Joshua 3:13 - Hawaii Pidgin Bible

¹³ Da pries guys dat carry Da Box Fo Da One In Charge, da Boss fo da whole world, goin go stan inside da Jordan Riva watta. Wen dey do dat, da watta dat stay come down da riva goin stop! Da watta goin stay dea an pile up!”

Joshua 3:13 Iomraidhean Croise

1 Records 29:11

You da One stay real importan. You strong. You stay awesome. You da winna foeva! You stay unreals, Cuz you own eryting inside da sky an on top da earth. Da One In Charge, you get da right fo stay in charge a eryting! You get da right fo be da main One, dat stay ova eryting!

Songs 33:7

He bring togedda da watta Inside da ocean an keep um dea, Jalike he put da open ocean Inside one storage place.

Songs 74:15

Was you wen open up da pukas Fo watta come outa da groun An split da valleys fo da streams. Was you wen dry up da rivas Dat get watta all da time.

Songs 78:13

God wen split open da Red Sea An take da peopo thru da middo To da odda side. He wen make da watta pile up Dis side an dat side Jalike had one dam dea.

Outa Egypt 15:8

You blow, an da watta pile up. Da flood watta stan up strait, Jalike get one wall fo da waves. Inside da deep sea, Jalike da watta come solid.

Isaiah 54:5

Az cuz fo my peopo, You jalike da wahine dat get husban now— Cuz jalike I yoa husban, Da One wen make you! Me, Da One In Charge, Da God Ova All Da Armies, Dass my name! I da One dat pay da price Fo get you outa trouble, I Da Good An Spesho God Fo da Israel peopo! Da God Fo Da Whole World, Dass wat dey call me!

Habakkuk 3:15

You drive yoa horses all ova da ocean. An da big watta come white jalike stay boil.

Zekariah 4:14

So he tell me, “Dese branches, dey da two guys dat Da One In Charge wen pick. He put olive oil on top dea heads fo show dey work fo him, da Boss fo all da world.”

Joshua 3:11

Look ova dea! Az da Box Fo No Foget Da Deal from da Boss fo da whole world! Da pries guys goin carry dat Box across da Jordan Riva, den you guys goin go across.

Joshua 4:7

Tell um, ‘Wen da pries guys take Da Box Fo No Foget Da Deal Da One In Charge Wen Make an go cross da Jordan Riva, da riva wen pau run. Dese stones goin be jalike one sign fo da Israel peopo, fo no foget foeva wat wen happen hea.’ ”