Mark 2:24 - Hawaii Pidgin Bible

²⁴ But had Pharisee guys ova dea dat tell Jesus, “Hala! Dese guys, you stay teach dem, but still yet dey stay do da kine stuff dey not suppose to do on da Res Day!”

Mark 2:24 Iomraidhean Croise

Outa Egypt 20:10

But da Numba Seven Day, dass da Res Day. Stay spesho fo me, yoa God, Da One In Charge. Dat day, no do work notting—you, yoa boy, yoa girl, yoa slave guy, yoa slave wahine, yoa animals, da visita guy from anodda place dat stay yoa town, erybody!

Outa Egypt 31:15

Get six days fo work an do eryting you gotta do. But da day numba seven, dass da day fo no work an no do notting, ery week. Dat day, spesho fo me, Da One In Charge. Anybody go work da Res Day, gotta mahke.

Isaiah 56:2

Whoeva stay do da right ting erytime, An whoeva go all out fo stay lidat, Dey can feel good inside. Same ting, fo whoeva make da Res Day spesho fo me, An no broke um, An whoeva make shua fo no do notting bad kine, All dem goin feel good inside too.

Isaiah 56:4

“Cuz dis wat Da One In Charge tell he goin do Fo da guys dat no can make kids, But still yet dey show respeck fo da Res Day Cuz dey my guys, An dey do wat I like um fo do, Cuz dass wat dey pick fo do, An dey stick wit da same deal Dat I wen make wit my peopo.

Isaiah 56:6

Same ting fo da peopo dass not one Jew, But dey come tight wit me, Da One In Charge, Fo be my helpa guys, An get love an aloha fo me Cuz dey know wat kine god me, An come my worka guys. All da ones dat make da Res Day spesho fo me, An no broke da Rules fo da Res Day, An dat stick wit da same deal Dat I wen make wit my peopo,

Isaiah 58:13

“You guys gotta make da Res Day spesho fo me. An no go any place mo far den you suppose to go, An no jus do wateva you like do dat day, Cuz da whole day stay spesho fo me. You guys gotta tell peopo Dat da Res Day make you feel good inside, An dat stay spesho ony fo me, Da One In Charge, Fo show respeck fo me lidat. Dis, how you goin show respeck fo da Res Day: You no goin do stuff yoa way dat day. You no goin look fo ony da kine stuff you like do. You no goin talk any kine wase time stuff,

Matthew 12:2

But had Pharisee guys ova dea dat see um do dat, an dey tell Jesus, “Eh, how come! Dese guys, you stay teach dem, but still yet dey stay do da kine stuff dey not suppose to do on da Res Day!”

Mark 2:16

Had some Pharisee guys dea dat teach da Rules From God. Dey see Jesus dea stay eating wit all da tax guys an odda kine peopo dat get one bad rep jalike dem. Az why dey tell Jesus guys, “Eh, yoa teacha, how come he stay eating wit da tax guys an odda kine peopo dat get one bad rep?”

Mark 2:25

Jesus tell um, “Wot! You guys neva read inside da Bible wat King David wen do wen him an his guys was hungry?

Mark 2:7

“Eh! Who dis guy fo talk lidat! He talk bad bout God! Ony God can let da guy go an hemo da shame fo da bad kine stuff!”

Hebrews 12:3

So tink plenny bout Jesus! How he wen hang in dea an no give up wen all kine bad stuff from all da bad peopo go agains him. If you guys tink bout Jesus lidat, den you guys no goin get tired an lose fight.