Jeremiah 3:6 - Hawaii Pidgin Bible

⁶ Da time Josiah stay king, Da One In Charge tell me, “You see wat da Israel peopo wen do? Dey ack jalike one wahine dat no stay tight wit her husban. Dey go up on top all da high hills an unda ery tree dat get big shade, an go fool aroun dea in front da odda gods, jalike da hoaz.

Jeremiah 3:6 Iomraidhean Croise

1 Kings 14:23

Dem guys make spesho kine places on top da high part a da hills fo make sacrifice, an dey stan up big stones fo make places fo pray, an put poses fo pray to da wahine god Asherah, on top da high part a ery hill an unda ery big tree dat get plenny leaf.

2 Records 34:1

Josiah eight year ol wen he come king, an he stay king inside Jerusalem thirty-one year.

Songs 106:39

Cuz a da tings da Israel peopo wen do, Dey come pilau. Az why dey no can pray. Da way dey ack, Jalike dey hoaz.

Isaiah 57:3

But you guys, come ova hea! Yoa muddah guys, dey go call da spirit From da mahke peopo Fo come tell um wat goin happen bumbye, An dey fool aroun fo money! Yoa faddah guys, dey stay fool aroun Wit wahines dey no stay married to!

Isaiah 57:7

You guys, jalike one wahine Dat put her bed on top one real high mountain. An den she go up dea fo make sacrifice an make sex. An you guys, you do da same ting too.

Jeremiah 1:2

Wen Amon boy Josiah stay king fo da Judah peopo fo thirteen year, Da One In Charge give one message fo Jeremiah tell, firs time.

Jeremiah 11:10

Dey stay make jalike befo time an do wass wrong. Dey do same kine ting dea ancesta guys wen do. Dea ancesta guys neva like lissen wat I tell. An now, dese guys stay tight wit odda gods an work fo dem. Da Israel an Judah ohanas wen broke da deal I wen make wit dea ancesta guys.

Jeremiah 17:2

Even dea kids no foget fo pray in front da altars fo odda gods, An in front da tiki poses fo da idol kine wahine god Asherah, An undaneat ery big tree dat get plenny leaf An on top da high hills.

Jeremiah 3:8

An da Judah peopo wen see dat I wen cut off da Israel peopo, jalike I give um one divorce paypa an sen um away, cuz dey ack jalike one wahine dat no stay tight wit her husban an fool aroun wit da odda gods. But I see dat dea sistah guys, da Judah peopo, dey no stay tight wit me too. Dey no sked fo make jalike one wahine you no can trus, an go fool aroun wit da odda gods too, jalike da wahines dat fool aroun fo money.

Jeremiah 31:22

How long you guys goin wait An donno wea you stay going Befo you make up yoa mind?! You Israel guys jalike da daughtah dat I love, Dat befo time, wen ack Jalike one wahine dat no stay tight wit her husban. Az how me, Da One In Charge, goin do one new ting on top da earth fo change eryting— Jalike if da wahines wen take kea da guys.”

Jeremiah 5:11

Da Israel ohana an da Judah ohana, Da way dey ack, no way I can trus dem!” Az wat Da One In Charge tell.

Jeremiah 7:24

“But my peopo, dey no lissen, o tink bout wat I tell. Dey hard head, an dey do wat dea bad heart like do. Dey suppose to go one way, an dey go da odda way,

Ezekiel 16:31

Befo time you wen make one dirt mound fo build one altar fo da idol kine gods, da top a all da streets an inside ery town square. But dat time, you neva make jalike one hoa, cuz you wen make sex but you neva take money fo do dat.

Ezekiel 16:35

“ ‘Eh, you Jerusalem peopo dat fool aroun wit da odda gods jalike one hoa! Lissen wat me Da One In Charge, da Boss, tell!

Ezekiel 20:28

I wen bring dem inside da land dat I wen make one strong promise fo give dem. But den, erytime dey see one high hill o one tree wit plenny leafs, dass wea dey make dea sacrifices dat make me come huhu. Dass wea dey put out dea stuffs dat smell nice an make you feel good. Dey pour out dea drink sacrifice dea too.’

Ezekiel 23:11

“Oholibah wen see wat happen to her sistah Oholah. But cuz she get da hots fo fool aroun mo den Oholah, she come mo pilau den her sistah.

Ezekiel 23:4

Da older sistah get da name Oholah, an her sistah Oholibah. I wen marry dem, an dey born boys an girls. Oholah, she Samaria town, an Oholibah, she Jerusalem town.

Hosea 11:7

My peopo go all out fo tell ‘Laytas’ to me. Even wen dey call me Da Mos Importan God, Dey no mo respeck fo me.

Hosea 4:13

Dey make sacrifice on top da mountains. Dey burn incense on top da hills, Unda da oak tree, da poplar tree, an da terebint tree, Dey do um wea get good shade. “Az how come yoa girls come hoaz, An az why yoa daughtah-in-laws go fool aroun Behind dea husban back.

Local Leadas 2:17

But still yet dey no lissen dea local leada guys. Dey fool aroun wit da odda gods, an go down in front dem. Dey no make jalike dea faddahs, but real fas dey tell “Laytas” to da way dea faddahs wen live, cuz dea faddahs wen lissen wat Da One In Charge tell um fo do.