Nihimyas 9:25 - Hanunuu

²⁵ Sinakup nimu nasakupan ti manga may alad batu pag manga banwa hanggan ti abunda pag manga daga. Inapu diman nida ti manga balay punu mararinu pag manga bagay, manga bubun, manga ubasan, manga taranuman ulibu ag iba waya pag manga kayu magbururak. Nangaun sida tugka sa nabsug sida ag nagbaliw makurasug kanda bilug. Nakabaya sida sa mayad pag binwat nimu sa kanda.

Nihimyas 9:25 Iomraidhean Croise

1 Hari 14:9

Mas daut ti binwat nimu kaysa binwat manga takinan nag-una sa kanmu. Dinayu nimu aku ag ipinalabi waya nimu ti manga diyus-diyusan baul.

1 Hari 8:66

Pagkatapus Pista ipinauli ni Sulumun ti manga tawu. Bag-u sida nuli pinapaladan manga tawu si Hari Sulumun bag-u nuli sida masulung dahil sa tanan mayad binwat Panginuun sa kay suruguun si Dabid hanggan sa kay nasakupan manga Israilita.

Nihimyas 9:35

Una may imaw sida sadili pag kaharian, ag nakalakaw masyadu pag kaayadan, una pinakan-an nimu sida maluang ag abunda pag daga, unman diman sida magsirbi sa kanmu ag unman magpatlikud sa kanda daut pag manga kaugalian.

Kanta 105:44

Ag ipinakaun niya sa kanda ti daga manga iba nasyun; minana nida ti binudlayan iba.

Kanta 65:11

Pagpaabundahun nimu ti manga tubas sa udas tig-arani. Una naan pag rugar ti lakawan nimu makatanggap kaabundahan.

Kabagawan 30:9

Dahil nu yumaman aku, barang itanggi niku kawu, ag sabihun niku, “Si unu lugud ti Panginuun?” Ag nu pugri aku, barang manakaw aku ag mapakay-a niku kawu.

Isayas 6:10

Magkun waya siya, “Paganita nimu tunda pag manga tawu kay tagipusuun. Pabay-ani nimu sida magpabungul-bungul ag magpabuta-butaun, dahil barang makadnug sida, makakit, ag makaintindi. Dahil nu makaintindi sida, bumalik sida sa kangku, ag maayadan.”

Isayas 63:7

Ipaburayhaw niku ti pagmahal Panginuun. Dayawun niku siya sa tanan niya pag binwat sa kanta. Pagkayamu kay binwat sa kanta sa kay nasakupan Israil dahil sa daka niya pag pangaawa ag pagmahal.

Hirimyas 2:7

Ati ginan dinara niku sida sa marinu pag daga hampay makakinabang sa abunda pag patubas. Dapat pagka ati yi sida, inuringan nida ti magkaapu niku pag daga bag-u binuwat nida inda mayagting.

Hirimyas 31:14

Pakan-an niku mayamu pag handug ti manga manughandug. Busugun niku abunda pag papalad kang manga nasakupan. Aku, ti Panginuun, ti magbagaw inda.”

Hirimyas 32:23

Nagbaliw kanda inda dapat unman sida nagsunud sa kanmu ngatay sa kanmu manga kasuguan, bag-u balaw nida binuwat ti pag-ipabuwat nimu sa kanda. Nakan pinadaran-an nimu sida kadamhakan.

Isikil 20:6

Ati katpung nagsumpa aku ipalwas niku sida sa Ihiptu ag darahun sa pinili niku pag daga para sa kanda — usa ka marinu ag abunda pag daga, ti pinakamarinu pag daga sa tanan.

Danyil 11:24

Sa unman pagsarigan manga tawu, kadaka niya girahun ti maunlad pag rugar usa ka purubinsiya. Buwatun niya ti unman nabwat kaybi niya manga ginurang. Ayaw-ayawun niya sa kay manga nasakupan ti manga naagaw niya pag bagay sa girahan. Maggayak waya siya man-gira sa may manga alad batu pag banwa, dapat sa dag-ud lang pag udas.

Husyas 13:6

Dapat pagka pinapaladan niku kamu ag pinaabunda, nagmarapadayaw kamu ag kinalimtan yi niyu aku.

Husyas 3:5

Dapat sa uryan pag manga sirang, mandangup di maan sida sa Panginuun nida Diyus hanggan sa kanda hari linahi ni Dabid. Pumakarani sida sa Panginuun may paggalang dahil sa kay kaayadan.

Ruma 2:4

Aw ngatay barang udyi pagpahalgaan nimu ti Diyus dahil siya mayad gid ag maagwantahun ag matiniisun. Unman aw lugud alam nimu kay pagmahal Diyus sa kanmu tigpakaun rugar hampay umampu kawu sa kanmu kasalanan?

Diyuturunumiyu 3:5

Ti tanan banwa inda magkasangput arabwat pag alad batu ag may manga sabian bag-u may saradu. Sinakup diman nita ti manga mayamu baryu unman may alad batu.

Diyuturunumiyu 32:13

Pinadumara niya sida sa manga kabantudan, ag pinakaun sa manga patubas daga. Tinugunan niya sida sa panab-anan daykut ginan sa ukang batu ag lana ginan sa manga ulibu magtubu sa mabatu pag daga.

Diyuturunumiyu 32:14

Pinakan-an niya sida manga kisu ag gatas ginan sa manga baka hanggan kambing, bag-u pinakan-an maratabul pag manga karanidu ag manga kambing ginan sa Basan. Pinakan-an diman niya sida pinakamayad pag manga tirigu ag pinainum sa pinakamayad pag irinmun intus ginan sa ubas.

Diyuturunumiyu 32:15

Nagmaalwan ti manga Israilita dapat naglaban sida. Nagtabul sida ag nagbisug, dapat pinatlikudan nida ti Diyus, ti naglalang sa kanda, ag binugyahan nida ti palalan-iban nida pag batu imaw ti kanda Manugribri.