Matthew 6:10 - Hawaii Pidgin Bible

¹⁰ We like you come da King fo erybody. We like erybody make how you like, Ova hea inside da world, Jalike erybody up dea inside da sky Make how you like.

Matthew 6:10 Iomraidhean Croise

Nehemiah 9:6

“You Da One In Charge, you da ony one! You wen make da sky, an even da mos high part a da sky. You wen make da sun an da moon an all da stars, jalike one army. You wen make da world an eryting dat stay live on top. You wen make da ocean an eryting dat stay inside dea. You da one dat wen make all da animals an plants an fish an peopo stay alive, An erybody dat stay inside da sky stay show you love an respeck!”

Songs 2:6

“No matta wat you guys tink, I awready wen give My king guy da powa Fo stay in charge fo me! He da king on top Zion Hill, Jerusalem town, On top da mountain Dass spesho fo me!”

Songs 40:8

You my God, An wen I do wat you like fo me do, Dat make me come good inside! Da Rules you teach stay inside me.

Isaiah 2:2

Bumbye, wen da world almos pau, God goin make da hill wea da Temple Fo Da One In Charge stay, Come da mos importan place in da whole world, Mo importan den da odda hills. Den all da peopo from odda countries Goin come dea.

Jeremiah 23:5

Da One In Charge tell: “An you know wat?! Da time goin come bumbye Wen I goin do dis fo King David: I goin make one guy from King David blood line Come da king. Jalike King David da Root An dis guy da New Branch dat come out from him, One guy dat goin do wass right erytime. He goin be da kine king dat know how come stuff happen. He goin keep all da rules An do wass right inside da land.

Daniel 2:44

“Da time numba four kine govmen get powa, God Inside Da Sky goin set up anodda kine govmen. Dat govmen, no goin come wipe out eva, an odda peopo no goin get um. Dey goin smash all da odda kine govmens, so dey no mo powa. An dat govmen, goin stay solid foeva.

Daniel 4:35

All da peopo inside da world, God see um, jalike dey notting. He do wateva he like do Wit da armies from inside da sky, An da peopo inside da world. No mo nobody can hold him back O aks him how come he do dat.

Daniel 7:13

“Den, still inside my dream nite time, I wen see, Right dea in front me get somebody Dat look jalike one real kine guy! He stay come from da clouds inside da sky, Fo go by Da One Dat Stay From Befo Time. Da peopo dea bring da one dat look Jalike one real kine guy In front Da One Dat Stay From Befo Time.

Daniel 7:27

Den, da God Dass Mo Importan Den All Da Odda Gods goin give da peopo dat stay spesho fo him da powa fo come da nex king an da powa fo stay in charge a da peopo. An da God Dass Mo Importan Den All Da Odda Gods goin give his kings powa ova da odda kings all ova da world. Dey goin stay in charge foeva. All da countries on top da earth goin work fo God peopo, an all da odda peopos goin lissen dem.’

Zekariah 9:9

Stay good inside, my Zion peopo! Yell, my Jerusalem peopo! Look! Yoa king stay come by you! He erytime do da right ting. He get you guys outa trouble! He make nice kine to erybody, An stay ride on top one donkey, even one young donkey.

Matthew 12:50

Cuz whoeva do da tings my Faddah in da sky tell um fo do, dey my braddah an my sistah an my muddah.”

Matthew 16:28

Dass right! An I like tell you guys dis too: I da Guy Dass fo Real, an get some peopo stay stan ova hea, dat no goin mahke till dey see me come King.”

Matthew 26:42

Den Jesus pray to God one mo time an tell, “Faddah, if dis kine suffa no can go way from me, az okay, I still yet goin do um. I like do da way you like me fo do um.”

Matthew 3:2

He tell, “You guys gotta come sorry fo all da kine bad stuff you stay do now, an no do um no moa. Cuz God in da sky stay King hea now.”

Matthew 4:17

Dass wen Jesus start fo teach da peopo. He tell, “You guys gotta come sorry fo all da kine bad stuff you stay do, an no do um no moa, cuz God in da sky stay King hea now.”

Matthew 7:21

“Goin get peopo dat stay tell me, ‘Eh Boss! Boss!’ But not all a dem goin get God in da sky fo dea King. Ony da peopo dat do wat my Faddah in da sky like, dey goin get him fo dea King.

Mark 11:10

God goin do good kine stuff fo us! He goin give us one King jalike King David, Oua ancesta guy! God in da sky, He goin take us outa da bad kine stuff we stay in!”

Mark 3:35

Whoeva do wat God like, dey my braddah an sistah an muddah!”

Luke 19:11

Da peopo hear wat Jesus tell. Den Jesus tell um anodda story, cuz he stay nea Jerusalem, an da peopo figga dat God goin come king real fas ova dea.

Luke 19:38

Dey tell, “God goin do plenny good kine stuff fo dis guy! He da King dat come fo Da One In Charge! Eryting stay good wit God an da peopo. God in da sky, he awesome!”

