Teacha 10:8 - Hawaii Pidgin Bible

⁸ You dig one deep hole, maybe you fall inside um. You dig thru one wall, maybe one snake bite you.

Teacha 10:8 Iomraidhean Croise

2 Samuel 17:23

Wen Ahitofel find out dat Absalom no do wat Ahitofel wen tell um fo do, Ahitofel saddle his donkey an go his house inside his home town. He make eryting ready so da peopo dat live wit him know wat fo do. Den, he go hang himself! Az how he mahke. His peopo bury him inside da tomb wea dey wen bury his faddah befo time.

2 Samuel 18:15

An ten a Joab army guys dat carry his body armor make one circle aroun Absalom, wack him some moa, an kill um.

Esther 7:10

So dey poke thru Haman body da long sharp pole dat he wen make fo poke um thru Mordecai body. Den da king no stay huhu no moa.

Songs 57:6

Da peopo dat stay agains me, Dey wen make ready One net fo catch me. Cuz a dat, I wen feel all bum out. Dey wen dig one big hole Wea dey know I goin go, But dey da ones Wen fall down inside dea! (Time out fo da music.)

Smart Guys 11:6

Da kine peopo dat do da right ting erytime Dey stay outa trouble cuz dey do like dat Da kine peopo dat you no can trus, Dey no can stay outa trouble, Cuz erytime dey like get any kine stuff.

Smart Guys 26:27

You dig one hole fo catch somebody, You da one goin fall down inside! You push one big rock fo smash somebody, You da one goin get smash!

Teacha 10:9

You cut out stones, maybe da stones hurt you. You split wood, maybe da wood hurt you too.

Amos 5:19

Fo you guys, goin be jalike dis—you go run away from da lion, An anodda kine wild animal goin catch you from da odda side! Den you go inside yoa house, An put yoa hand on top da wall fo res, An da snake bite you!

Amos 9:3

No matta dey go all da way on top Mount Carmel An hide ova dea fo nobody see um, I goin find um an drag um back. No matta dey stay hide from me on da bottom a da ocean, I goin tell da big sea monsta wat fo do An he goin go afta um an bite um.

Local Leadas 9:5

He go his faddah house inside Ofrah town, an on top one big rock he kill his seventy half braddahs, Jerub-Baal boys. Ony Jotam, Jerub-Baal younges boy, get outa dea an hide.