidhean Croise

II. Man Ûlabainy Je Than. 24:19

Ke so bi e ame kunâ ködrin je perofeta, he ka ohmetu ödrin kö Iehova; me ödrin e siwhegi ödrin, ke ödrin e ca long bi.

Nehemia 10:31

me a ne hom tavat aten hnyei je omjeû me jeû hia hnyi bong sabath hnân ûcû, öhmun e ca he ka ûcû mödrin hnyi sabath, me ke bong adre okabâ: me öhmun e he ka hna degecâ hnyi huna a seveniny, me ca hnö je hna hok gufa hia.

Nehemia 10:32

Ke ohmun e otilâ hobi kohmun je hnanyibu, a hamöhmun he ka ve ham ke keihen a kuniny sekel hnyi ke huna me ke huna hobi kâu huliwa hnyi uma umen Khongutin;

Nehemia 13:16

Ke hu minya ke je at Turo adre me laba eling, hnyat adre me hom je wâ, me ta je ûnyi hia hnân ûcû, mʼ adre me ûco hnyi sabath me lakon Juda hnyi Jerusalema.

Nehemia 13:21

Ke oge me û ödrin, me ha ködrin, ka habe, Ieû ang gabun öbun e mokut hmelen hna up bak? öbun e ne helâe hmetu me oge me he ka kot öbun. Ke hwân e, ödrin e ca o hmetu bi hnyi sabath.

Nehemia 9:29

ke u je thawʼ ödrin, mʼ u me he ka ohmetu ödrin ka hnyi ânyâm hnanyibu: ke so bi ödrin e bi gan me ca long bi hnâm je hna hûna, ke ödrin e monu hnyi hnâm je hna owisa, (wale a ne ânyâ e ke at, me ame he ka möt hnen e,) ke ödrin e behânâ li abenyidrin, me ohwegiâ je nyidrin, me ca long bi.

Jobu 39:12

U me he ka labageju kâu a e ame he ka hom ânyâm hwit, Me hlo hwit hobi kâu umâm uma hnân huje hwit?

Salamo 50:7

Lakeik lö, long ju me inye he ka ha; Isaraela lö, long ju, me oge me he ka ha hnyikongom. Inya thibi Khong, wale Khongom.

Esodo 31:12

Ke Iehova ame ha kö Mose, ka habe,

Esodo 31:16

Anyin a wale ame he ka tuö sabath hnen lakon Isaraela, me ûnykûme sabath hnyi anyidra ta je dö hia, hnân ûhihinyköu nyiele balua.

Esodo 34:21

Siks ta bong u me he ka huliwa, ke hnyi bong a seveniny u me he ka menâ: u me he ka menâ hnyi ûen trohnen me menu.

Esodo 35:2

Siks je bong u me he ka huliwa hnyin, ke haba bong a seveniny ame he ka bong ae kap, a sabath hnân menâ kö Iehova: ke haba at ame he ka bi huliwa hnyi bong eling adre me he ka hlingâ.

Ta je Vejec 28:4

Haba tavat adre me degec hnanyibu, me adre me ogânâ tavat ae kong; Ke haba tavat adre me tuö hnanyibu, me adre me ivinoâ mödra.

Isaia 58:13

U je ne thawâ cam hnyi sabath, me ca ânyâ bi wem hnyi anyik bong ae kap; ke u me he ka ha ge sabath a bonginy senyin, me ha ge hna okabâ hnö Iehova a hnân ogânâ; ke u je ne ogânâ e, me ca vheno dem je gethen, me ânyâ ûnyi hnân osenyini u, me ca ha bi hwâm bi je hofuc:

Jeremia 17:24

Ke öbun e ne ti ling nya, haingö Iehova, me ca hom bi ke ûnyi ka hnyi je homagouleny taun ang hnyi bong sabath, ke öbun e ne okabâ bong sabath me ca huliwa hnyin e;

Jeremia 17:27

Ke öbun e ne ca ling nya he ka okabâ bong sabath, me he ka ca hije hok, me didro ka hnyi je homagouleny Jerusalema hnyi bong sabath; awe, oge me he ka hû meic hnyi ta je homagouleny e, ke ame he ka an je uma umen je than hnyi Jerusalema, ke ame ca he ka mok.

Jeremia 42:19

A hia but Iehova ha gabun, je kolon hnyi Juda, ka habe, Ca he öbun Aigupito ai: wâhmakhmeto ju a oge me ha hwegiâ köbun hnyi bong ang.

Ezekiela 20:13

Ke haba lap anyi Isaraela adre me ûkhin fuc mönya hnyi hnyebuba: adre me ca vheno anyik je hnanyibu, ke adre me hûkotiâ hnok je hna owisa, waleji a e ka he at ka mâdrâ, me ame he ka möt hnyin; ke adre me okongoâ gan hmâ anyik je sabath: me oge me ha a oge me he ka hingâlâ anyik hmönyin hudra hnyi hnyebuba, he ka ohiʼ ödra but.

Amosa 8:5

haingodra, ka habe, ame he ka um kehö manen a tehi, mʼ ate me ûcû anyita hwit? ke sabath, mʼ ate me khong tang hwit? ke adre me oûhnyûkongoâ efa kʼ adre ogânâ sekel, kʼ adre omono tulut ge iyawo:

Mika 6:3

Lakeik lö, ieû o ge ânyâ köu? ke ieû o ge osenyini u hnyin? khûö nya but.

Ta je huliwa 2:40

Haba Peteru ame khetâ, kʼ ame khöû kodra ge ta je hofuc ae se hia, haingen, ka habe, Omeli öbun dö ûnyi hnyi dö eang ae hwali.

Ta je huliwa 20:21

me ohnathoâ ka at Juda me at Heleni minya, a e so he ka ietra ka Khong me labageju ka Tuhöta a Iesu Keriso.

Galatia 5:3

Eke, inya hmetu oge me thumeto tavat hia adre kap hna peritom a gʼ ame hu hanymen kodra he ka long hoton hnanyibu hia thithö.

Efeso 4:17

Anyin a wale inya oge me ha me ohnatho ge Than, a öbun e ca he hmetu ka he helâ me Aten ke je hnyei, tavat adre me he hoton je hnyekudra ae ba onyen,

Deuteronomi 8:19

Ke u je ne hnying Iehova Khongom, me hnu hoton ke je khong bi, me bi athnyabaidrin, me khudrung ködrin, awe, inya oge me ha wia köbun hnyi bong ang a gʼ adre me he ka ohiʼ öbun.

I. Thesalonika 4:6

me me ca he ke at ka hanyâûâ, me okongoâ liamekeiny më hnyi ke ûnyi: anyin a Than at ame bi hwaban hnyi ta je ûnyi eling, helâji me hnöhmun hna ha ehac, me hna sihwegi Öbun wia.