Ruma 3:25 - Hanunuu

²⁵ Si Hisus ngani ti ihinanda Diyus hampay ipakaun niya kay buhi ag hampay sa pagkabuhus niya dugu may kapatawadan ti manga tawu sa kanda manga kasalanan, nu sida magsarig sa kanya. Kay binwat Diyus tunda hampay ipakilala kay katadlungan. Dahil nu sa kaybi, pinakan-an niya rugar ti manga tawu, pinasinsiya niya kanda manga kasalanan.

Ruma 3:25 Iomraidhean Croise

Kanta 119:142

Unman may katapusan kanmu pagkamatadlung ag tutuu kanmu kasuguan.

Kanta 22:31

Sida ti udwaya manga iinanak tultuli kuntay irinibri nimu kanmu nasakupan, ag kawu gid ti nagbuwat inda.

Kanta 40:10

Balaw niku pag-sadilihun kanmu pagribri sa kangku. Pag-ibarita niku kawu magribri ag masarigan. Balaw niku pag-ipaulam kanmu pagmahal hanggan kanmu pagkamatinupadun nu magtiripun kami kanmu nasakupan.

Kanta 50:6

Pag-ipaburayhaw kalangitan ti pagkamatadlung Diyus, dahil siya ti magsintinsiya.

Kanta 97:6

Pag-ipaburayhaw langit kuntay matadlung siya, ag ti tanan tawu nakakit sa kay kamaskihan.

Kanta 98:2

Ipinakakit Panginuun sa manga nasyun kay inawatan kita ag ipinanalu.

Isayas 53:11

Nu makitan niya kay burak niya kakurian, makabaya siya. Magkun ti Panginuun, “Sa panab-anan kadunungan niku matadlung pag manugsirbi, mayamu ti kilalan-un niya matadlung, mangagwanta siya para sa kanda manga kasalanan.

Libitiku 16:10

Dapat ti kambing nabunut para sa kan Asasil, ihandug niya inda buhi sa atubangan Panginuun bag-u palpasan niya tunda sa pangawakawaan, agud malukat ti manga tawu sa kanda manga kasalanan.

Libitiku 16:15

Iyawun diman niya ti kambing bilang handug sa paglumpiyu kasalanan manga tawu. Daran-un niya inda kay dugu sa Pinakabanal pag Sulud-sulud bag-u iwidwisik inda sa taklub Kaban Kasunduan, parihu sa kay binwat sa dugu tudu baka.

Huwan 6:47

“Ungud duy kang pagsabihun sa kanyu, una hintay pag tawu nu sumarig, may tutuu pag buhi unman may katapusan.

Binwat 14:16

Kaybi waya ginan pinasibut-an Diyus ti tanan nasyun tawu sa kanda lang sadili kagustuhan.

Binwat 15:18

Inda kay sinabi ngani Panginuun imaw ti nagpasandam inda kaybi waya ginan.’”

Binwat 17:30

Dugay pag kapanahunan balaw pag-alintanahun Diyus kay unman magkilala tawu sa Diyus. Dapat taynguna ibinilin Diyus sa tanan tawu sa una naan pag rugar patlikudi yi iampu kanda daut ugali.

Binwat 2:23

Si Hisus ipinahintulut sa kanyu angay sa kay nalub-anan gayak Diyus. Bag-u kanyu apinapaku sa kurus ipinamatay sa manga tawu balaw Hudiyu.

Binwat 3:18

Dapat sa kanyu binwat tunda, natupad yi ti dugay yi pag ipinaalam Diyus sa panab-anan manga purupita magkun, kailangan umagwanta ti Pinili Diyus Manugribri pag Hari hanggan sa kamatayan.

Binwat 4:28

Binwat nida tunda angay sa kanmu kagustuhan mangyari, ti daan ihinanda nimu pag gayak.

Ruma 2:4

Aw ngatay barang udyi pagpahalgaan nimu ti Diyus dahil siya mayad gid ag maagwantahun ag matiniisun. Unman aw lugud alam nimu kay pagmahal Diyus sa kanmu tigpakaun rugar hampay umampu kawu sa kanmu kasalanan?

Ruma 3:26

Dapat kainda, ihinandug yi Diyus kay buhi ni Kiristu hampay ipakakit siya matadlung. Dahil sa inda pag binwat Diyus, napatutuuhanan matadlung ngani siya una pag-itadlung niya ti manga magsarig kan Hisus.

Ruma 5:1

Nakilala yi ngani kita Diyus kuntay manga matadlung dahil sa kanta sarig sa kanta Panginuun Hisu-Kiristu. Nakan ginan diman sa kanta pagsarig sa kan Kiristu pinaunyun kita atag sa Diyus.

Ruma 5:11

Bukun lang tunda. Magbaya kita dahil sa kanta pakiusa sa Diyus sa panab-anan nita Panginuun Hisu-Kiristu. Dahil ginan sa kanya pinaunyun kita Diyus atag sa kay sadili.

Ruma 5:18

Nakan ngani nu kabitay ti kasalanan usa ka tawu dinmamay sa tanan tawu tag sa kaparusahan, katunda diman kay buwat katadlungan usa ka tawu pinun-an kapatawadan hanggan buhi sa tanan tawu.

