Matiyu 6:2 - Hanunuu

² “Nakan ngani nu kamu mag-ayaw sa manga makuri danga niyu ipabantug tunda danga parihu sa pagbuwatun manga tawu magpabalhinguun kuntay mayad ati sa simbahan manga Hudiyu hanggan sa manga baklayan. Pagbuwatun nida tunda sa dayawun sida manga tawu. Ungud duy kang pagsabihun sa kanyu, natanggap yi nida kanda pirimyu.

Matiyu 6:2 Iomraidhean Croise

Kanta 112:9

Mag-ayaw siya sa manga pugri; kay matadlung pag buruwatun alalahanun tugka aban ag kay kabisugan dugangan Diyus bilang paggalang sa kanya.

Kanta 37:21

Ti manga daut mag-udam ag balaw magbayad. Dapat ti manga matadlung marapakaun.

Kabagawan 19:17

Nu mag-awat kawu sa pugri, parihu lang sa nagpaudam kawu sa Panginuun, dahil Panginuun ti bumayad sa kanmu.

Kabagawan 20:6

Mayamu ti magsabi tapat sida, dapat masarigan aw nguna sida?

Manugtudlu 11:2

Ayaw-ayawa kanmu kuwarta sa nanuhay-tuhay pag nigusyu, dahil unman nimu alam nu hintay pag kakurian ti rumas-ug sa kalibutan.

Isayas 10:6

Suguun niku sida giraha ti nasyun balaw maka-diyus hanggan ti kang pagkagalitan, hampay wayakun ag tatatataan ga lutuk sa baklayan, ag bul-un ti tanan nida kasiyunan.”

Isayas 58:7

Pakan-i niyu karan-unun ti manga magkalun-us, ipatahan niyu sa kanyu ulian ti unman may ulian, ayawi niyu rutay ti unman may rutay, ag awati niyu kanyu manga katawuhan.

Isayas 9:17

Nakan balaw magbaya ti Panginuun sa manga kalay-awan nida lalaki, ag balaw niya pagkaawaan ti manga ilu ag manga buranday nida. Dahil daut ti tanan ag balaw maka-diyus; makakaray-a ti tanan pagsabihun nida. Nakan balaw gid madura ti pangagalit Panginuun, alistu di gid siya pumarusa sa kanda.

Husyas 8:1

“Uypi kanyu budyung paandam sa kang nasakupan Israil kang ulian, girahun sida kalaban ga agila kay kaliksi. Dahil balaw pinahalgaan nida kang kasunduan sa kanda ag linabag nida kang Kasuguan.

Matiyu 15:7

Manga magpabalhinguun lang kamu. Bukun ngap salan kay ipinurupita ni Isayas tungkul sa kanyu magkun, ‘Magkun ti Diyus,

Matiyu 16:3

Pagka surip-surip kanyu pagsabihun, ‘Umuran taynguna dahil mag-aguhum ti langit.’ Magkakilala di niyu ti lakaw panahun, dapat unman maaw niyu makilala ti manga tanda taynguna pag udas.

Matiyu 22:18

Dapat alam di ni Hisus kanda turunu daut, nakan sinabi niya sa kanda, “Hayga aku kanyu pagsubukan, kamu pag manga magpabalhinguun.

Matiyu 23:5

Lunsay pakakit-kakit lang sa manga tawu kanda buwat. Paglapadun nida kanda kulimpay pandarangin. Ag hampay ipakakit nida kuntay matutum kanda pagsarig, pag-ipaaba nida kay paraway-raway sa sidsid nida kulimpay.

Matiyu 23:6

Nu may karan-an kanda gustu makatukaw sa marinu pag tukawan, ag nu sa simbahan kanda gustu tumukaw sa tukawan ihinanda sa may kangaranan.

Matiyu 24:51

Barian yi siya sa parusa niya amu, iminsan yi sa manga magpabalhinguun. Ati sida magnguruynguyan ag mangubut kanda manga ngipun.”

Matiyu 5:18

Ungud duy kang pagsabihun sa kanyu, madura di ti langit hanggan ti daga, dapat una lang usa ka pinakadiit pag bahagi Kasuguan ud madura hanggan sa ud matupad ti tanan-tanan manga isinurat siti.

Matiyu 6:16

Magkun si Hisus, “Nu kamu unman maghandum karan-unun, kanyu manga uyahun danga magmarukumaruku, danga kamu parihu sa manga magpabalhinguun kuntay mayad. Unman sida mag-ayus kanda sadili hampay makitan manga tawu sida unman maghandum karan-unun. Ungud duy kang pagsabihun sa kanyu, natanggap yi nida kanda pirimyu.

