Nihimyas 9:16 - Hanunuu

¹⁶ Dapat sida kanmi manga ginurang nagmarapalabaw-labaw, maganit kay ulu, unman masinurundun sa kanmu manga sugu.

Nihimyas 9:16 Iomraidhean Croise

2 Hari 17:14

Dapat unman sida magtupad. Maganit kanda manga ulu parihu sa kanda manga ginurang unman magsarig sa Panginuun nida Diyus.

2 Krunika 29:6

Unman matinupadun kanta manga ginurang. Daut ti binwat nida sa magbantay Panginuun nita Diyus ag siya kanda dinayu. Pinabay-anan nida ti Balay Diyus ag siya kanda ngani pinatlikudan.

2 Krunika 30:8

Nakan danga maganit kanyu ulu parihu sa kanyu manga ginurang, nu unman pagpasakup kamu sa Panginuun. Pag-atag kamu sa Balay Diyus kay pinabanal hanggan aban. Ag pagsirbi kamu sa Panginuun niyu Diyus, hampay madura ti masyadu niya pag galit sa kanyu.

2 Krunika 36:13

Naglaban diman siya kan Hari Nabukudunusur, una ipinasumpa niya siya sa ngaran Diyus kuntay balaw siya manlaban sa kanya. Nagbaliw maganit gid kay tagipusuun ni Sidikyas, ag dayu siya mamabalik sa Panginuun, ti Diyus Israil.

Nihimyas 9:10

Nagbuwat kawu manga makadululaw hanggan manga lilingutan pag manga bagay laban sa hari Ihiptu, hanggan sa tanan niya manga may kangaranan ag tawuhan, dahil magkaalaman nimu nu kabitay nida inapi kanmi manga ginurang. Ag kanmu ngaran bantug taynguna tugka.

Nihimyas 9:29

Pagpasandaman nimu sida kuntay pagtupad maan sa kanmu Kasuguan, dapat marapalabaw sida ag unman nida pagtupadun kanmu manga sugu. Nagsalan sida laban sa kanmu manga sugu magpakaun tutuu pag buhi sa magtupad inda. Sa kaganitan nida manga ulu nagpatlikud sida sa kanmu, ag dayu sida mamatingi sa kanmu.

Kanta 106:6

Nagkasala kami parihu sa kanmi manga ginurang; daut gid kanmi binwat.

Kanta 81:8

Manga nasakupan niku Israilita, patingihi niyu inda kang paandam sa kanyu. Pagpatingi mana kamu sa kangku!

Pag-ighit 15:26

“Nu buu tagipusuun kamu sumunud sa kangku, ti Panginuun niyu Diyus, ag bumuwat mayad sa kang magbantay, ag sundun kang manga kasuguan hanggan surundanun, unman kamu padaran-an niku manga panakitun parihu sa ipinadara niku sa Ihiptu. Aku ti Panginuun kanyu manugbulung.”

Pag-ighit 32:9

Magkun waya gid ti Panginuun sa kan Muysis, “Nakitan niku nu kabitay kaganit kay ulu inda pag manga tawu.

Kabagawan 29:1

Ti tawu magpaganit waya gid kay tagipusuun una pira yi ginan siya tamyawun midamhak lang rargu ag unman yi makabangun waya.

Isayas 48:18

Nu nagsunud lang kamu sa kang manga sugu, binmulus mana ga sapa ti manga papalad sa kanyu, dasun-dasun mana kanyu panalu ga humbak maghampak sa baybay.

Isayas 48:4

Alam niku nu kabitay ka ganit kanyu ulu. Kanyu liug parihu kay ka ganit sa baul, kanyu bangas parihu kay kaganit sa galang.

Isayas 63:10

Lang madi katida, naglaban sida ag pinaruku nida ti Banal Ispiritu. Nakan ngani, linabanan sida Panginuun, ag kalaban yi ngap niya sida.

