Ruma 12:1 - Hanunuu

¹ Nakan ngani manga patar-ari, alang-alang sa kay daka pangaawa Diyus sa kanta, inda kang paanyu gid mana sa kanyu, ipakaun niyu buhi waya kanyu sadili bilug sa Diyus hampay sakup sa kanya, imaw pag pakaun kay pagbayaun niya. Inda ti tutuu niyu pagsamba sa Diyus.

Ruma 12:1 Iomraidhean Croise

Kanta 116:12

Unu lugud ti maibalus niku sa Panginuun sa tanan niya pag kaayadan sa kangku?

Kanta 19:14

Mana kang manga pagbagawun hanggan manga pag-isip-isipun makapasulung sa kanmu, Panginuun, kang palalan-iban pag batu ag manugribri.

Isayas 56:7

Darahun niku sida sa kang banal pag bantud ag ati pag pasulungun sa kang balay dararanginan. Tanggapun niku sa kang harandugan kanda manga handug pagsunugun hanggan ti tuhay waya pag handug, dahil kang Balay Diyus ingarnan balay dararanginan manga tawu ginan sa tanan nasyun.”

Hirimyas 6:20

Unman may halaga sa kangku kanda manga pag-isagda kamangyan una ginan waya inda sa Shiba, ngatay manga pamanglu ginan waya sa arayu pag rugar. Balaw niku tanggapun kanda manga handug pagsunugun. Unman aku magbaya sa kanda manga handug sa kangku.

Husyas 14:2

Pagbalik kamu sa Panginuun ag pagsabi sa kanya kuntay, ‘Panginuun, patawada duy kami sa tanan nimi manga kasalanan, tanggapa kami angay sa kanmu kaayadan hampay makahandug kami manga pagdayaw sa kanmu.

Lukas 7:47

Kang pagsabihun duy sa kanmu, pinatawad yi kay manga kasalanan una mayamu, nakan daka gid ngani kay pagmahal. Dapat nu diit lang ti pinatawad, diit waydi kay pagmahal.”

Ruma 12:2

Danga kamu magpaangay sa inda pag palakaw manga taga kalibutan. Danga magpaparihu kamu, pag bag-u yi kanyu naisipan agud maalaman niyu nu hintay ti kagustuhan Diyus, nu hintay ti mayad ag ti ikabaya niya ag udyi may kakurangan.

Ruma 15:16

hampay suruguun yi aku ni Kiristu Hisus tabug sa manga balaw Hudiyu. Pag-itudlu niku sa kanyu, sa manga balaw Hudiyu, ti Mayad pag Barita hampay maihandug niku kamu sa Diyus kay kaibgan, dahil kamu ipinasaman yi Ispiritu Banal.

Ruma 15:30

Pagsabihun yi gid niku sa kanyu, manga patar-ari, alang-alang sa kanta pagsarig sa Panginuun Hisu-Kiristu ag sa pagmahal kay ipinakaun Ispiritu Banal, awati niyu aku sa ungud pag darangin sa Diyus.

Ruma 2:4

Aw ngatay barang udyi pagpahalgaan nimu ti Diyus dahil siya mayad gid ag maagwantahun ag matiniisun. Unman aw lugud alam nimu kay pagmahal Diyus sa kanmu tigpakaun rugar hampay umampu kawu sa kanmu kasalanan?

Ruma 6:13

Danga niyu ipasakup sa kapangyarihan kasalanan una naan pag bahagi bilug niyu para gamit sa kadautan. Bagkus ngap pasakup kamu sa Diyus. Kamu pag manga namatay yi ag binuhi uman, ipakaun niyu sa Diyus kanyu buu pagkatawu hampay gamit yi sa katadlungan.

Ruma 6:16

Alam diman niyu nu kamu napasakup una sa kantapu bilang ga panawuhun, panawuhun yi ngap kamu niyu pinagkaamu, nu ngatay manga panawuhun yi kasalanan siyun ginan ti patabgan kamatayan. Aw ngatay panawuhun yi Diyus bag-u ti patabgan katadlungan ngani.

Ruma 6:19

Maghampang aku angay lang sa ugali tawu hampay balaw makuri maintindihan niyu. Kaybi ipinasakup ngani niyu kanyu sadili sa kayagtingan ag sa kadautan hanggan di mag-amat. Taynguna kailangan ipasakup ngap niyu lubus kanyu sadili sa katadlungan hampay gamitun kamu Diyus.

Ruma 9:23

Gustu diman niya ipakakit kay unman may pumarihu pag kamaskihan sa manga tawu kay pagkaawaan ag kay ihinanda ginan waya kaybi para tabug sa kadayawan.

1 Kurintu 1:10

Taynguna kang pagsabihun sa kanyu, manga patar-ari, dahil sa karampatan nita Panginuun Hisu-Kiristu, kailangan kamu pag-arangayan. Una sa kanyu bagaw danga kamu magtalaluhan. Pagkarausa kanyu naisipan hanggan kanyu turunu.

2 Kurintu 10:1

Aku inda si Pablu, ti sabi iba kuntay maparakumbabaun nu kaatubang niyu, dapat maisug nu sa arayu. Magpakihampang aku sa kanyu angay sa mapagpakumbabaun naisipan hanggan kaayadan ni Kiristu.