Matiyu 6:3

Dapat nu kawu mag-ayaw danga nimu ipamalay sa kanmu wala kamang ti pagbuwatun nimu sikun kamang,

Matiyu 6:5

Magkun si Hisus, “Nu magdarangin kamu, danga kamu maghuwad sa manga magpabalhinguun kuntay mayad. Maraibgun sida magdarangin matindugan sa manga simbahan manga Hudiyu una sa pagsangahan baklayan hampay makitan sida manga tawu. Ungud duy kang pagsabihun sa kanyu, natanggap yi nida kanda pirimyu.

Matiyu 7:5

Magpabalhinguun lang kawu kuntay mayad. Bul-a dapu ti batang sa kanmu mata, bag-u humiling yi kawu mayad hampay mab-ul nimu kanmu patar-ari paruk.

Markus 12:39

Sa simbahan manga Hudiyu ngatay sa manga karan-an kanda gustu makatukaw gid sa marinu pag tukawan.

Markus 7:6

Nagsagut si Hisus magkun, “Kamu magpabalhinguun lang. Bukun ngap salan ti ipinurupita ni Isayas tungkul sa kanyu, angay sa isinurat sa Banal Kasuratan. Magkun ti Diyus, ‘Inda pag nasyun tugka lang sa bagaw kanda maggalang sa kangku, kanda bay tagipusuun arayu di sa kangku.

Lukas 11:41

Kailangan ipakaun niyu sa manga pugri kay sukad niyu manga taya bag-u udyi may daut sa kanyu surundanun.

Lukas 11:43

“Anung kaawaawa kamu pag manga Parisiyu. Dahil kanyu pagkaibgan ti manga marinu gid pag tukawan sa sulud simbahan ag kanyu diman gustu kamu paggalangun manga tawu sa palingki.

Lukas 12:33

Ipabili niyu kanyu manga kasiyunan bag-u pagpakaun sa manga pugri kay kabilyanan. Pag-alistu kamu kanyu sukluban balaw magkadaut, tipunun niyu kanyu kayamanan sa langit. Ati unman mabawas ti kayamanan, una mananakaw, una tipakung dayu gumaraw.

Lukas 12:56

Manga magpabalhinguun lang kamu. Madunung kamu magkilala sa manga histuda langit ag daga. Bati unman kamu nakaisip kay halaga kainda pag kaudasan.”

Lukas 13:15

Dapat sinabi ngap Panginuun sa kanya magkun, “Kamu katna manga magpabalhinguun lang. Nu Sirang Pamahari unman aw ti kada usa sa kanyu maglubad kanyu manga higut baka una nangus asnu ginan sa kurumpayan hampay kanyu pagguyudun ipagpaslup sa danum?

Lukas 20:46

“Pag-aman kamu sa manga manugtudlu Kasuguan. Magkaibug sida mamasyar sadsad kay rutay, masulungun sida paggalangun, magpabaya-baya sa manga luwas balay. Nu sa simbahanan manga Hudiyu kanda gustu tumukaw sa tukawan iinalistu sa may kangaranan. Nu may karan-an kanda gustu makatukaw sa marinu pag tukawan.

Lukas 6:24

Dapat kaawaawa kamu pag manga mayaman dahil nakarubtan yi niyu ti kanyu pagbayaun.

Lukas 6:42

Kabitay kawu pag sumabi sa kanmu patar-ari, ‘Tar-ari, mahimu aw aku bum-ul kanmu paruk sa kanmu mata,’ nu unman nimu nakitan ti batang sa kanmu sadili mata? Kawu duy magpabalhinguun lang. Bul-a dap ti batang sa kam sadili mata, bag-u makakit mayad kawu hampay mab-ul nimu ti paruk sa kanmu patar-ari mata.”

Huwan 13:29

Si Hudas ti manugkurpa kuwarta. Nakan kanda hantup manga iba tuludluan barang sinugu ni Hisus si Hudas hampay bilihun niya kanda manga pangailangan sa Kapistahan, aw ngatay hampay pumakaun siya kuwarta sa manga pugri.

Huwan 5:41

“Balaw kang turunu para aku dayawun manga tawu.

Huwan 5:44

Magbaya kamu nu kamu magdarayawan sa usa kag sa usa, dapat unman kamu magmasigasid hampay makadayaw sa kanyu ti tutuu Diyus. Nu katunda kamu, kabitay lugud kamu pag pumaniwala sa kangku?