Ruma 5:9

Taynguna kita kinilala Diyus kuntay manga matadlung ginan sa kan Kiristu dugu. Lalu waya pihu kita miribri ginan sa kay pangagalit Diyus sa panab-anan buhi ni Kiristu.

1 Kurintu 5:7

Bul-a yi niyu ti daan pag pamadaka, imaw ti pagkumnun kasalanan, hampay kamu manga malumpiyu yi. Dahil alistu yi kanta Kapistahan sa Pag-alaala sa Karibrihan, minatay yi si Kiristu, ti Anak Karanidu.

2 Kurintu 5:21

Unman nakalakaw sa kasalanan si Kiristu. Dapat ay dahilan ngani sa kanta siya ngap nibilang sa makasalanan hampay nu kita magpakiusa sa kanya, mangyari yi ngap sa kanta ti katadlungan Diyus.

Ipisu 1:7

Irinibri kita ni Kiristu sa panab-anan niya dugu, ag pinatawad yi kanta manga kasalanan. Ungud gid makadululaw kay mayad pag nabubut-un Diyus,

Ipisu 2:13

Madi kamu kaybi arayu sa Diyus, dapat taynguna ipinakarani yi kamu sa panab-anan dugu ni Kiristu dahil sa kanyu magpakiusa sa kan Kiristu Hisus.

1 Timutiyu 1:15

Tutuu ti pagsabihun ag kailangan paniwalaan tanan tawu magkun, “Nakan nagsitay si Kiristu Hisus sa kalibutan hampay iribri ti manga makasalanan.” Ag aku ngap ti takinan manga makasalanan.

Hibriyu 10:4

Dahil ti dugu manga tudu baka manga kambing dayu gid makab-ul sa kasalanan manga tawu.

Hibriyu 11:14

Nu katunda ti pagbuwatun manga tawu, pag-ipakilala nida sida maghingabut sa kanda sadili gid pag banwa.

Hibriyu 11:17

Si Abraham ti pinangakuan Diyus. Sinubukan siya Diyus, dapat dahil sa kay pagsarig, alistu siya hampay matyun niya ipakaun sa Diyus kay anak madi usa-usa, kay ngaran si Isaak.

Hibriyu 11:7

Dahil sa kay pagsarig ni Nuwi, nakan naniwala siya sa kay ipinasandam Diyus tungkul sa manga bagay udwaya mag-akitan. Nag-alistu si Nuwi usa ka sakayan hampay makaribri kay buu magtal-anakan. Dahil sa kay sarig ipinurya ni Nuwi ti manga taga kalibutan, ag kinilala Diyus siya matadlung dahil sa kay sarig.

Hibriyu 9:28

Katunda diman waydi si Kiristu kas-a lang namatay, ipinakaun niya kay buhi sa Diyus ag inaku niya ti kasalanan kalibutan. Bumalik siya aban, balaw yi hampay mamatay maan tungkul sa manga kasalanan tawu, nu unman hampay iribri niya ti manga magpatigagad sa kanya.

Hibriyu 9:5

Sa kay babaw Kaban may manga kirubin pag anghil magpakilala siyun ti kadayawan Diyus, kanda manga pakpak maghamuy sa taklub Kaban, imaw ti Ulian Pangaawa. Dayu nita matigus-a sa harampangan inda pag manga bagay taynguna.

1 Huwan 1:10

Nu kanta pagsabihun kita unman may kasalanan, kanta pagbangdanan ti Diyus pudilun ag kay Bagaw Diyus unman waydi mangulian sa kanta.

1 Huwan 2:2

Dahil si Kiristu ti nagbaliwa namatay sa kasalanan nita hampay may kapatawadan kita. Ag balaw sa kanta lang sadili pag kasalanan siya pag namatay, nu unman hanggan diman sa kasalanan tanan manga tawu sa babaw daga.

1 Huwan 4:10

Ti kang pagsabihun pagmahal, bukun kanta pagmahal sa Diyus, nu unman kay ngap pagmahal Diyus sa kanta. Sinugu niya kay Anak hampay bumaliwa mamatay sa kasalanan nita, agud may kapatawadan kita.

Ipinakakit 1:5

Pagsa kanyu diman ti papalad ginan sa kan Hisu-Kiristu, imaw ti tutuu masarigan pag manugpadakit, ti un-an nabuhi uman ginan sa kamatayan, ti Hari tanan manga hari sa babaw daga. Pagmahalun niya kita ag dahil sa kay dugu pag irinibri niya kita sa kanta manga kasalanan.

Ipinakakit 13:8

Sumamba sa kanya ti tanan tawu magkabuhi sa babaw daga, purya lang ti manga tawu kay ngaran nisurat yi sa ribru kabuhian ginan waya sa pagkalalang kalibutan. Tunda pag ribru kay apu ti Anak Karanidu imaw ti minatay.

Ipinakakit 20:15

Ayinmut waydi sa danaw apuy una si unu ti unman nisurat kay ngaran sa ribru kabuhian.

Ipinakakit 5:9

Nagkanta sida inda pag bag-u kanta magkun, “Kawu ti may karampatan magbuul sa kasuratan malulunan ag magbukas kay manga kula, dahil kawu ti minatay ag dahil sa kanmu dugu may linukat kawu manga tawu ginan sa kada linahi, pamagaw, banwa ag nasyun hampay sida manga sakup yi Diyus.