Ruma 1:13 - Hanunuu

¹³ Manga patar-ari, gustu niku maalaman niyu, balaw di pira ka pag-ulit kang gayak asan tag diman sa kanyu, dapat hanggan taynguna tugka pag-amparahun waya aku. Kang gustu diman bumutung sa manga tawu asan hampay sida sumarig waydi sa kan Kiristu, parihu diman sa kang binwat sa manga iba balaw Hudiyu.

Ruma 1:13 Iomraidhean Croise

Isayas 27:6

Rumas-ug ti sirang ti nasakupan Israil kay lahi ni Hakub manggamut parihu sa halaman. Mansanga inda, mamusang, hanggan mamurak mayamu ag pun-un ti buu kalibutan.

Huwan 12:24

Ungud duy kang pagsabihun sa kanyu, ti pasi tirigu nu unman malagpak sa daga ag mamatay, balaw yi may samilya. Dapat ay nu mamatay ngani tunda pag pasi tirigu, lalu ngap mamurak siya mayamu.

Huwan 15:16

Balaw duy kamu ti nagpili sa kangku. Aku ngap ti pinmili sa kanyu, kang ipinablag kamu ginan sa kalibutan hampay kamu umatag tumupad sa buruwatun ag hampay udyi madura hanggan aban ti pakinabang niyu manga binudlayan; ipakaun Ama sa kanyu una hintay kanyu hagadun sa kanya dahil kamu napasakup sa kangku.

Huwan 4:36

Ti manug-ani magtanggap yi kay patabig. Pagtipunun niya ti burak atag sa buhi unman may katapusan. Nakan nakabaya ti manugpamgas hanggan ti manug-ani.

Binwat 1:15

Pagka ati katpung nagtiripun maan ti manga patar-ari, manga usa ka gatus may duwapulu. Tinmindug si Pidru sa kanda karaw-an bag-u sinabi niya sa kanda magkun,

Binwat 14:27

Pagka rinmas-ug sida sa Antiyukya, tinipun nida ti iglisya bag-u itinultul nida sa manga patar-ari nu kabitay sida ginamit Diyus sa tanan niya buruwatun ag nu kabitay ti Diyus nagbuwat paraan sa manga balaw Hudiyu hampay sida makasarig sa kan Hisus.

Binwat 15:12

Udyi nag-ingay sida tanan. Bag-u namatingi sida sa kanda ni Birnabi ni Pablu nanultul nu kabitay sida pinakan-an kamaskihan Diyus hampay makabuwat manga makadululaw pag tanda sa karaw-an manga balaw Hudiyu.

Binwat 19:21

Pagka nakalawuy tunda pag manga nangyari, inudyukan si Pablu Ispiritu Banal, kailangan siya lumakaw sa daga Masidunya, hanggan sa daga Akaya bag-u umati siya sa Hirusalim. Nagsabi siya magkun, “Nu aku makaati ginan sa Hirusalim, kailangan umati diman aku sa banwa Ruma.”

Binwat 21:19

Pagka sida kinamusta ni Pablu, tinaluktukud itinultul niya sa kanda ti tanan binwat Diyus sa manga balaw Hudiyu dahil sa kay magsirbi sa buruwatun Panginuun.

Binwat 28:14

Pagka ati may nakitan kami manga patar-ari, tinanggap nida kami sa kanda balay. Nakan nansabang kami sa kanda sa sulud usa ka duminggu. Pagka siyun ginan naglakaw ngani kami atag sa Ruma.

Ruma 1:12

Ti gustu mana niku sabihun, hampay mag-arawatan kita sa ikarig-un nita sa kada usa dahil sa kanta pagsarig sa Diyus, una kangku, una kanyu.

Ruma 11:25

Manga patar-ari, gustu niku maalaman niyu ti usa ka katutuuhanan udwaya maburayhawan, hampay balaw mag-isip kamu palabi-labi sa kanyu sadili. Ti kaganitan nasyun Israil balaw padayun-dayun, balaw hanggan aban. Inda magkadugay lang hanggan sa udwaya makapakarani sa Diyus ti tanan manga ginayak niya pag manga balaw Hudiyu.

Ruma 7:1

Manga patar-ari, nakaalam yi waydi kamu tungkul sa batas, nakan ngani naintindihan niyu ti tawu nasakup batas hanggan sa udwaya mamatay siya.

