Ruma 8:3 - Hanunuu

³ Binwat Diyus ti unman nabuwat Kasuguan dahil sa kalumuyan nita pagkatawu. Sinugu niya kay sadili Anak ga histuda tawu makasalanan hampay ipakaun niya kay buhi sa kamatayan dahil sa kasalanan. Sa katida pag paraan nasintinsiyahan niya ti kasalanan nangulian sa tagipusuun manga tawu.

Ruma 8:3 Iomraidhean Croise

Bilang 21:9

Nakan nanmuwat si Muysis ulay galang ag itinur-ug sa suru usa ka tulduk. Ag una si unu ti kinagat ulay nagbantay lang sa ulay galang balaw namatay.

Bilang 28:22

Paghandug diman kamu usa ka lalaki kambing bilang handug sa paglumpiyu hampay mapatawad kanyu manga kasalanan.

Markus 15:27

May duwa ka tulisan kay kadungan ni Hisus ipinaku waydi sa kurus, ti usa sa sikun baliwa pag kurus, kay usa sa wala baliwa pag kurus.

Huwan 1:14

Nagpakatawu ti Bagaw, ag nangulian siya sitay sa kanta. Mayad gid kay nabubut-un ag lubus ipinakilala niya ti katutuuhanan tungkul sa Diyus. Nakitan nimi kay kadayawan kay tinanggap ginan sa Ama dahil siya ti Bugtung Anak.

Huwan 9:24

Bin-ul maan nida kadwa ginan ti tawu buta kaybi. Bag-u sinabi nida sa kanya magkun, “Sabiha yi nimu ti katutuuhanan sa atubangan Diyus. Alam gid nimi makasalanan tunda pag tawu ti nagpaayad sa kanmu.”

Ruma 3:20

Nakan unman gid may tawu pagkilalan-un Diyus kuntay siya matadlung nu dahil lang sa kay pagtupad sa Kasuguan. Kabay ginan ngap sa Kasuguan pag makilala ti kasalanan.

Ruma 6:6

Alam nita ti daan nita pagkatawu ipinaku sa kurus kaibahan ni Kiristu, hampay udyi may kapangyarihan kanta pagkatawu makasalanan ag sa udyi kita baliwun panawuhun kasalanan.

Ruma 7:18

Alam diman niku unman may mayad nangulian sa kangku, kang ibug sabihun sa kang makasadili pag naisipan. Kaya niku mataw-an maggayak mayad, dayu lang mabwat niku kang gayak mayad.

Ruma 8:32

Unman inirangan niya kay sadili Anak, bagkus ipinakaun ngap niya para sa kanta tanan. Nu kay ipinakaun kay sadili Anak sa kanta, unman aw lugud ipakaun niya sa kanta ti tanan manga bagay minsan sa kay Anak?

2 Kurintu 5:21

Unman nakalakaw sa kasalanan si Kiristu. Dapat ay dahilan ngani sa kanta siya ngap nibilang sa makasalanan hampay nu kita magpakiusa sa kanya, mangyari yi ngap sa kanta ti katadlungan Diyus.

Galasya 3:13

Pagka inaku ni Kiristu ti saad sa kanta, kita linukat yi niya ginan sa saad Kasuguan. Dahil isinurat sa Banal Kasuratan magkun, “Sinaadan ti kada tawu ibinitay sa puun kayu.”

Galasya 3:21

Gustu aw sabihun inda ti Kasuguan laban sa kay itinaratu Diyus? Balaw duy katida. Kainda kay ibug sabihun, nu abi may ipinakaun sa manga tawu usa ka Kasuguan magpakaun buhi, ti tawu mahimu mana pagkilalan-un Diyus kuntay matadlung nu tupadun niya tunda pag Kasuguan.

Pilipus 2:7

Dapat tinalikdan dapu niya tunda tanan-tanan, pinili niya ti pagkapanawuhun, nagpaparihu sa manga tawu ag nakitan siya sa histuda tawu.

Hibriyu 10:12

Dapat si Kiristu kas-a lang nagpakaun kay pakaun sa Diyus hampay mapatawad ti kasalanan manga tawu hanggan waya aban. Bag-u tinmukaw siya sa langit baliwa sa sikun Diyus.

Hibriyu 10:14

Usa lang ka bisis ihinandug kay sadili sa Diyus, ag inda ti naglumpiyu sa manga binwat banal tugka aban.

Hibriyu 2:14

Tawu ngani tunda kay pagkumnun manga anak, nakan si Hisus nabilug diman tawu may nayi may dugu ga kanda diman may nayi may dugu. Nakan katida kay binwat, hampay sa kay pagkamatay mamapas siya sa diyablu, sa may kapangyarihan sa kamatayan,

Hibriyu 2:17

Nakan ngani kailangan siya parihu diman waydi sa kay manga patar-ari sa tanan manga bagay hampay siya usa ka pangulu manughandug sa Balay Diyus maawaun ag matinupadun sa kay magsirbi sa Diyus, hampay mapatawad Diyus ti kasalanan manga tawu.

Hibriyu 4:15

Kanta pangulu manughandug sa Balay Diyus makapasunaid di gid sa kanta kalumuyan. Dahil sinubukan siya sa tanan paraan parihu diman ga kanta, dapat unman gid siya nagkasala.

1 Pidru 2:24

Sa pagkamatay niya sa kurus, “dinara niya sa kay bilug ti kabuyatan nita kasalanan” hampay rargu tayakan nita kanta ugali magkasala bag-u mag-ugali yi angay sa kay kagustuhan Diyus. “Kamu pinaayad yi dahil lang sa kay manga biyag ni Kiristu.”