Ruma 3:22 - Hanunuu

²² Una si unu pag tawu nu sumarig siya sa kan Hisu-Kiristu, pagkilalan-un siya Diyus kuntay matadlung, dahil lang sa kay magsarig sa kan Hisus, una manga Hudiyu una manga balaw Hudiyu.

Ruma 3:22 Iomraidhean Croise

Isayas 61:10

Magbaya aku sa kang Panginuun Diyus, dahil aku ga kay pinasulungan karibrihan hanggan kapanaluhan. Parihu aku sa lalaki ikasal may sulung rutay marinu panmanughandug, ngatay parihu sa babayi ikasal may pamarinu.

Hirimyas 23:6

Inda pag ngaran ti iingaran sa kanya: ‘Ti Panginuun Kanta Katadlungan.’ Sa tunda pag udas maribri ti Huda ag magkaimaw kahusayan sa Israil.

Danyil 9:24

“Itinagka yi Diyus ti 490 ka timpu sa banal pag banwa hanggan sa kanmu kasimanwa hampay umapas kanda paglaban ag pagbuwat daut sa Diyus, para malukat sida sa kanda manga kasalanan, hampay maiparargu Diyus ti katadlungan tugka aban, hampay matupad ti pangakakitun hanggan ti hula, ag hampay maitalaga maan ti Balay Diyus.

Lukas 15:22

Dapat magkun kay ama sa kay manga panawuhun, ‘Dali! Bul-a ati pag rutay ti mayad gid sa tanan, kanyu ipasulung sa kanya bag-u paulii singsing kay ituturu hanggan manga lapak sa kay lulud.

Binwat 11:12

Sinabi Ispiritu sa kangku danga kunu mag-alaala, pagkuyug yi lang aku sa kanda. Inda pag unum ka patar-ari taga Hupi nagkuyug diman sa kangku tabug sa Sisariya. Pagka kami rinmas-ug, nagsaka ngani kami sa balay ni Kurnilyu.

Binwat 15:9

Parihu lang kay magbantay Diyus una sa kanda una sa kanta. Pagka sida nagsarig sa kan Hisu-Kiristu, linumpiyu diman Diyus kanda tagipusuun sa kanda nagbuwat kasalanan.

Binwat 3:16

Kay kamaskihan ni Hisus ti nagpakaun kabisugan sa inda pag tawu. Nangyari tunda dahil sa pagsarig sa kay ngaran ni Hisus. Ti pagsarig sa kan Hisus ti lubus nagpaayad sa kanya ga kanyu diman waydi nakitan taynguna.

Ruma 1:17

Dahil pagsabihun sa Mayad pag Barita nu kabitay pagkilalan-un Diyus ti tawu kuntay matadlung, tunda sa panab-anan lang pagsarig. Angay sa nisurat sa Banal Kasuratan magkun, “May buhi ti tawu pagkilalan-un Diyus kuntay matadlung dahil sa kay pagsarig sa Diyus.”

Ruma 10:12

Balaw may nagtuhay ti kahamtangan una Hudiyu una balaw Hudiyu. Usa lang ti Panginuun tanan tawu. Siya tigpakaun kay manga kaayadan sa tanan manga magdangup sa kanya.

Ruma 10:4

Si Kiristu ti katugkaan Kasuguan ni Muysis. Nakan ngani una si unu ti sumarig sa kanya kilalan-un Diyus kuntay matadlung.

Ruma 2:1

Nakan ngani una si unu kawu ti parapihu sa kasalanan manga iba, udyi ngap kawu may idahilan. Dahil sa kanmu magpihu sa manga iba, pagpihuun diman waydi nimu kanmu sadili kasalanan. Kawu magpihu sa kasalanan manga iba, dapat kumun diman waydi kanmu pagbuwatun.

Ruma 3:30

Kabay usa-usa ti Diyus. Una ti manga Hudiyu una ti manga balaw Hudiyu, nu sida sumarig sa kan Kiristu, pagkilalan-un yi sida Diyus kuntay sida manga matadlung.

Ruma 4:16

Nakan ngani ti taratu sigun sa pagsarig hampay ti pangaawa Diyus pihu kay itinaratu ipakaun sa kay linahi ni Abraham, balaw lang sa manga magtupad sa Kasuguan nu unman sa tanan manga magsarig sa Diyus parihu sa kan Abraham. Siya kabay kanta pinagkagurang nu angay sa pagsarig.

