Pilipus 2:15 - Hanunuu

¹⁵ Sa kanyu manga kalibut may manga tawu unman mayad kay ugali ag daut kay pagbuwatun. Kailangan kamu pag manga anak Diyus ga mustara sa manga iba tawu malumpiyu kanyu ugali, unman may ikasabi sa kanyu. Nu katunda magduag yi kamu sa kanda karaw-an parihu ga manga pamgasan magrayaw sa langit.

Pilipus 2:15 Iomraidhean Croise

Kanta 122:5

Sitaay sa Hirusalim ti hurusayan manga hari sa Israil kay linahi ni Dabid.

Pag-ighit 34:35

ag magkasilaw yi maan ti manga Israilita sa kay uyahun. Nakan pagpatakipan maan ni Muysis kay uyahun tugka sa makabalik siya sa Turda Taragbuan hampay pumakihampang sa Panginuun.

Kabagawan 4:18

Ti pangabuhi tawu matadlung parihu sa pagbutlak init mag-amat di magrayaw habang magdugay.

Kabagawan 8:8

Matadlung ti tanan niku pagbagawun ag unman aku magbagaw pudil ngatay daya.

Isayas 60:1

“Pagbangun kawu, Hirusalim, ag pagrayaw parihu sa sirang, dahil rinmas-ug yi kanmu karibrihan. Marayawan kawu kadayawan Panginuun.

Danyil 6:4

Nakan ngani, ti duwa niya ka kaibahan manugpaanyu ag ti manga gubirnadur nanhanap salan sa pagdumara ni Danyil agud may ibangdan sida laban sa kanya. Dapat unman gid sida may nakitan salan dahil masarigan gid si Danyil ag mayad kay magdumara.

Matiyu 10:16

Magkun si Hisus, “Pagsuguun niku kamu taynguna parihu ga manga karanidu tabug sa karaw-an manga simarun idu. Pagmadunung kamu parihu ga manga amu, pagmabuut kamu parihu sa kalampati.

Matiyu 17:17

Sinabi ni Hisus magkun, “Kamu supakil pag manga tawu, manga unman may pagsarig. Kabitay kadugay kailangan aku kanyu kaibahan? Kabitay waya lugud kadugay kamu kang pagtiisan? Daraha niyu ti anak sitay tag.”

Matiyu 5:45

hampay kamu tutuu gid manga anak niyu Ama sa langit. Dahil pag-ipabutlak niya ti init sa daut ag sa manga mayad. Balaw lang ti manga matadlung ti pagpakan-an uran nu unman hanggan ti manga makasalanan.

Matiyu 5:48

Nakan ngani kailangan ilubus niyu kanyu kaayadan parihu sa kanyu Ama sa langit.”

Lukas 1:6

Sida mag-asawa magkabuhi matadlung sa atubangan Diyus Panginuun. Pagsundun gid nida ti tanan niya manga sugu.

Lukas 6:35

Dapat mahala niyu kanyu manga kalaban, pakan-an niyu sida mayad, pagpaudam kamu danga yi magsarig kuntay ulian kamu. Nu katunda, daka pag pirimyu kanyu tanggapun ag kilalan-un kamu manga anak Makamaskihan pag Diyus. Dahil magbaya siya una sa manga tawu unman may pasunaid ag makasalanan.

Huwan 5:35

Sa kay magtudlu si Huwan parihu ga sulu nasul-an rinmayaw. Naibug diman kamu nakabaya ngalay-ngalay sa kay pag-itudlu ga sa marayaw.

Binwat 2:40

Mayamu waya kay ipinaliwanag ni Pidru sa manga tawu magkun, “Pagpasaman kamu sa manga tawu magbuwat daut hampay kamu makaribri.”

Binwat 20:30

Una ginan diman sa kanyu sadili iglisya may manga tawu aban manudlu kapudilan sa manga patar-ari hampay kanda pasunudun tag yi sa patalang.

Ruma 16:19

Nilantag yi ti barita tungkul sa kanyu magsunud sa kan Kiristu, nakan magbaya gid aku sa kanyu. Dapat kang gustu pagmadunung kamu tungkul sa mayad, danga pagbatia ti daut.

1 Kurintu 1:8

Si Hisu-Kiristu diman ti pumarig-un sa kanyu hanggan tugka sa katapusan hampay unman may ikasabi sa kanyu sa kaudasan pagras-ug nita Panginuun Hisu-Kiristu.

2 Kurintu 6:17

Nakan ngani pagpakarayu kamu ginan sa kanda, pagpablag kamu ginan sa kanda. Magkun ti Panginuun, danga kamu maggaraw sa una hintay pag mayagting hampay kamu kang tanggapun.”

Ipisu 5:27

Kay binuwat niya tunda hampay ipaatubang niya sa kay atubangan ti iglisya masnag, unman may huput kadautan, unman may yukut, lubus nasakup sa Diyus, lubus yi lang marinu.

