Matiyu 6:25 - Hanunuu

²⁵ “Nakan pagsabihun niku sa kanyu, danga kamu magkaarimputu tungkul sa karan-unun ag sa danum kanyu kailangan sa ikabuhi niyu, hanggan sa rutay para sa kanyu manga bilug. Unman aw ti buhi tawu mahalaga man sa karan-unun, ag ti bilug mahalaga man sa rutay?

Matiyu 6:25 Iomraidhean Croise

Kanta 55:22

Katiwalaan sa Panginuun kanmu manga kaaburiduhan, dahil alagaan niya kawu. Balaw niya pabay-anan maunu magkatalinduwa ti manga matadlung tugka aban.

Hirimyas 45:5

Danga yi kawu maghingbut waya manga may kadayawan pag bagay. Dahil paras-ugun niku ti kadamhakan sa tanan tawu, dapat kawu iribri di niku una naan kawu pag umatag. Aku, ti Panginuun, ti magbagaw inda.’ ”

Matiyu 10:19

Pagka kamu ipabahala nida sa husgadu, danga kamu magkakuri sa kanyu sarabihun nu kabitay kanyu bagawun. Pagka ati katpung pag udas, itudlu di waydi Ispiritu Banal sa kanyu ti dapat niyu sabihun.

Matiyu 13:22

Tunda waydi pag nipamgas sa madugihan ipinahalimbawa sa tawu magpatingi sa Bagaw Diyus dapat makasadili siya sa manga bagay sa babaw daga, mairibgun yi siya sa manga kayamanan, nakan ti Bagaw Diyus udyi may rugar sa kay tagipusuun, udyi binmurak.

Matiyu 6:31

Nakan danga kamu magkaarimputu sa kanyu kan-un, sa kanyu danum una sa kanyu panrutay.

Matiyu 6:34

Nakan ngani danga niyu ikaarimputu ti tungkul sa aldaw pag sirang, bag-u yi niyu isipun nu kainda ay yi. Kang-udyi yi sa kada sirang kay kakurian.”

Markus 13:11

Pagka kamu kanda yi dinakup hampay bistahun, danga kamu maaburidu nu hintay kanyu isagut. Sa siyun katpung pag udas sabiha niyu ti inudyuk sa kanyu. Balaw kamu ti bumagaw nu unman ti Ispiritu Banal.

Markus 4:19

Dapat pagka dugay naabala sida sa manga bagay sa babaw daga. Mairibgun yi sida sa kayamanan, maghingbut waya sa iba manga bagay. Nakan ti Bagaw Diyus udyi may rugar sa kanda tagipusuun, udyi binmurak.

Lukas 12:11

Nu kamu darahun sa simbahan manga Hudiyu hampay bistahun una sa atubangan manga Pinunu una sa atubangan manga gubirnadur, danga kamu magkakuri nu kabitay ti isagut ngatay nu hintay kanyu sabihun.

Lukas 8:14

Ti nalagpak sa dugihan tunda imaw ti manga nakadnug, dapat amat-amat pagkisutun sida sa kaaburiduhan naisipan hanggan sa kayamanan hanggan sa daut pag kagustuhan sitay sa babaw daga. Nakan unman magkamhan kay burak.

Ruma 8:32

Unman inirangan niya kay sadili Anak, bagkus ipinakaun ngap niya para sa kanta tanan. Nu kay ipinakaun kay sadili Anak sa kanta, unman aw lugud ipakaun niya sa kanta ti tanan manga bagay minsan sa kay Anak?

1 Kurintu 7:32

Dapat kang gustu pagkab-ul yi gid sa kanyu ti aburidu. Ti lalaki nu unman may asawa magpangabudlay sa manga buruwatun Panginuun, nu kabitay makatupad sa kagustuhan niya.

Pilipus 4:6

Danga kamu magkaarimputu sa una hintay pag bagay. Bagkus ngap pagdarangin kamu paghagad sa Diyus kanyu kailangan pag may pasalamat diman.

2 Timutiyu 2:4

Ti usa ka sundalu danga magpakialam sa bukun buruwatun sundalu. Lalu ngap kailangan sigasidan niya hampay makabaya kay pinunu.

1 Pidru 5:7

Intirgahan niyu sa Diyus ti tanan kakurian niyu, dahil siya madunung mag-alaga sa kanyu.