Matiyu 7:13 - Hanunuu

¹³ Magkun si Hisus, “Pagsaka kamu sa diit pag sabian. Dahil daka ti sabian ag laun pagka dalan atabug sa kadamhakan. Tunda ti paglakawan mayamu tawu.

Matiyu 7:13 Iomraidhean Croise

Gimpuunan 6:12

Nakitan Diyus masyadu gid daut ti manga tawu sa kalibutan dahil sa kanda pagbuwatun lunsay kadautan.

Gimpuunan 6:5

Pagka nakitan Panginuun ti manga pagbuwatun manga tawu sa kalibutan lunsay lang kadautan, ag kanda pag-isipun pirmi kadautan,

Kabagawan 16:25

Kanmu isip sa matadlung kawu pag dalan, dapat sa kay suru maaw inda kamatayan.

Kabagawan 7:27

Nu umati kamu sa kay balay, parihu lang sa nangatag kamu sa rugar manga namatay.

Kabagawan 9:6

Duraa yi niyu ti kalukuhan hampay lumawig kanyu buhi ag may kadungan.”

Isayas 1:9

Nu ti Panginuun Makamaskihan balaw lang nagsawad una di pira sa kanta, parihu yi kita sa Suduma ag Gumura.

Isayas 35:8

Magkaimaw laun pag baklayan sa pangawakawaan ag tida ingarnan, “Banal pag Baklayan.” Unman may makasalanan ngatay unman may namuangan ti makalakaw siti. Nu ud ti manga magsunud lang sa Panginuun.

Isayas 55:7

Patlikudi yi manga tawu daut kanda daut pag manga ugali, bag-uha yi kanda daut pag naisipan. Pagbalik yi sida sa Panginuun nita Diyus, dahil kaawaan ag patawadun niya sida.

Matiyu 23:13

Sinabi ni Hisus, “Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Bilang ga tinalakpan niyu ti sabian hampay ti manga tawu dayu makasulud sa kaharian langit. Kamu dayu magsulud sa kaharian langit bag-u kanyu waya pag-amparahun ti manga magkaibug magsulud ati.

Matiyu 25:41

“Kumumun maan ti Hari sa manga tawu sa wala baliwa, ‘Pagpakarayu kamu sa kangku ginan, kamu ti manga sinaadan, pag-ati kamu sa apuy unman magkapsa inalistu para sa diyablu hanggan sa kay manga anghil.

Matiyu 25:46

Tulakun sida tabug sa kaparusahan unman may katapusan. Dapat ti manga matadlung tumanggap tutuu pag buhi unman may katapusan.”

Matiyu 3:2

“Iampu yi niyu kanyu kasalanan, dahil udyi dugay rumas-ug yi ti kaharian langit.”

Matiyu 3:8

Nu ungud kamu nag-ampu yi kanyu manga kasalanan, patutuuhani niyu tunda sa kanyu manga buwat.

Matiyu 7:14

Dapat diit lang ti sabian ag makuri pag dalan tabug sa buhi, balaw mayamu pag tawu ti maglakaw siti pag dalan.”

Lukas 14:33

Katunda diman una si unu sa kanyu balaw mahimu kang tuludluan nu pagpahalgaan waya niya ti tanan sa kay buhi.”

Lukas 9:33

Pagka magkaginan yi sida ni Muysis ni Ilyas magkun si Pidru sa kan Hisus, “Maisturu, mayad maaw kita nagsitay. Mamwat kami tulu ka payag, ayaw-ayaw kamu payag ni Muysis ni Ilyas.” (Kay tutuu, unman magkaalaman ni Pidru kay pagsabihun.)

Huwan 10:9

Aku ti puwirtahan. Una hintay pag tawu nu sumulud lakaw sa kangku, siya maribri. Sumulud siya lumuwas ag makakit siya karan-unun.

Huwan 14:6

Sinmagut si Hisus sa kanya magkun, “Aku ti dalan, ti katutuuhanan, ti buhi. Ginan lang sa kangku pag makaati ti tawu sa Ama.”

Binwat 3:19

“Nakan duy patlikudi yi niyu kanyu manga kasalanan bag-u pag-atubang yi sa Diyus hampay duraun yi niya kanyu kasalanan,

Ruma 9:22

Katunda diman kay binwat Diyus. Madi kaybi gustu gid niya ipakakit kay pangagalit hanggan kay kamaskihan, dapat lubus inagwanta lang niya ti manga tawu kay pagkagalitan, kay ihinanda hampay parusahan ag tudasun.

2 Kurintu 4:4

Unman sida magsarig, dahil kanda naisipan binuta ni Satanas, imaw tig hari sa manga taga kalibutan. Binuta sida hampay balaw makitan nida ti karayawan Mayad pag Barita tungkul sa kadayawan ni Kiristu imaw ti histuda Diyus.

2 Kurintu 6:17

Nakan ngani pagpakarayu kamu ginan sa kanda, pagpablag kamu ginan sa kanda. Magkun ti Panginuun, danga kamu maggaraw sa una hintay pag mayagting hampay kamu kang tanggapun.”

Galasya 5:24

Nu ti tawu sakup ni Kiristu Hisus, ipinapaku yi niya sa kan Kiristu sa kurus kay sadili kagustuhan pagkatawu hanggan kay daut pag naisipan hanggan kay manga kahalay-halay pag manga hilig.

Pilipus 3:19

Kanda aban ras-ugan sa kaparusahan sa impirnu, dahil kanda sadili kailangan imaw kanda pinagkadiyus. Ti kanda ikakay-a mana, imaw ngap ti pag-ipadayaw nida. Kanda paghingbutun ti manga bagay lang sitay sa babaw daga.

1 Huwan 5:19

Magkaalaman nita kita nianak Diyus, dapat ti bilug kalibutan sakup di kapangyarihan ni Satanas.

Ipinakakit 12:9

Ti laun pag daragun imaw yi ti pagkumnun gurangun pag ulay, kay ngaran diyablu, imaw ti pagkumnun si Satanas, imaw tigdaya sa bilug kalibutan. Ayinmut siya atag sa daga hanggan kay manga kakampi pag manga anghil ayinmut waydi.

Ipinakakit 13:8

Sumamba sa kanya ti tanan tawu magkabuhi sa babaw daga, purya lang ti manga tawu kay ngaran nisurat yi sa ribru kabuhian ginan waya sa pagkalalang kalibutan. Tunda pag ribru kay apu ti Anak Karanidu imaw ti minatay.

Ipinakakit 20:15

Ayinmut waydi sa danaw apuy una si unu ti unman nisurat kay ngaran sa ribru kabuhian.

Ipinakakit 20:3

Ayinmut siya tag sa kaabasad-basadan bag-u tinalakpan ag sinusihan anghil hampay udyi siya makaluwang ag udyi makadaya sa manga nasyun tawu hanggan sa udwaya matapus ti usa ka libu ka timpu. Nu makalawuy ti usa ka libu ka timpu, palpasan maan siya ngalay-ngalay lang.