Joshua 24:19 - Hawaii Pidgin Bible

¹⁹ Den Joshua tell da peopo, “You guys no can work fo Da One In Charge! He stay good an spesho, an he God. He one jealous God. He no goin hemo yoa shame an let you guys go, cuz you go agains him an do bad kine stuff!

Joshua 24:19 Iomraidhean Croise

2 Records 36:16

But dey ony make fun a his messenja guys. Dey tink eryting God tell ony junk. Dey laugh at da guys dat talk fo God. Dey stay make lidat, till Da One In Charge come real huhu wit his peopo, an no mo notting can make him no punish da Judah peopo.

Songs 99:3

Good, all da peopos tell, “You, da mos importan one! You awesome!” Cuz dey know wat kine god him, An dey get choke respeck fo him. Da One In Charge, he good an spesho.

Songs 99:5

Dass why I tell, “Tell erybody Dat oua God, Dass Da One In Charge a us, He da greates! Bow down in front him, Wea he sit on top his throne! Cuz Da One In Charge, He good an spesho!”

Songs 99:9

All you peopo, tell erybody dat oua God, Dass Da One In Charge a us, He da greates! Go down in front him, On top da hill dat stay spesho fo him, Cuz oua God, Da One In Charge a us, He good an spesho!

Outa Egypt 20:5

No go down in front da odda gods fo show um love an respeck, an no work fo dem. Cuz I yoa God, az me, Da One In Charge! An if you go down in front da odda gods, I one jealous God! Az why I goin punish da peopo dat do bad kine tings an da ones dat hate me. An if dea kids do da same ting, I punish dem too, an same ting wit dea grankids, an even dea great-grankids.

Outa Egypt 23:21

Make shua you lissen him good wen you wit him, an do wat he tell you fo do. No go agains him wit bad attitude. Cuz if you guys go agains wat he tell, he goin had it wit dat cuz he get his powa from me.

Outa Egypt 34:14

No go show love an respeck fo any odda god, ony fo me. Cuz me Da One In Charge, da one dey call Da Jealous God, an I one God dat go all out fo keep my good rep. I not like da odda gods!

Outa Egypt 34:7

Wen I make one promise fo stay tight wit one ohana, I stay tight wit even da kids, an dea kids, An all da peopo dat come afta dem fo tousan generation. I let peopo go an hemo dea shame Fo wen dey do da wrong ting an go agains me an do bad tings. Still yet, if somebody need fo me punish dem, I punish dem. An if dea kids do da same ting, I punish dem too, an same ting wit dea grankids, An even dea great-grankids!”

Isaiah 2:9

But now, erybody goin come shame. Dey no goin get big head no moa. Eh! You Da One In Charge! No let go dat kine peopo!

Isaiah 27:11

Da Israel peopo, dey jalike small branches From da trees dat come dry an dey broke. Da wahines come pick um up fo make fire. Az cuz da Israel peopo, dey not da kine peopo Dat undastan stuff, Dass why God dat wen make dem No feel pity fo dem. He no like do notting fo dem.

Isaiah 30:11

Go find anodda way fo how you talk! Go pick one diffren road! No tell us we gotta come in front God, Da One dat stay good an spesho fo da Israel peopo!’ ”

Isaiah 30:15

But dis message come from Da One In Charge a me, Da One dat stay good an spesho fo da Israel peopo: “Fo you guys get outa trouble, You gotta come back my side, Fo come so notting bodda you. Fo you guys come strong inside, You gotta stay quiet an trus me.” But you guys still no like lissen!

Isaiah 5:16

But Da One In Charge, Da God Ova All Da Armies, Cuz he stay judge da right way, Peopo goin know how big him! Him, da God dat stay good an spesho! Peopo goin know how spesho he stay Cuz he do da right ting erytime!

Prieses 10:3

Den Moses tell Aaron: “Dis wat Da One In Charge stay talk bout wen he tell: ‘Wen pries guys come nea me, I goin show um I stay good an spesho. In front all da peopo, dey goin show plenny respeck fo me.’ ” But Aaron no say notting.

Prieses 11:44

Cuz me, I yoa God, Da One In Charge. Come spesho fo me, an stay spesho fo me, cuz I stay spesho. No make um so you no can come in front me, cuz you touch any a da small animals dat run aroun togedda on top da groun.

Prieses 11:45

Me, Da One In Charge, da One wen bring you guys outa Egypt, fo me come yoa God. Az why you guys gotta stay spesho fo me cuz I stay spesho.

Prieses 19:2

fo tell all da Israel peopo dis: “You guys gotta ack good an spesho, cuz I yoa God, Da One In Charge, an I stay good an spesho.

Prieses 20:26

You guys suppose to be spesho fo me, cuz me Da One In Charge, an I stay good an spesho. I make you guys diffren den da odda peopos fo come mines.

Prieses 20:7

“Go come good an spesho fo me, cuz I yoa God, Da One In Charge.

Nahum 1:2

Da One In Charge, da Boss, He one jealous God. He no like fo peopo pray to odda gods. He pay back peopo fo wat dey do. He stay real huhu. Fo shua, he pay back da peopo dat stay agains him. He had it wit wat da peopo do dat go agains him.

Habakkuk 1:13

You stay good an right. Wen you see peopo do bad kine stuff, You no tell az okay. You tell “Laytas” to eryting dass wrong! So den, how come you let da bad peopo Make one plan fo set up peopo dat trus dem? Wen dey scam da peopo Dat do wass right mo den dem, How come you no tell notting?!

Matthew 6:24

“Nobody can work fo two boss guys dat own him. He goin like lissen one boss an den hate da odda. He goin like stay tight wit one boss an figga da odda guy no good. Same ting, you guys no can work fo da real God an da money god.

Joshua 24:18

Den Da One In Charge wen push out all da peopos in front us, even da Amor peopo dat wen live dis land. We goin work fo Da One In Charge too, cuz he oua God.”

Joshua 24:23

Joshua tell: “Kay den. Throw out da idol kine gods from odda peopos dat you guys get! Go all out fo Da One In Charge, da God fo da Israel peopo!”

Ruth 1:15

Naomi tell her, “Eh look! Yoa sistah-in-law, she go back awready by her peopo an da god she pray to. Mo betta you do da same ting.”

1 Samuel 3:14

Az why I wen make dis strong promise to da Eli ohana: ‘Da Eli ohana get da blame foeva, fo da bad kine stuff dey wen do, an I no goin let um go. No matta dey make da right kine sacrifice, I no goin let dem come pono wit me no moa.’ ”

1 Samuel 6:20

Da Bet-Shemesh peopo aks each odda, “You tink get one pries dat can stan in front Da One In Charge, dis God dat stay good an spesho? Who we can sen da Box to fo get um away from us guys awready?”