1 Kurintu 1:10

Taynguna kang pagsabihun sa kanyu, manga patar-ari, dahil sa karampatan nita Panginuun Hisu-Kiristu, kailangan kamu pag-arangayan. Una sa kanyu bagaw danga kamu magtalaluhan. Pagkarausa kanyu naisipan hanggan kanyu turunu.

1 Kurintu 10:1

Manga patar-ari, gustu niku maalaman mana niyu ti nangyari sa kanta manga ginurang. Sida tanan giniyahan rurum Panginuun, sida tanan nagdipay sa Dagat Marara.

1 Kurintu 12:1

Taynguna, manga patar-ari, gustu niku kamu makaalam tungkul sa manga pakaun ginan sa Ispiritu.

1 Kurintu 14:20

Manga patar-ari, danga yi ga anak kanyu naisipan. Nu tungkul sa kadautan bay, pagga anak lapsag kamu. Dapat pagginurangun yi kanyu naisipan.

1 Kurintu 14:26

Manga patar-ari, hintay nguna ti ibug sabihun inda tanan? Sa kanyu magtiripun ti usa kumanta, ti usa tumudlu, ti usa magpurupita, ti usa maan bumagaw sa tuhay-tuhay pag pamagaw bag-u may usa maan pumaliwanag sa kay ibug sabihun. Buwatun niyu ti tanan bagay sa ikarig-un iglisya.

1 Kurintu 9:2

Una ti iba dayu mangilala kuntay aku apustul, barang kilala yi waydi niyu. Kamu ti sa Panginuun imaw yi ti puruyba sa kang pagka-apustul.

2 Kurintu 1:8

Manga patar-ari, kanmi pag-itultul sa kanyu ti kanmi nalakawan pag kakurian ati sa purubinsiya Asya. Ungud subra yi gid mabuyat pag kakurian kanmi nalakawan, nu sa kanmi di naisipan ga udyi gid lumapus kami.

2 Kurintu 2:14

Dapat salamat sa Diyus, dahil sa kanta pakiusa sa kan Kiristu, pirmi kita pagdarahun Diyus ga manga pirisu hampay ipadakit kay panalu ni Kiristu. Paggamitun kita Diyus hampay ikalat sa tanan rugar ti pagkilala sa kan Kiristu parihu ga hungaw mabanglu.

Galasya 3:15

Manga patar-ari, ti taratu imaw ti pirmi paggamitun halimbawa. Pagka napirmahan yi ti taratu dayi mahimu dautun una sitapu pag tawu tunda pag taratu. Dayu waydi mahimu bawasan una dugangan.

Galasya 6:18

Manga patar-ari, pagsa kanyu ti papalad nita Panginuun Hisu-Kiristu. Amin.

Pilipus 1:22

Dapat abi nu udwaya waydi mamatay aku, mamakibudlay waya aku sa mayad pag buruwatun. Udwaya niku magkaalaman nu hintay kang magustuhan.

Pilipus 4:17

Balaw kuntay sa may paghingbutun manga pakaun. Dapat ti mahalaga gid sa kangku nu yumamu waya kanyu manga mayad buwat hampay may matanggap waydi kamu pirimyu aban.

Kulusas 1:10

Nu katunda, makaugali kamu angay sa Panginuun hampay kay pagbayaun, abunda sa mayad buwat ag dumaka kanyu pagkilala sa Diyus.

Kulusas 1:6

Inda pag Mayad pag Barita linmantap sa buu kalibutan ag magdara papalad parihu diman sa nangyari sa kanyu pagka nadnugan niyu ag nasalman niyu ti katutuuhanan tungkul sa kay mayad pag nabubut-un Diyus.

1 Tisalunika 2:18

Balaw lang kas-a una kadwa aku ngani pag tawu si Pablu maggayak mana mansabang sa kanyu dapat pirmi kami pag-amparahun ni Satanas.

1 Tisalunika 4:13

Manga patar-ari, gustu nimi pagmaalaman niyu kay tutuu tungkul sa manga namatay yi, hampay kamu dayu maaburidu parihu sa tawu unman may pag-asa.

2 Tisalunika 2:7

Taynguna matagu-taguan waya tunda pag kapangyarihan daut kay buwat hanggan sa ud bul-un ti Manug-ampara. Nu bay mab-ul yi ti Manug-ampara,

2 Timutiyu 4:17

Dapat balaw aku pinabay-anan Panginuun. Pinakan-an aku kabisugan hampay lubus mipaliwanag niku ti Mayad pag Barita sa tanan manga balaw Hudiyu. Naribri di aku madi kanda mana ibahug sa manga liyun.