Ruma 12:15 - Hanunuu

¹⁵ Pagpakibagay kamu sa manga magbaya, pagpakibagay diman sa manga maglumi.

Ruma 12:15 Iomraidhean Croise

Nihimyas 1:4

Pagka nasaydan niku tida, tinmukaw aku ag nanlumi. Pira ka sirang magpanrukuan aku, unman maghandum karan-unun, hanggan nandarangin sa atubangan Diyus sa langit.

Hub 2:11

May tulu ka kakilala si Hub, sida ni Ilipas taga Timan, si Bildad taga Suwa, ag si Supar taga Naama. Pagka nabaritaan nida ti tanan kakurian rinmas-ug sa kan Hub, nagkarausa sida manabang sa kan Hub hampay pasulungun siya.

Hub 30:25

Paglumian ngani niku ti manga tawu magkakurian. Magkaawa gid aku sa manga pugri.

Manugtudlu 3:4

may udas sa paglumi ag may udas diman sa pagkasari, may udas sa manghimanglaw ag may udas diman sa pagbaya,

Hirimyas 38:12

Magkun si Ibid Milik sa kan Hirimyas, “Sapinan nimu ti manga pamaris ag daan rutay sa kilkili nimu hampay balaw kawu masakitan lubid.” Bag-u inda ngani ti binuwat ni Hirimyas.

Hirimyas 9:1

“Nu bubun lang mana danum kang ulu, ag kang manga mata bulbugan luwa, manlumi aku sirang yabi para sa namatay pag manga kasimanwa niku.

Lukas 1:58

Pagka naalaman niya manga kamalay hanggan niya manga katawuhan kuntay pinapaladan gid Panginuun si Ilisabit nakabaya sida sa kanya.

Huwan 11:19

Mayamu pag manga Hudiyu nagsabang sa kanda ni Marta ni Marya hampay magpasaya sa kanda karukuan tungkul sa kanda patar-ari.

Binwat 11:23

Pagka siya rinmas-ug ati, nakitan niya kay papalad Diyus sa kanda. Nakan nakabaya gid siya. Kay pinaanyuan sida magkun pangungud sida pagmatinupadun sa Panginuun, danga sida magbul-iw.

1 Kurintu 12:26

Nu ti usa ka gamit bilug may mag-asaydan, ti tanan gamit minsan sa kanya magdungug kakurian. Nu ti usa ka gamit bilug pagdayawun, ti tanan manga gamit parihu magbaya minsan sa kanya.

2 Kurintu 11:29

Nu may linmumuy sa kay pagsunud, aku magpakidamay sa kay kalumuyan. Nu may nalagpak sa kasalanan, subra yi kang karukuan sa kang tagipusuun.

2 Kurintu 2:3

Nakan ngani sinuratan dapu niku kamu hampay nu aku umasan, balaw yi karukuan kanyu ipakaun sa kangku, kamu yi ngap ti magpasaya sa kangku. Dahil alam yi waydi niku nu masulung aku, masulung diman waydi kamu.

Pilipus 2:26

Mag-ayup yi gid siya sa kanyu tanan. Tutuu yi gid pinung-aw siya pagka naalaman niya kuntay nabaritaan niyu siya may sakit.

Pilipus 2:28

Nakan ngani kang gid gustu pag-atag siya sa kanyu hampay nu makakit kamu sa kanya, makabaya maan kamu ag hampay mab-ul waydi kang karukuan.

Hibriyu 13:3

Pagpadamay kamu sa manga napirisu ga kamu diman napirisu kaibahan nida. Pagpasunaid kamu sa kanyu sadili bilug tungkul sa manga pag-unuunuhun.