Matiyu 5:6 - Hanunuu

⁶ Papaladan Diyus ti tawu nu ga magkalun-us ag magkauwaw kay magpatigagad makatupad sa kagustuhan Diyus, dahil ipakaun sa kanda ti kanda paggagadun.

Matiyu 5:6 Iomraidhean Croise

Kanta 107:9

Pinainum niya ti manga magka-uwaw ag pinakaun ti manga magkalun-us.

Kanta 145:19

Pag-iayaw nimu ti pagkaibgan manga maggalang sa kanmu; pagpatingihan nimu kanda magdangup, ag pag-iribri nimu sida.

Kanta 17:15

Dapat aku inda makakit sa kanmu dahil unman aku may nabwat kasalanan. Sa kang pag-ipulaw makabaya gid aku makakit sa kanmu.

Kanta 63:5

Makabaya aku parihu sa tawu busug gid sa karan-an. Ag dumayaw aku sa kanmu maghuyaw sa kabayaan.

Kanta 65:4

Mapalad ti tawu kanmu pinili ag binan-awan mangulian sa kanmu Balay. Makabaya kami sa marinu pag manga bagay sa kanmu balay, ti banal pag Balay Diyus.

Kanta 84:2

Gustu gid niku umati! Mag-ayup aku makasaka sa kanmu Balay, Panginuun. Kang buu buhi manganta may kabayaan sa kanmu, buhi pag Diyus.

Kabagawan 10:24

Ti pagkadalaan daut pag tawu mangyari ngap sa kanya, ti paghangadun matadlung pag tawu matanggap ngap niya.

Kabagawan 21:21

Ti magpangabuhi sa katadlungan hanggan sa kaayadan lumawig kay buhi ag umabunda, ag parangalan siya manga tawu.

Kanta ni Sulumun 5:1

Sinmulud aku sa kang gardin, sa mahal niku pag babayi. Tinipun niku kang mira hanggan manga pamanglu. Kinaun niku kang daykut ag nanginum kang intus hanggan gatas. Kamu pag manga magmalahalan, pagkaun kamu ag pag-inum.

Isayas 25:6

Sitaay sa Bantud Siun, ti Panginuun Makamaskihan mangalistu usa ka karan-an para sa tanan. Manga masarap pag karan-unun hanggan manga irinmun kay ialistu.

Isayas 41:17

“Nu manhanap danum kang manga nasakupan pugri, bag-u unman sida may masampakan, ag nu mamara kanda manga tululnan sa uwaw, aku ti Panginuun ti mangawat sa kanda. Aku ti Diyus Israil balaw pumabaya sa kanda.

Isayas 44:3

Dahil pakan-an niku kawu danum pamaraw uwaw hanggan humaug sa kanmu tigangan daga. Ipakaun niku kang Ispiritu sa kanmu linahi ag papaladan niku sida.

Isayas 65:13

Nakan aku ti Panginuun Diyus magkun, kang manga manugsirbi mangaun ag manginum, dapat kamu lun-usun ag uwawun. Magbaya sida dapat kamu mangay-a.

Isayas 66:11

hampay malakawan niyu ti kaabundahan parihu sa lapsag magsusu sa kay ina magkabsug.

Hirimyas 31:25

Dahil paharyun niku ti manga magkagasa, busugun niku ti manga magpanlumuy dahil sa lun-us. Nakan sabihun manga tawu,

Lukas 1:53

Binsug niya ti manga magkalun-us sa manga mayad pag kabagayan. Tinulak niya ti manga mayaman, unman pinakan-an una lang hintay.

Lukas 6:21

Papaladan Diyus kamu ti manga magkalun-us taynguna, dahil mabsug kamu aban. Papaladan Diyus kamu ti manga maglumi, dahil pasulungun kamu aban.

Lukas 6:25

Kaawaawa kamu pag manga busug yi kainda dahil kamu lun-usun aban. Kaawaawa kamu pag manga magkasari kainda dahil manruku aban ag manlumi kamu.

Huwan 4:14

Dapat dayi gid uwawun ti tawu una kapira aban nu inmun niya ti danum kang ipakaun sa kanya. Dahil ti danum kang ipakaun sa kanya bumaliw ga bulbugan sa kay tagipusuun may danum magpakaun buhi. Tunda pag danum tigpakaun buhi unman may katapusan.”

Huwan 6:27

Danga kamu magbudlay tungkul lang sa karan-unun magkabangsiw. Pagmasigasid kamu hampay matanggap niyu ti karan-unun unman magkabangsiw, imaw ti makapakaun tutuu pag buhi unman may katapusan. Tunda ngani pag karan-unun ti ipakaun Anak Tawu sa kanyu dahil may tinanggap siya karampatan ginan sa Diyus Ama.”

Huwan 7:37

Pagka sa katapusan yi pag sirang Kapistahan imaw yi ti pinakamahalaga pag sirang, ati katpung tinmindug si Hisus bag-u sinabi niya sa daraka buka magkun, “Una hintay pag tawu nu magkauwaw, pagsitay siya sa kangku, pag-inum.

Ipinakakit 7:16

Balaw yi sida lun-usun, unman yi uwawun. Balaw yi sida mainitan, balaw yi sida ga magkapalian init.