Ruma 8:1

Nakan ngani dayi sintinsiyahan Diyus ti manga magpakiusa sa kan Kiristu Hisus.

Ruma 9:30

Kainda ti gustu niku sabihun, ti manga balaw Hudiyu una unman nanipag sa mayad pag buwat hampay sida mahimu pagkilalan-un Diyus kuntay manga matadlung, lalu ngap kinilala niya sida kuntay manga matadlung dahil sa kanda pagsarig sa Diyus.

1 Kurintu 12:13

Usa lang ka Ispiritu ti nagtulbaw sa kanta tanan sa bilug ni Kiristu, una kita Hudiyu, una kita Giriyigu, una manga panawuhun, una manga balaw panawuhun, kita tanan pinainum sa usa lang ka Ispiritu.

1 Kurintu 4:7

Hintay ti nagsabi sa kanyu kuntay kamu mayad man sa manga iba? Unman kamu may imaw nu unman ipinakaun Diyus. Dapat nu ipinakaun Diyus sa kanyu hayga pag-ipadayaw-dayaw niyu ga unman may nagpakaun sa kanyu?

Galasya 2:16

alam nimi pagkilalan-un Diyus ti tawu kuntay siya matadlung nu sumarig siya sa kan Hisu-Kiristu ag unman dahil sa kay magtupad sa Kasuguan. Hanggan kami manga Hudiyu magsarig sa kan Kiristu Hisus hampay pagkilalan-un Diyus kami matadlung, dahil sa kanmi pagsarig sa kan Kiristu ag unman dahil sa kanmi magtupad sa Kasuguan. Dahil dayu kilalan-un Diyus ti tawu kuntay matadlung nu ginan lang sa kay pagtupad sa Kasuguan.

Galasya 2:20

Namatay aku kaibahan ni Kiristu sa kurus. Pagka kainda aku nabuhi, balaw yi kang sadili buhi, nu unman si Kiristu lang ti nabuhi sa kangku. Hanggan aku sitay di waya sa babaw daga, kang ugali buhi magsarig sa Anak Diyus, sa nagmayad sa kangku ag nagpakaun kay buhi sa kamatayan para sa kangku.

Galasya 3:22

Dapat magkun ti Kasuratan, “Ti usa ka kalibutan nasakup kapangyarihan kasalanan.” Nakan ipakaun Diyus sa manga magsarig sa kan Hisu-Kiristu kay itinaratu. Matanggap lang manga tawu kay itinaratu Diyus nu sida magsarig sa kan Hisu-Kiristu.

Galasya 3:28

Udyi may tuhay-tuhay una Hudiyu, una Giriyigu, una panawuhun, una bukun panawuhun, una lalaki, una babayi. Kamu tanan urusa dahil sa kanyu pakiusa sa kan Kiristu Hisus.

Ipisu 3:12

Dahil sa kanta pakiusa hanggan pagsarig sa kanya, marig-un kanta tagipusuun hampay unman may ampara sa kanta makapakarani sa Diyus.

Pilipus 3:9

ag hampay aku lubus magpakiusa sa kanya. Udyi aku pagkilalan-un Diyus kuntay aku matadlung dahil lang sa kang magtupad sa Kasuguan ni Muysis. Pagkilalan-un aku Diyus kuntay matadlung dahil aku magsarig sa kan Kiristu. Inda pag katadlungan ginan ngani sa Diyus dahil sa kang pagsarig.

Kulusas 3:11

Nakan ngani ud may naglain parihu lang una manga balaw Hudiyu una manga Hudiyu, una tinuri una balaw tinuri, una manga dayuhan, una manga tawu balaw ga kanta kay ugali, una manga panawuhun una bukun panawuhun. Sa kan Kiristu unman may naglain ti tanan tawu ag siya ti sa kanyu tanan.

Santiyagu 2:23

Natupad ti isinurat sa Kasuratan magkun, “Nagsarig si Abraham sa Diyus, nakan ngani siya kinilala Diyus kuntay matadlung.” Pagkumnun yi Diyus, “Kang iribahun si Abraham.”