Joshua 4:6 - Hawaii Pidgin Bible

⁶ Da stones goin be jalike one sign fo you guys. Bumbye, wen yoa kids aks you guys, ‘How come get dese stones?’

Joshua 4:6 Iomraidhean Croise

Songs 44:1

Eh God! Us guys wen hear da stories Dat oua ancesta guys wen tell Bout all da tings you wen do befo time. Dass was long time befo time Wen dey stay alive.

Songs 71:18

No matta I ol awready an get gray hair, God, no dump me, Till I pau tell da kids How strong you stay, An tell all da ones Dat goin born afta dem, Da kine powa you get.

Outa Egypt 12:14

“Da day I do dat, goin come one spesho day ery year, fo you guys no foget how I pass ova you guys an no wipe you out. From dat day, ery year, you guys goin make spesho trip fo make one religious kine ceremony fo me, Da One In Charge. You guys, yoa kids, an dea kids goin do dat foeva. Az goin be one rule bout how you guys goin make fo me foeva, da Passova Time.

Outa Egypt 13:14

“Bumbye, yoa boy goin aks you, ‘Eh Daddy! Wat all dis ting mean, fo buy um back fo make one sacrifice?’ “You goin tell um, ‘Cuz you know, my boy, Da One In Charge get plenny powa, an he wen use um dat time fo get all us guys outa Egypt cuz us was slaves ova dea.

Outa Egypt 13:9

“Dis ting dat you do, goin be jalike one mark on top yoa hand fo help you no foget. Goin be jalike someting you tie on top yoa forehead fo help you no foget notting. Dass so you goin talk foeva bout da Rules from Da One In Charge, cuz Da One In Charge wen use his powa fo you guys come outa Egypt.

Outa Egypt 31:13

“Tell da Israel peopo dis: No matta wat happen bumbye, you guys gotta do wat da Rules fo da Res Day tell foeva. Da Res Day, goin show dat me an you guys get one deal. Even da peopo dat goin come from you guys. So den you guys no goin foget was me, Da One In Charge, dat wen make you guys spesho fo me.

Isaiah 38:19

Da peopo dat stay alive, Dey da ones tell dey know how awesome you, Jalike I stay do today. Da faddahs make shua dea kids know How you do wat you tell you goin do.

Isaiah 55:13

Goin get pine tree Wea befo time get ony thorn bush, An flowa bush, Wea befo time get ony thistle. Dass how all dis goin happen, Fo erybody know wat kine god Da One In Charge. Goin stay lidat foeva, Jalike one sign dat nobody goin bus up eva.

Ezekiel 20:12

An I give dem da days dat stay spesho fo me too fo stay jalike one sign fo dem an fo me. Make shua dey no foget was me, Da One In Charge, wen make da days spesho fo me.

Ezekiel 20:20

Make da days dat stay spesho fo me, come real spesho fo you, fo dem be jalike one sign fo tell dat me an you stay tight wit each odda. Den you goin know dat me Da One In Charge, I yoa God.

Census 16:38

Pick up da fire pans dat da guys use dat wen do bad kine stuff, an dey mahke cuz a dat. Pound da pans wit hammas fo make big metal sheets fo cova da outside a da altar wit um. Cuz dose guys wen use da fire pans wen dey come in front me, Da One In Charge. Dass why da fire pans come spesho fo me. So put da metal from um on da outside a da altar, fo stay jalike one sign fo da Israel peopo.”

Jesus Guys 2:39

He wen promise all dat fo you guys an yoa kids, an fo all da peopo dat no stay tight wit God—all da ones Da One In Charge goin tell fo come to him, dass oua God.”

Rules Secon Time 11:19

Teach um to yoa kids. Talk bout um erytime, wen you guys stay inside yoa house, wen you walk on top da road, wen you lay down, an wen you get up.

Joshua 22:27

But dis altar goin be one ting dat make you guys an us guys no foget dis: us guys get da right fo go down in front Da One In Charge fo show love an respeck fo him, ova dea by his Tent. An same ting fo oua kids bumbye, us guys goin go ova yoa side fo make burn up kine sacrifices an regula sacrifices an sacrifices dat tell dat Da One In Charge an us stay good.’ Den bumbye yoa kids no goin tell oua kids, ‘You guys no mo da right fo go down in front Da One In Charge ova hea.’

Joshua 4:21

He tell da peopo, “Bumbye, wen yoa kids aks dea faddah guys, ‘How come get dese stones?’

Joshua 4:5

an he tell um, “Go ova in front da Box Fo No Foget Da Deal Da One In Charge Wen Make. Go by da middo a da Jordan Riva, an all you guys lif up one stone on top yoa shoulda, one stone fo ery Israel ohana.