Markás 10:14 - Hodáay Pákén Ketáb Balochi zobáná

¹⁴ Issáyá ke chosh dist nárazá but o gón moridán gwashti: “Chokkán bellét mani kerrá byáyant, áyáni démá madárét, chéá ke Hodáay bádsháhi anchén mardománig ent.

Markás 10:14 Iomraidhean Croise

Pédáesh 17:7

Man wati o tai nyámay ahd o paymáná abadmánén ahd o paymáné jórha kanán, gón taw o gón tai áyókén nasl o padréchá. Man tai Hodá án o cha taw rand tai poshpaday Hodá bán.

Zabur 78:4

Eshán cha áyáni chokk o nomásagán chéra nadayén, gón áyókén naslá Hodáwanday porshawkatén káráni kessahá kárén, Hodáwanday zór o twánay kessahá kárén o áiay kortagén ajabén mójezaháni kessahá.

Mattá 18:10

Hozzhár bét. Cha é kasánénán yakkéá ham kamarzesh mazánét o ér majanét. Man shomárá gwashán ke ásmáná esháni préshtag, modám mani ásmáni Petay chehragá gendant.

Mattá 18:4

Paméshká harkas watá é chokkay dhawlá békebr bekant, ásmáni bádsháhiá hamá cha sajjahénán mastera bit.

Mattá 19:14

Issáyá gwasht: “Chokkán bellét mani kerrá byáyant, áyáni démá madárét, chéá ke ásmáni bádsháhi anchén mardománig ent.”

Mattá 5:10

Bahtáwar ant hamá ke pa Hodáay ráhay geragá bohtám janag o ázár dayaga bant, chéá ke ásmáni bádsháhi hamáyánig ent.

Mattá 5:3

“Bahtáwar ant hamá ke áyáni ruh wár o bazzag ent, chéá ke ásmáni bádsháhi hamáyánig ent.

Markás 3:5

Issáyá pa zahr cháretant, chéá ke cha áyáni sengdeliá sakk padard but. Gón á mardá gwashti: “Dastá shahár day!” Áiá dast shahár dát o dasti wassh o dráh but.

Markás 8:33

Bale Issáyá chakk tarrént, moridáni némagá cháret o Petrosi hakkal dát o gwashti: “Oo Shaytán! Cha mani démá dur bay. Tai hayál Hodái hayálé naent, ensáni hayálé.”

Yuhanná 3:3

Issáyá áiay passawá gwasht: “Tará rásténa gwashán, tán kasé dobar pédá mabit, Hodáay bádsháhiá dista nakant.”

Yuhanná 3:5

Issáyá passaw dát: “Tará rásténa gwashán, tánke kasé cha áp o Ruhá pédá mabit, Hodáay bádsháhiá pád ér korta nakant.

Kásedáni Kár 2:39

Hodáwanday é labz o kawl éwak o tahná pa shomá naent, pa shomay chokk o óbádag o á dega durén hand o damagáni hamá mardomán ent ham, ke may Hodáwandén Hodá áyán wati kerrá tawára kant.”

Kásedáni Kár 3:25

Shomá nabiáni poshpad o hamá ahd o kawlay mirásdár ét ke Hodáyá gón shomay pet o pirokán kortagat, wahdé gón Ebráhémá gwashti: ‘Zeminay sajjahén kawm o kabilah cha tai nasl o poshpadá barkata gerant.’

Pulosay kágad pa Rumián 11:16

Agan homiray hamá chánag pák bebit ke awali bar o samar ent, gorhá bezán tarunay sajjahén nagan ham pák ant, agan risshag pák bebit thál ham pák ant.

Pulosay kágad pa Rumián 11:28

Bani Esráili wasshén mestágay hesábá, pa shomaygi Hodáay dozhmen ant bale gechénkáriay hesábá, á pa wati bonpirokáni háterá Hodáay dóst ant.

Pa Timutáusá Pulosay domi kágad 1:5

Tai bégarazén imánay yátá kapán ke awalá tai ballok Luis o tai mát Yunikahay delá jágahi kort o man deljam án ke nun tai delá ham jágahi kortag.

Pa Timutáusá Pulosay domi kágad 3:15

Tará sarjamén Pákén Ketábay zánt cha gwánzagá gón ent. É ketáb tará sarpad korta kant ke chón tará Issá Masihay sará imánay barkatá nejáta rasit.

Petrosay Awal Kágad 2:2

Nun ke shomá Hodáwanday néki o mehrabániay tám chashetag, nók pédá butagén nonnokáni paymá pa pák o ruhánién shirá shodig bebét tánke cha hameshiá dém pa wati rakkagá rodán bebét.

Elhám 14:5

Cha áyáni dapá hecch dróg dar nayátkag o bémayár ant.