2 Kurintu 4:1

Dahil sa pangaawa Diyus pinili niya kami sa inda pag buruwatun, nakan ngani matutum kanmi naisipan.

2 Kurintu 4:16

Nakan ngani kami balaw magpalumuyun sa kanmi naisipan. Una amat-amat maglumuy yi kanmi bilug, mag-amat di ngap magbisug kanmi tagipusuun.

2 Kurintu 5:20

Nakan ngani kami kay manga sinugu ni Kiristu. Bilang ti Diyus diman gid tigpaanyu sa kanyu ginan diman sa kanmi magkun, “Sa ngaran ni Kiristu kanmi pagpaanyuan kamu pagmipausa kamu sa Diyus.”

2 Kurintu 6:1

Kami manga kaawat Diyus sa buruwatun. Nakan pagpakapaanyuan nimi kamu danga pagpasipalahan ti manga kaayadan kay ipinakaun Diyus sa kanyu.

Ipisu 4:1

Nakan aku, ti usa ka napirisu dahil sa kang magsirbi sa Panginuun, magsabi sa kanyu, pag-ugali kamu angay sa mayad pag ugali manga pinili Diyus.

Ipisu 5:10

Pag-adali niyu nu hintay ti pagbayaun Panginuun.

Diyuturunumiyu 14:2

Dahil manga nasakupan kamu Panginuun niyu Diyus. Sa tanan tawu sa kalibutan, kamu kay pinili bukud tangi pag nasakupan.

Pilipus 1:20

Daka gid kang kagustuhan ag may pag-asa aku dayu gid aku umalinlangan. Bagkus pirmi matutum kang naisipan lalu waya ngap inmamat taynguna agud sa mamatay sa mabuhi man hampay nu makitan aku manga iba, lalu waya dayawun nida si Kiristu.

Pilipus 2:17

Nu abi aku matyun, kang dugu ibuhus ga ihandug sa Panginuun dungan sa kanyu pag-ipakaun kanyu pagsarig sa kanya. Una abi ti ikamatay niku katida, masulung di aku ag mirinsan kita tanan magbaya.

Pilipus 4:18

Kainda, may imaw aku tanan niku kailangan ag mag-abunda waya, dahil sa nakatanggap aku sa kan Ipapruditu manga bagay ginan sa kanyu. Kanyu awat ga usa ka mabanglu ag marinu pag handug ag pagbayaun Diyus.

1 Tisalunika 4:1

Usa sa siyun, manga patar-ari, magpaalam waya mana kami kanmi paanyu sa kanyu dahil sa kanta pakiusa sa Panginuun Hisus. Kailangan kanyu ugali pag-angay sa kanyu nataw-an ginan sa kanmi hampay lalu waya sa ikabaya Diyus. Imaw yi kanyu ugali dapat paglalu waya gid sa ikabaya Diyus.

1 Tisalunika 4:10

Inda ngani kanyu yi pagbuwatun sa tanan manga patar-ari kabuuhan daga sa Masidunya. Madi katida, kanmi waya pagsabihun sa kanyu padakaa waya gid niyu kanyu pagmahal.

1 Tisalunika 5:12

Kami mana magpaanyu waya sa kanyu, manga patar-ari, galanga niyu ti manga magpangabudlay dahil sa kanyu, ti manga pinili Diyus hampay sida ti manugpatigayun ag manugtudlu sa kanyu.

1 Timutiyu 2:3

Inda ti mayad ag makakaawa sa kay magbantay Diyus kanta Manugribri.

1 Timutiyu 5:4

Nu bay may manga anak di una manga idu, sida yi lang ti mangasikasu sa kanda gurang, bilang kanda pananagutan sa gurang, katida nakan ti pagbayaun Diyus.

Pilimun 1:10

Aku magpakihampang mana sa kanmu tungkul sa kang pinagkaanak, tungkul sa kan Unisimu. Dahil siya kang naabay sa pagsarig kang atay sa pirisuhan.

Pilimun 1:9

Dapat dahil sa kang pagmahal gid sa kanmu, nakan lalu kang gustu magpakihampang gid sa kanmu inda. Aku si Pablu, bilang usa ka gurangun, ti sinugu ni Kiristu Hisus, madi taynguna aku usa ka pirisu dahil sa kanya.

Hibriyu 13:22

Daka kang gustu, kamu manga patar-ari, pag-agwanta sa kang manga iinadal. Dahil kamu kang sinuratan balaw sa mayamu pag hampang.

1 Pidru 2:20

Unman gid may dumayaw sa kanyu nu mag-agwanta kamu parusa dahil sa kanyu binmuwat daut. Dapat nu kamu parusahan madi kanyu buwat mayad bag-u nu tiisun lang niyu kanda parusa sa kanyu, pihu kamu pagbayaun Diyus.

1 Pidru 2:5

Bilang ga manga batu may buhi waydi pagga manga kalap kamu Balay Diyus hampay ulian Ispiritu. Bag-u bilang ga manga manughandug ibinukud para sa Diyus, pagpakaun kamu sa Diyus manga pakaun angay sa Ispiritu, kay pagbayaun Diyus dahil sa kan Hisu-Kiristu.