Huwan 7:18

Nu kay pagbagawun tawu ginan lang sa kay sadili naisipan, kay gustu siya ti dayawa manga tawu. Dapat nu kay gustu manugtudlu hampay dayawun ngap manga tawu ti nagsugu sa kanya, pihu gid pag-itudlu niya ti katutuuhanan unman may pabalhingu.”

Binwat 10:2

Si Kurnilyu hanggan kay manga kasunu balay niabay sa surundanun manga Hudiyu, masipag sida magsamba sa Diyus. Magpakaun diman gid si Kurnilyu kuwarta sa manga Hudiyu nu may kakurian, pirmi diman siya magdarangin sa Diyus.

Binwat 10:31

Magkun siya sa kangku, ‘Kurnilyu, nadnugan Diyus kanmu manga darangin. Pagbayaun niya kanmu awat sa manga makuri.

Binwat 10:4

Kinulbaan kay tinmurun sa anghil bag-u sinabi niya, “Hintay duy asan?” Nagsagut ti anghil magkun, “Pagbayaun Diyus kanmu manga darangin hanggan kanmu awat sa manga makuri. Nakan pirmi kawu kay pag-alalahanun.

Binwat 11:29

Nakan nagharampangan ti manga patar-ari hampay angay sa kanda kaya sa kada usa pumadara sida pakaun tabug sa manga patar-ari nangulian sa Hudiya.

Binwat 24:17

“May manga pira ka timpu aku balaw sa Hirusalim, bag-u binmalik maan aku ati hampay magtibu manga pakaun kuwarta sa kang manga kaparihu Hudiyu ag hampay magpakaun diman sa Diyus.

Binwat 9:36

Sa Hupi may usa ka babayi sakup diman sa kan Hisus. Kay ngaran si Tabita. (Sa Giriyigu kay ngaran si Durkas, kay ibug sabihun, Karasyaw.) Masipag gid ungud siya sa magbuwat mayad, pirmi diman siya mag-awat sa manga makuri.

Ruma 12:8

Pagparig-un sa manga patar-ari ti pinakan-an para manugparig-un. Nu mag-ambag, danga may kabuyatan. Nu kawu magpinunu, ilubus nimu kanmu pagkapipunu. Nu mag-awat sa tawu may kakurian, pagmasulung kam naisipan sa kanmu mag-awat.

1 Kurintu 13:3

Una ipakaun niku ti tanan-tanan niku kasiyunan sa manga pugri ag una ipakaun waya niku kang bilug hampay sunugun bag-u unman aku may pagmahal, unman gid aku may pakinabang.

Galasya 2:10

Kanda lang bilin danga pagkalimti nimi ti manga pugri sa Hudiya. Ungud ngani daan di pag-isipun niku sida hampay awatan.

Ipisu 4:28

Ti mananakaw danga yi magpakatakaw. Bagkus ngap pagpakasipag yi siya sa tarabahu, gamitun kay kamang sa una hintay pag buruwatun mayad hampay may miawat siya sa manga tawu may pangailangan.

1 Tisalunika 2:6

Unman nimi hiningbut kanyu pagdayaw una manga iba tawu pag pagdayaw.

1 Timutiyu 6:18

Sabihi nimu sida pagbuwat mayad, pagpakayaman sida sa mayad pag buwat. Pagmarapakaun, pagmaraawat sida sa kaparihu tawu.

Pilimun 1:7

Patar-ari, lubus aku nagbaya ag nagmasulung maan kang naisipan, pagka naalaman niku kuntay dinmasig maan ti naisipan manga nasakupan Diyus dahil sa kanmu pagmahal.

Hibriyu 13:16

Danga nita pagkalimti ti pagbuwat mayad hanggan ti pag-awat sa iba, dahil inda pag handug ti pagbayaun Diyus.

1 Pidru 4:11

Nu kawu magpaliwanag, pagginan sa Diyus kam paliwanag. Nu kawu manugsirbi waydi, gamitun nimu ti kabisugan ipinakaun Diyus sa kanmu magsirbi, hampay sa tanan bagay dayawun ti Diyus dahil sa kan Hisu-Kiristu. Sa kanya ti kadayawan hanggan kamaskihan hanggan di aban. Amin.

1 Samwil 15:30

Nagsagut si Saul, “Nagkasala aku! Nakan taynguna magpakihampang aku, kilalan-a nimu aku sa atubangan manga manugpamahala niku banwa ag buu Israil sa panab-anan pag-iba sa kangku sa pagsamba sa Panginuun nimu Diyus.”