Hirimyas 19:15

“Pagpatingi kamu, dahil inda ti pagsabihun Panginuun Makamaskihan, ti Diyus Israil: Ipadara niku sa inda pag banwa hanggan sa manga baryu sa kay kalibut ti pagsabihun niku pag parusa dahil maganit kanda ulu ag dayu sida mamatingi sa manga pagsabihun niku.”

Hirimyas 2:31

“Kamu pag manga nasakupan sa inda pag sinulput, patingihi niyu ti pagsabihun niku. Aku aw ga usa ka pangawakawaan para sa kanyu manga taga Israil, aw ngatay ga usa ka rugar masyadu madulum? Hayga pagsabihun niyu kuntay, ‘Bahala yi kami sa gustu nimi buwatun. Dayi kami pakarani sa Diyus.’

Hirimyas 7:26

Dapat ay unman niyu sida pagpatingihan ngatay pagbatiun. Mas maganit waya kanyu manga ulu ag mas daut waya kanyu manga binwat kaysa kanyu manga ginurang.

Isikil 5:6

Linabag niya kang manga sugu, ag mas daut waya siya kaysa iba pag manga nasyun sa kay palibut. Dinayu niya kang manga sugu ag manga surundanun.

Binwat 7:51

Sigi waya gid kan Istiban paalaala sa Katipunan manga Pinunu magkun, “Tutuu maganit kanyu manga ulu. Kanyu tagipusuun parihu lang ga tawu unman nagsarig sa Diyus. Unman niyu pagpatingihan ti katutuuhanan. Unman waydi kamu magpaniwala sa pagsabihun Ispiritu Banal. Parihu yi lang gid kamu ga kanyu manga ginurang.

Ruma 2:5

Dapat ay sa kaganitan nimu tagipusuun ud waydi mag-ampu sa kanmu kasalanan, pagpakadugangan nimu ti parusa kay ganti Diyus sa kanmu nu ipaburayhaw kay galit Diyus aban sa kaudasan niya matadlung pag sintinsiya.

Diyuturunumiyu 31:27

Dahil alam di niku nu kabitay kamu maralabag ag maganit kanyu ulu. Una ngani taynguna kaibahan niyu aku, maglaban yi kamu sa Panginuun, lalu waya gid nu tigbak yi aku!

Diyuturunumiyu 32:15

Nagmaalwan ti manga Israilita dapat naglaban sida. Nagtabul sida ag nagbisug, dapat pinatlikudan nida ti Diyus, ti naglalang sa kanda, ag binugyahan nida ti palalan-iban nida pag batu imaw ti kanda Manugribri.

Diyuturunumiyu 5:29

Mana pag magsunud pirmi sida sa kangku ag magtupad sa kang manga sugu hampay mayad ti kahamtangan nida hanggan nida manga sinulput hanggan waya aban.

Diyuturunumiyu 9:13

“Bag-u magkun waya gid ti Panginuun sa kangku, ‘Nakitan niku nu kabitay ka ganit kay ulu inda pag manga tawu.

Diyuturunumiyu 9:27

Danga yi duy pag-intindiha nimu ti kaganitan nida ulu, hanggan ti kadautan ag manga kasalanan nida, nu unman alalahanun nimu kanmu manga manugsirbi sida ni Abraham, ni Isaak, ag ni Hakub.

Diyuturunumiyu 9:6

Nakan alalahanun niyu, balaw dahil manga matadlung kamu nakan pag-ipakaun Panginuun niyu Diyus inda pag mayad daga kanyu apuun. Sa tutuu lang, manga maganit kanyu ulu.

Hibriyu 3:13

Kailangan kamu magpararig-unan sirang-sirang hanggan may udas waya masabi taynguna. Barang una si unu sa kanyu dayaun di kasalanan ag gumanit kay tagipusuun laban sa Diyus.

Hibriyu 3:15

Una kainda magkun ti Kasuratan, “Taynguna, nu madnugan niyu kay magbagaw, danga pagpaganita niyu kanyu manga tagipusuun parihu sa binwat niyu manga ginurang. Danga ga kaybi pagka kanyu linabanan aku.”