Diyuturunumiyu 32:5

Dapat nagkasala kamu sa kanya, balaw yi niya kamu pagkilalan-un kay manga anak dahil sa kanyu kadautan. Manga makasalanan ag madaya pag sinulput-lahi!

Pilipus 1:10

Nu katida madunung kamu magpili sa pinakamayad. Bag-u kamu manga malumpiyu yi ag unman may ikasabi sa kaudasan aban nu rumas-ug si Kiristu.

Pilipus 3:6

Masyadu masipag aku nakan inunu-unu niku ti iglisya. Nu bay tungkul sa katadlungan ginan sa kang magtupad gid sa Kasuguan, unman may ikasabi.

1 Tisalunika 5:23

Pag-idarangin niku kamu hampay kamu lubus pasakup sa Diyus. Siya yi ngani tigpakaun kahusayan. Pag-idarangin diman niku kamu hampay alagaan niya kanyu buu pagkatawu sa unman may kadautan una kanyu tagipusuun, una kanyu karadwa, una kanyu bilug hanggan sa ud rumas-ug kanta Panginuun Hisu-Kiristu.

1 Timutiyu 3:10

Kailangan bantayan diman dapu sida. Nu makitan sida unman may ikasabi bag-u mahimu sida buwatun manugsirbi sa iglisya.

1 Timutiyu 3:2

Ti manug-asiwa sa iglisya kailangan unman may masabi sa kanya, usa lang kay asawa, madahan, madunung waydi magtiis sa kay sadili, maginalangun, marapasaka sa bag-u ras-ug ag mayad siya magtudlu.

1 Timutiyu 5:14

Nakan ngani nu sa kangku, mayad waya nu mangasawa maan ti manga buranday nu udwaya dugay kay idad hampay magkaanak bag-u nu alagaan nida kanda sadili magtal-anakan hampay unman may ikalibak ti manga maglaban sa kanta.

1 Timutiyu 5:20

Nu may tawu magbuwat kasalanan, bilini nimu sida sa mag-adnugan tanan manga patar-ari hampay ti manga iba magkadala maghuwad.

1 Timutiyu 5:7

Paanyui duy nimu sida kainda pag manga bagay sa balaw may ikasabi sa kanda.

Titu 1:6

Ti kailangan nimu piliun tunda unman may ikasaway, usa lang kay asawa, kay manga anak magpasakup waydi sa Panginuun, mabuut kanda ugali ag masurundun.

Titu 2:10

Sabihi nimu sida danga maggawhin. Kailangan paglubus masarigan sida hampay sa tanan nida ugali pag-ipakakit nida ti kaayadan kay pag-itudlu Diyus imaw kanta Manugribri.

Titu 2:15

Itudlu yi ngani nimu inda tanan, ilubus nimu kanmu karampatan sa kanmu magparig-un hanggan sa kanmu magtamyaw sa manga manugpatingi. Danga pakan-an nimu sida kaluagan hampay maghakut diman sa kanmu.

Hibriyu 7:26

Si Hisus imaw gid ti pangulu manughandug kanta kailangan. Banal siya, unman gid may kasalanan, unman may huput una di ga buhuk, apinablag siya ginan sa manga makasalanan, ag binwat siya mataas man sa langit.

1 Pidru 2:12

Kailangan pag may kaayusan kanyu ugali sa karaw-an manga unman magsarig sa Panginuun. Una abi kamu kanda pagbangdanan sa buwat daut, makitan di nida kanyu mayad pag buwat hampay dumayaw di aban sida sa Diyus nu kaudasan yi karas-ugan ni Kiristu.

1 Pidru 2:9

Dapat kamu ungud usa ka pinili pag lahi. Parihu sa manga manughandug sa Balay Diyus, kanyu pagsirbihan si Kiristu pag Hari. Kamu usa ka nasyun binukud para sa Diyus. Pinili kamu Diyus hampay kamu kay sadili yi pag nasakupan ag hampay ipaburayhaw niyu kay manga buwat makadululaw. Siya diman waydi ti nagtawag sa kanyu ginan sa kadudulman tabug sa kaladulawan pag karayawan niya.

2 Pidru 3:14

Nakan ngani duy manga patar-ari, hanggan kamu mag-alagad waya, intindiha gid niyu kanyu ugali buhi hampay may kahusayan, unman may uring, ud may kadautan sa kay magbantay Panginuun.

Ipinakakit 2:5

Pag-isipa duy nu kabitay kay abwat kanmu kinalagpakan. Ampui yi nimu ti manga buwat nimu daut, baliki maan nimu kanmu mayad pag manga buwat kaybi. Nu unman kanmu tayakan kanmu buwat daut, asan tag aku, bul-un niku kanmu sulu ginan sa kay palaulian.

Ipinakakit 3:9

Malu, ti manga sakup ni Satanas manga magpabalhinguun kuntay sida Hudiyu dapat bukun waydi Hudiyu, manga pudilun lang. Paludhun niku sida sa kanmu atubangan, bag-u maalaman nida kawu kang gid pagmahalun.