Luke 22:42

like dis: “Faddah, if you like, no let me suffa lidis. But gotta be da way you like, not da way I like.”

John 4:34

Jesus tell, “I do wat God like, an I do all his work. Dass jalike food fo me.

John 6:40

Jalike I wen tell: dis wat my Faddah like, da One dat sen me: Erybody dat see me his Boy, an trus me, dey goin get da real kine life dat goin stay to da max foeva! An I goin make dem come back alive wen da world goin come pau.”

John 7:17

If anybody like do wat God like um fo do, dey goin know if da stuff I stay teach come from God, o if ony come from my head.

Jesus Guys 13:22

Den God take Saul away, an make David dea king. God tell bout David, ‘I see David, Jesse boy. He da kine guy dat make me stay good inside. He do all da kine stuff I like him fo do.’

Jesus Guys 21:14

Us no can make Paul stay, az why we pau try change his mind. An we tell, “Wat Da One In Charge like, dass wat goin happen.”

Jesus Guys 22:14

He tell, ‘Da God dat us guys an oua ancesta guys pray to, he wen pick you fo know wat he like do, an fo see Christ, da Guy Dat Stay Do Wass Right, an fo hear wat he tell.

Rome 12:2

Eh! No do wat da peopo nowdays stay tell you fo do! Mo betta, you guys let God make you guys tink diffren kine inside, fo you tink diffren bout eryting. Den you can figga wat God like you fo do. An da ting God like you fo do, stay good, make God stay good inside, an erytime stay perfeck.

Efesus 6:6

No good if you ony do yoa work if yoa boss stay watch you, o fo make peopo feel good bout you. Mo betta you do wat God like you fo do cuz you like do um cuz Christ da One you stay work fo.

Colosse 1:9

Dass why we still yet stay pray fo you guys, from da firs time Epafras wen tell us how you guys stay. We tell God fo give you guys all da tings you guys need fo find out wat he like you guys do. Den you guys goin know wat fo do ery time, an God Spirit goin help you guys undastan da whole ting.

1 Tessalonika 4:3

Now dis wat God like fo real kine. He like you guys be good an spesho fo him, an no go fool aroun da guys o da wahines.

1 Tessalonika 5:18

No matta wat happen, tell God “Mahalo plenny!” Dass wat God like fo you guys do cuz you guys stay tight wit God Spesho Guy Jesus.

Hebrews 1:14

All da angel guys, dey da good spirits dat work fo God. He sen um all ova fo help da peopo come outa da bad kine stuff dey stay do cuz dose peopo his kids.

Hebrews 10:36

You guys gotta hang in dea. An afta you guys do eryting dat God like you guys fo do, den bumbye you guys goin get da stuff he wen promise.

Hebrews 10:7

Den, dis wat Christ tell: ‘Eh, God! I stay hea! I wen come fo do wat you like me fo do, Jalike yoa Book tell bout me.’ ”

Hebrews 13:21

So, I like God make you guys ready fo do eryting good dat he like you guys fo do. I like him fo do stuff inside us guys dat make him stay good inside. He do dat cuz Jesus Christ give us da powa dat we need. An I like fo erybody tell how awesome Jesus stay, foeva an eva! Dass it!

1 Peter 2:15

Dass why God like you guys fo do da good kine stuff fo da guys dat donno notting an no tink right, so no mo nobody can poin finga you.

1 Peter 4:2

Az why you guys, all da time you stay inside dis world, you no goin like do da bad kine stuff da odda guys like do cuz dass how dea body like do. But fo you guys, you ony goin do wat God like you fo do all da time you live inside yoa body.

Jesus Show 11:15

Den da numba seven angel guy blow his trumpet. Had real loud voices come from da sky. Dey tell, “Now da time! God an his Spesho Guy Christ get da powa Fo take ova an be King ova all da peopos inside da world. Dey goin lead da peopo foeva an eva!”

Jesus Show 12:10

Den I hear one loud voice inside da sky dat tell, “Now da time! God goin take us outa da bad kine stuff we stay in! An show us dat he da King, An he get all da powa! His Spesho Guy Christ get da right fo lead erybody! Cuz da Bad Guy dat wen poin finga Oua braddahs an sistahs all day an all nite, God throw him down hea awready on top da earth.

Jesus Show 19:6

Den I hear someting dat soun like get plenny peopo making big noise, jalike big watta pounding, an jalike loud thunda. Dey tell, “God, he da greates! Hallelujah! Cuz he Da One Dat Stay In Charge, An he da King ova erybody! He Da God Dat Get All Da Powa!

Jesus Show 20:4

Den I spock plenny throne. On top get da peopo dat God wen give da powa fo come judges. Dey da one dat wen tell bout Jesus, an tell wat God wen tell, an odda peopo wen cut off dea heads cuz a dat. An I see how dey stay inside. Dey neva show love an respeck fo da Wild Animal o his statue, an dey neva get his mark on top dea forehead o dea hand. Dey come back alive one mo time, an dey stay in charge wit God Spesho Guy, da King, fo da tousan year.